Мыекъопэ къэралыгъо технологическэ университетым мы мафэхэм «Хакатон добра» зыфи­Iорэ Iофтхьабзэр щыкIуагъ. Шъолъырым ыкIи хэгъэгум хэхъоныгъэхэр ашIынхэм ате­гъэпсыхьэгъэ социальнэ проектхэм ар афэгъэ­хьыгъагъ.

Апшъэрэ еджапIэхэм ястудентхэр, университетым иIофышIэхэр, сатыум емыпхыгъэ ыкIи бюджет организациехэр, хэбзэ къулыкъу зэфэшъхьафхэм ялIыкIохэр Iофтхьабзэм хэлэ­жьагъэх.
Къэзэрэугъоигъэхэм шIуфэс къарихыгъ апшъэрэ еджапIэм ипроректорэу, экономикэ шIэныгъэхэмкIэ докторэу Людмила Задорожнаям.
— Мыщ фэдэ Iофтхьабзэхэм мэхьанэшхо яI, джыри шъустудентызэ къыхэшъухыгъэ сэнэ­хьатым нахь пэблагъэ, хэшIыкI фышъуиIэ шъуешIы. Жъугъэхьазырырэ социальнэ проектхэм ыпэрапшIэу шIушIэныр ары апхырыщыгъэнэу щытыр. Нэбгырэ пэпчъ иIофшIэн зэригъэцакIэрэм дакIоу цIыфхэмкIэ шIуагъэ къызыпыкIыщт лъэныкъохэри дигъэцэкIэнхэ ылъэ­кIыщт. Социальнэ пшъэрылъхэм нэIуасэ шъуафэхъуныр, ахэр жъугъэцэкIэнхэм шъуесэныр ары пшъэрылъ шъхьаIэр, — къыIуагъ ащ.
Iофтхьабзэм хэлэжьагъэхэр купиплIэу гощыгъэхэу зы эксперт ахэтыгъ. Ахэм уцугъуиплIыкIэ заушэтыгъ, пшъэрылъэу къафагъэуцурэр охътэ кIэкIым агъэцакIэщтыгъ.
УпчIэу къафагъэуцугъэхэм ащыщ къэлэдэсхэм ягумэкIы­гъохэр угъоигъэнхэмкIэ шIыкIэу бгъэфедэн плъэкIыщтхэр. Джащ фэдэу гу-лъынтфэ узхэр нахь макIэ шIыгъэнхэм афэшI цIыф­хэм яшIэныгъэхэм афэ­гъэхьыгъэн зэрэфаер студентхэм къа­Iуагъ. Ащ нэмыкIэу къыткIэхъухьэрэ ныбжьыкIэхэм яфизическэ ухьазырыныгъэ зыкъыIэтыным, псэушъхьэхэм кIэлэцIыкIухэр апылъынхэм апае агъэфедэн алъэкIыщт шIыкIэ-­амалхэр къыраIотыкIыгъэх. Командэ пэпчъ хэкIыпIэу ылъэ­гъурэр гъэшIэгъонэу къыIотагъ. Iофтхьабзэм икIэух ащ хэлэжьагъэхэм дипломхэр аратыгъэх. Куп пэпчъ ыгъэхьазырыгъэ Iоф­шIэнхэр социальнэ проектхэм япхыгъэ ятIонэрэ зэнэкъо­къоу щыIэщтым къыщагъэлъэгъощтых.
ДЕЛЭКЪО Анет.