Адыгеим и ЛIышъхьэу КъумпIыл Мурат Херсон хэкум ирайон­хэм защэ- Iэм республикэр хэлажьэзэ ащ щагъэцэкIэрэ IофшIэнхэр зэрэкIорэм зыщигъэгъозагъ. IофшIэгъу зэIукIэгъум хэлэжьагъ Херсон хэкум игубернаторэу Владимир Сальдо. ЛъэныкъуитIумэ тапэкIи зэдагъэцэкIэщт проектхэм ахэр атегущыIагъэх.

Урысыем и Президентэу Владимир Путиным хэгъэгум ишъолъырыкIэхэм яхэ­хъоныгъэкIэ къыгъэуцугъэ пшъэрылъхэм ягъэцэкIэн мэхьанэшхо зэриIэр зэдэгущыIэгъум къыщыхагъэщыгъ. Анахьэу етIани анаIэ ащ зытыраригъэдзагъэр Хэгъэгу зэошхом ТекIоныгъэр къызщыдахыгъэмрэ Хэгъэгум иухъумакIо и Илъэсрэ афэгъэхьыгъэ Iоф­тхьабзэхэр, хэушъхьафыкIыгъэ дзэ операцием хэлажьэхэрэм ыкIи ахэм яунагъохэм IэпыIэгъу ятыгъэным япхыгъэу зэшIуахыщтхэр ары.

Херсон хэкум ипащэ ащ щыпсэурэ цIыфхэм ацIэкIэ Адыгеим ихэбзэ къулыкъухэм, партиеу «Единэ Россием» хэтхэм ренэу яшIуагъэ къызэрарагъэ­кIырэм ыкIи анаIэ къызэратырагъэтырэм апае зэрафэразэр къыIуагъ. КъызэрэхигъэщыгъэмкIэ, шъолъырыкIэм щыпсэурэ цIыфхэм ящыIэныгъэ къыхэхъухьэрэ зэхъокIыныгъэшIухэр янэплъэгъу итых ыкIи республикэм дыряIэ блэгъэныгъэ, IофшIэным епхыгъэ зэфыщытыкIэхэм якIэуххэм осэшхо афашIы.
Шъугу къэтэгъэкIыжьы: илъэс заулэ хъугъэу Адыгеим Геническэ районым щыпсэухэрэм шIушIэ IэпыIэгъу ареты. Джащ фэдэу Адыгэ Республикэм иIэпыIэгъу хэлъэу Херсон хэкум социальнэ мэхьанэ зиIэ псэолъэ заулэ щашIы ыкIи щагъэцэкIэжьы. Пшъэрылъыбэ зэшIозыхырэ Гупчэр, псауныгъэм игъэ­пытэн фытегъэпсыхьэгъэ комплекси 4, спорт гупчи 4, кIэлэцIыкIу джэгупIэ 12 ашIыгъ, ахэм къапэIулъ чIыпIэхэр зэтырагъэпсыхьагъэх. ЕджэпIи 4-мэ гъэцэкIэжьын IофшIэнхэр арашIылIагъэх, джащ фэдэу кIэлэцIыкIу IыгъыпIи 2-рэ краеведческэ музейрэ агъэцэкIэжьы­гъэх. Сомэ миллиардым ехъу ахэм апэIу­хьагъ.
КъумпIыл Мурат къызэрэхигъэщыгъэм­кIэ, республикэм тапэкIи Херсон хэкум щыпсэухэрэм ишIуагъэ аригъэкIыщт. Социальнэ ыкIи инженер инфраструктурэр гъэкIэжьыгъэным епхыгъэ Iоф­тхьабзэхэр лъигъэкIотэщтых. Мы илъэсым физкультурэмрэ псауныгъэм игъэпытэнрэ атегъэпсыхьэгъэ гупчэ агъэ­псыщт, Нижнесерогозскэ округым ит Вольновскэ еджапIэр агъэцэкIэжьыщт. Адыгеим и ЛIышъхьэ а еджапIэм щы­Iагъ, муниципалитетым ипащэхэмрэ гъэсэныгъэ зыщарагъэгъотырэ организацием Iоф щызышIэхэрэмрэ гущыIэгъу афэ­хъугъ. А зэдэгущыIэгъум хэлэжьагъ АР-м псэолъэшIынымкIэ, транспортымкIэ, унэ-коммунальнэ ыкIи гъогу хъызмэтымкIэ иминистрэ иапэрэ гуадзэу Лафышъэ Рэмэзан. Адыгеим и ЛIышъхьэ ащ пшъэрылъ фишIыгъ еджапIэм иадминистрацие ишIоигъоныгъэхэр зэкIэ къыдилъытэнхэу, республикэм икIыгъэ фирмэ-подрядчикыр игъусэу а Iофхэм атегущыIэнхэу ыкIи игъэкIотыгъэ гъэцэкIэжьынхэр ищыкIэгъэ шапхъэхэм анэсэу дэгъоу зэшIуахынхэу. Мыщ дэжьым къэIогъэн фае ащ къыпэIулъ чIыпIэри зэрэзэтырагъэпсыхьащтыр ыкIи спорт джэгупIэ зэрашIыщтыр.

НэмыкI лъэныкъохэмкIи Херсон хэкум щызэдагъэцэкIэрэ IофшIэнхэр лъагъэ­кIотэщтых. Нахьыпэм фэдэу, Адыгеим джыри шъолъырыкIэм щыпсэурэ кIэлэцIыкIухэр загъэпсэфыным пае респуб­ликэм илагерьхэм къарагъэблэгъэщтых, Iофтхьабзэу «Псауныгъэм имэшIоку» зыфиIорэм къыдыхэлъытагъэу Адыгеим ынаIэ зытыригъэтырэ районхэм медицинэ IофышIэхэр афагъэкIощтых. Культурэм, гъэсэныгъэм, ныбжьыкIэ Iофхэм ыкIи нэмыкI лъэныкъохэм япхыгъэ Iоф­шIэкIэшIоу аIэкIэлъ хъугъэмкIэ тапэкIи зэхъожьыщтых. ГущыIэм пае, ныбжьыкIэ политикэмрэ культурэмрэ нахь зарагъэ­ушъомбгъуным пае Адыгэ Республикэмрэ Херсон хэкумрэ яныбжьыкIэ гупчэхэм язэдэлэжьэныгъэ фэгъэхьыгъэ зэзэгъы­ныгъэм зэдыкIэтхэнхэу рахъухьагъ. Яхэгъэгу фэшъыпкъэхэу, шIу алъэгъоу ныбжьыкIэхэр пIугъэнхэмкIэ, зекIоным зегъэушъомбгъугъэнымкIэ, сэнаущыгъэ зыхэлъ ныбжьыкIэхэм IэпыIэгъу ятыгъэ­нымкIэ зэдызэшIуахыщт проектхэм лъэпсэ гъэнэфагъэ афашIынэу къапыщылъ. КъыткIэхъухьэхэрэм яамалхэр нахь къыхэгъэщыгъэнхэм, блэгъэныгъэ зэпхыныгъэхэр гъэпытэгъэнхэм, Iоф­шIэкIэшIоу аIэкIэлъ хъугъэмкIэ зэхъо­жьынхэм ахэр афытегъэпсыхьагъэу щытыщтых.

«УФ-м и Президент шъолъырыкIэхэм хэхъоныгъэ ягъэшIыгъэнымкIэ пшъэрылъэу къыгъэуцугъэхэр зэшIохыгъэ хъунхэм шIу зыгу илъ цIыфыбэ фэлажьэ. ГуфакIохэм, бизнесым ылъэны­къокIэ Iоф зышIэхэрэм, ведомствэхэмрэ организациехэмрэ ащылажьэхэрэм, Iофыгъоу къэуцухэрэм агъэгумэкIырэ цIыф къызэрыкIо пстэуми «шъопсэу» ясэIо яшIуагъэ къызэрагъа­кIорэм пае. ТипсэолъэшIхэми, пшъэдэкIыжь хэлъэу проектхэм ягъэцэкIэн зэрякIуалIэхэрэм пае, тафэраз. Ащ фэдэ IофшIэнэу зэдэгъэцэкIагъэ хъурэм ишIуа­гъэхэри нэрылъэгъу цIыфхэм къызэрафэхъурэм мэхьанэшхо иI, Адыгеим ынаIэ зытыригъэтырэ чIыпIэхэм арысхэм ящыIакIэ нахь Iэрыфэгъу ыкIи нахь гуIэтыпIэ мэхъу. ЦIыфхэм алъэгъу Адыгеим IэпыIэгъоу аритырэр зыфэдэр. ТапэкIи зэкIэ ящыкIагъэр зэраIэкIэдгъэхьащтым, тишIуагъэ зэрядгъэкIыщтым ыуж титыщт. Тишъо­лъырхэр нахь зэтегъэпсыхьагъэ хъунхэм пае пIэлъэ кIыхьэ къызэлъызыубытырэ зэдэлэжьэны­гъэр лъыкIотэным тынаIэ тетэгъэты», — АР-м и ЛIышъхьэ ипресс-къулыкъу

АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.