Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ къызэритыгъэмкIэ, Урысые Федерацием икъэралыгъо гъунапкъэ зыщызэпачырэ чIыпIэхэм шапхъэу ащагъэфедэхэрэр Урысыем икъэралыгъо гъунапкъэ изэтегъэпсыхьанкIэ Федеральнэ агентствэм 2010-рэ илъэсым тыгъэгъазэм и 27-м ышIыгъэ унашъоу N 451-р зытетымкIэ аухэсыгъэх.

А шапхъэхэм цIыфхэр, транспортхэр ащ фэдэ чIыпIэхэм адэхьанхэ ыкIи адэкIынхэ зэралъэкIыщт шIыкIэр, хьылъэхэр, товархэр, псэушъхьэхэр ахэм ащыIэнхэмкIэ ыкIи къадащынхэмкIэ хабзэу щыIэхэр ащыгъэнэфагъэх.

ЦIыфхэр, транспортхэр, хьылъэхэр, товархэр, псэушъхьэхэр Урысые Федерацием икъэралыгъо гъунапкъэ зыщызэпыращын фаер, хабзэкIэ агъэнэфэгъэ чIыпIэхэр ары.

ЦIыфхэм, транспортхэм, хьылъэхэм, товархэм, псэушъхьэхэм Урысые Федерацием икъэралыгъо гъунапкъэ зэпачын залъэкIыщтыр Урысыем къихьанхэу е икIынхэу фитыныгъэ къязытырэ документхэр щыIэхэ зыхъукIэ ары.

Урысые Федерацием къыпэIулъ къэралыгъом зэзэгъыныгъэ дишIызэ, Урысыем ицIыфхэмрэ ащ къыпэIулъ къэралыгъом ицIыфхэмрэ къэралыгъо гъунапкъэр нахь къызэрыкIоу зэпачын зэралъэкIыщт шIыкIэр ыухэсын ылъэкIыщт.

ЦIыфхэр, транспортхэр, хьылъэхэр, товархэр, псэушъхьэхэр Урысые Федерацием икъэралыгъо гъунапкъэкIэ зэпыращынхэм ыпэкIэ ядокументхэр, пкъыгъохэр пограничникхэм ауплъэкIух, ищыкIагъэ зыхъурэм таможеннэ, иммиграционнэ, санитарнэ-карантиннэ, ветеринарнэ, фитосанитарнэ, транспортнэ ыкIи нэмыкI уплъэкIунхэр арашIылIэх.

Урысые Федерацием и Правительствэ 2005-рэ илъэсым мэзаем и 2-м ышIыгъэ унашъоу N 50-р зытетэу «ЦIыфхэр, транспортхэр, хьылъэхэр, товархэр, псэушъхьэхэр Урысые Федерацием икъэралыгъо гъунапкъэ зэпырыщыгъэнхэмкIэ амалэу къызфагъэфедэхэрэм ыкIи уплъэкIунэу зэхащэхэрэм яхьылIагъ» зыфиIорэм уплъэкIун лъэпкъэу арашIылIэхэрэр щыгъэнэфагъэх.

Урысые Федерацием икъэралыгъо гъунапкъэ зыщызэпачырэ чIыпIэхэм ащыгъэнэфэгъэ шапхъэхэр зыукъорэм Урысые Федерацием административнэ хэбзэукъоныгъэхэмкIэ и Кодекс ия 18.4-рэ статья къыщыдэлъытэгъэ административнэ пшъэдэкIыжьыр рагъэхьы.

Административнэ хэбзэукъоныгъэхэм яхьылIэгъэ протоколхэр зэхэзыгъэуцохэрэр пограничнэ къулыкъухэмрэ хэгъэгу кIоцI IофхэмкIэ къулыкъухэмрэ яIофышIэхэр ары.

Мыщ фэдэ административнэ хэбзэукъоныгъэ зышIырэ цIыфым анахьыбэ дэдэмкIи сомэ 1000, IэнатIэ зыIыгъхэм – сомэ 5000, юридическэ лицэхэм – сомэ 10000 тазырэу атыралъхьэ.

Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ ипресс-къулыкъу.