ХэушъхьафыкIыгъэ дзэ операцием хэлажьэхэрэм ыкIи ахэм яунагъохэм яIофыгъохэр зэшIо­хыгъэнхэм Росреестрэм ишъо­лъыр ГъэIорышIапIэ иIофы­шIэхэр фэхьазырых.

Iофыр псынкIэу гъэцэкIэгъэным фэшI лъэныкъо зэфэшъхьафхэмкIэ фэIо-фа­шIэхэр зыгъэцэкIэрэ гупчэхэу (МФЦ-у) Адыгеим итхэм зэзэгъыныгъэ адашIыгъ. Арышъ, Росреестрэм зызыфагъазэкIэ ястатус араIон закъор ары ищыкIагъэр.
Дзэ операцием хэлажьэхэрэм ыкIи ахэм яунагъохэм яIэ амыгъэкощырэ псэуалъэхэр арагъэтхынхэм епхыгъэ IофшIэныр зыгъэцакIэхэрэр:
ХьакIэко Рустам Аслъанбэч ыкъор — ГъэIорышIапIэм ипащэ иIэпыIэгъу, телефоныр: 8(8772)56-01-06;
Тереньев Максим Валерий ыкъор — амыгъэкощырэ псэуалъэм итхынкIэ отделым ипащ, телефоныр: 8(8772)56-01-05.
Ащ имызакъоу, гуфэкIо проектэу «ЛIыхъужъхэм таригъусэу» зыфиIорэр тишъолъыр щыпхыращы. Ащ къыдыхэлъытагъэу, хэушъхьафыкIыгъэ дзэ операцием хэлажьэхэрэм ыкIи ахэм яунагъохэм амыгъэкощырэ псэуалъэу яIэ­хэмкIэ кадастровэ IофшIэнхэр афагъэцэкIэнхэмкIэ фэгъэкIотэныгъэу яIэр агъэфедэн алъэкIыщт. Ащ ишIуагъэкIэ тхьапэхэм ягъэпсын текIодэщт уахътэр ыкIи мылъкур нахь мэкIэщт.