Iэтахъохэм зэрахьэрэ бзэджэшIагъэхэм япчъагъэ нахь макIэ шIыгъэным фэшI хэбзэухъума­кIохэр къызхагъэлэжьэрэ зэIу­кIэгъухэр ыкIи класс сы­хьатхэр Адыгеим иеджапIэхэм ащырагъэкIокIых.

Хэбзэукъоныгъэу зэрахьэхэрэм къыкIэлъыкIон ылъэкIыщт тхьамыкIагъохэм якъэбар кIэлэеджакIохэми, ны-тыхэми къафаIуатэ.
Ны-тыхэм афызэхащэгъэ къэлэ зэ­IукIэгъум къеблэгъагъэхэм агу къагъэ­кIыжьыгъ зыныбжь илъэс 18 мыхъу­гъэхэм ыкIи ежьхэми алъэныкъокIэ хэ­бзэгъэуцугъэм къыдилъытэрэ уголовнэ ыкIи административнэ пшъэдэкIыжьэу щыIэхэр. Джащ фэдэу Iофтхьабзэм изэхэщакIохэм зигугъу къашIыгъэхэм ащыщ зыныбжь имыкъугъэхэм шъон пытэхэр ыкIи наркотик лъэпкъхэр зэрэзэрахьылIэхэрэр, ахэм язэрарэу къа­кIорэр, пчыхьэшъхьэпэ, мэзэхэ уахътэм нахьыжъхэр ямыгъусэхэу урамхэм ыкIи общественнэ чIыпIэхэм ащыземыкIонхэр.
АР-м хэгъэгу кIоцI IофхэмкIэ и Министерствэ и Общественнэ совет илIыкIоу Александр Девтеровым къэзэрэугъоигъэхэм анаIэ зытыраригъэдзагъэхэм ащыщ якIэлэцIыкIухэм цыхьэ къыз­фарагъэшIынэу зэрэщытыр, ахэм нахь якIасэхэр, ящыIэныгъэ кIэупчIэнхэ, зи­гъусэхэр игъэкIотыгъэу зэрагъэшIэнхэ зэрэфаер. ПIуныгъэм ылъэныкъокIэ шIуагъэ къэзытыщтэу, Iэтахъохэм бзэ­джэшIагъэу зэрахьэхэрэр нахь макIэ зышIыщтэу, ящынэгъончъагъэ зыгъэпытэщтэу ащ ылъытагъэр ны-тыхэм, кIэлэегъаджэхэм ыкIи полицием акIуачIэ зэхэлъэу зэдэлэжьэнхэр ары. Зе­кIокIэ-шIыкIэ шапхъэхэу щыIэхэр кIэ­лэцIыкIухэм арагъэшIэныр пшъэрылъ шъхьаIэу зэрэщытыр къэзэрэугъоигъэхэм агу къыгъэкIыжьыгъ. А. Девтеровым зэрилъытэрэмкIэ, нахьыжъхэм къагъэлъэгъорэ щысэр ары пIуныгъэ-гъэсэ­ныгъэмкIэ амалышIоу щыIэр.