Космонавтикэм и Мафэ ипэгъо­кIэу, мэлылъфэгъум и 11-м къэ­хъугъ зэлъашIэрэ тичIыгогъоу, Тэхъутэмыкъое районым ипсэу­пIэу Инэм щыщэу Советскэ Сою­­зым и ЛIыхъужъэу Анатолий Березовоир. Ар псэугъэмэ, ­ыныбжь илъэс 83-рэ хъущтыгъэ.

ЦIыф зэрыс апэрэ советскэ экспедициеу «Союз Т-5» зыфиIорэм Анатолий Березовоим пэщэныгъэ дызэрихьэ­щтыгъ, бортинженерэу Валентин Лебедевыр игъусэу орбитальнэ шIэныгъэ станциеу «Салют Т-7» зыцIэм ахэр быбыгъэх ыкIи а лъэхъаным рекордэу алъытэщтыгъэ чэщ-зымэфэ 211-рэ ащ къыщагъэкIуагъ. Экипажым а лъэхъаным шIэныгъэ эксперимент ыкIи ушэтын 300-м кIахьэу къышIыгъ, зэIухыгъэ космосым ихьагъ. Космическэ быбыныр шIуагъэ хэлъэу зэрэзэшIуахыгъэм пае ыкIи лIыгъэрэ лIыхъужъныгъэрэ къызэрэщызхигъэфагъэхэм афэшI полковникэу Березовоим званиеу Советскэ Союзым и ЛIыхъу­жъыцIэр къыфагъэшъошагъ.
ЛIыхъужъым ыцIэ непэ ехьы Инэм ия 2-рэ еджапIэу ар къы­зычIэкIыгъэм. ЕджэпIэ щагум ибюст дэт, еджэпIэ ыкIи культурэм иунэ музейхэм космонавтым иунэе пкъыгъохэр, сурэт­хэр, къытхыщтыгъэхэр ыкIи итхылъхэр ачIэлъых.

Аужырэ илъэсхэм Москва къыпэIулъ Звезднэм Березовоир дэсыгъ, ау зыщыщ чIыналъэр щыгъуп­шэщтыгъэп — Адыгеим пчъагъэрэ щыIагъ, ныбжьыкIэхэм аIукIэщтыгъ, лIэужхэм ошъогум екIурэ гъогур къафызэIуихыным пылъыгъ. ЗэлъашIэрэ тичIыгогъу фэгъэхьыгъэ къэбарыр ыгу къащигъэкIыжьыгъ Адыгеим и ЛIышъхьэу КъумпIыл Мурат исоциальнэ нэкIуб­гъохэм ыкIи космонавтыр зыпылъыгъэ Iофыр нэмыкIхэм зэрэ­лъагъэкIуатэрэм зэригъэгушIорэр къащитхыгъ:
«Гуапэ мэхъу Березовоим игъогу джыри зы тичIыгогъу зэрэрыкIуагъэр — ар Арутюн Кивирян. Ащи космонавт сэнэхьатыр къыхихыгъ, лъэныкъо пстэумкIи ухьазырыныгъэ ыкIуи, ушэтыпIэ къинхэм апхырыкIыгъ, Роскос­мосым иотряд икосмонавт-ушэтакIоу хъугъэ. Мы лъэныкъом щытхъу хэлъэу зыкъыщигъэлъэгъонэу ыкIи космосым пэрыо­хъунчъэу быбынэу сыфэлъаIо!».
Хэгъэгум иухъумакIо и Илъэс нэ­мыкI тичIыгогъухэу, псэупIэу Келермесскэм къыщыхъугъэу, дзэ авиацием иапэрэ пащэу Урысыем итарихъ къыхэнагъэу, къэзэкъэу Вячеслав Ткачевыр, апэрэ адыгэ летчикэу Цуамыкъо Чэлэмэт, апэрэ адыгэ летчицэу Бэгъужъэкъо Лелэ ыкIи пилот пшIы пчъагъэ — СССР-м ыкIи Урысыем я ЛIыхъужъхэу, зэуапIэм Iутыгъэхэу, ушэтакIохэу, дзэ подраз­делениехэм япэщагъэхэу зищыIэныгъэ яхэнэрэ океаныр штэгъэным фэзыгъэ­хьыгъэхэр джыри бэу зэрэщыIэхэр джащ фэдэу республикэ пащэм ыгу къыгъэкIыжьыгъ.