Сабый пэпчъ космосым быбынэу зэрэфаер шъэ­фэп, яцIыкIугъом къыщегъэжьагъэу Юрий Гагариныр зыщыщыр, игъэхъа­гъэхэр ашIэ ыкIи ащ фэдэ хъунэу фаех. ТичIыгогъу­хэми ящысэ анаIэ тыра­мы­дзэу пIон плъэкIыщтэп.

Космонавтикэм и Мафэ ехъу­лIэу кIэлэцIыкIу IыгъыпIэхэм, гу­рыт еджапIэхэм, гъэсэныгъэ тедзэ зыщарагъэгъотырэ гуп­чэ­хэм Iофтхьэбзэ зэфэшъхьафхэр ащызэхащэх. «Полярис-Адыгея» зыфиIорэм мэфэкI мафэм фэгъэхьыгъэ астрономическэ фес­тиваль непэ щызэхащэ. Респуб­ликэм икъалэхэм ыкIи ирайонхэм ащыщ кIэлэеджэкIуи 100 фэдиз мыщ хэлэжьэщт.
Iофтхьабзэр гъэшIэгъонэу рагъэкIокIыщт, астрономием фэ­гъэхьыгъэ квест ыкIи олимпиадэ афызэхащэщт. Лъэныкъуи 5-у зэтеутыгъэу Iофтхьабзэр кIощт. УпчIэхэр аратыщтых, кIэлэеджа­кIохэм ежь аIэкIэ спутник цIыкIу ашIыщт, ракетэ атIупщыщт. Анахь дэгъоу зыкъэзыгъэлъэгъуагъэхэр агъэшIощтых. Нэужым астрономи­ем, галактикэм, планетэм ыкIи жъуагъохэм афэгъэхьыгъэ лекцие гъэшIэгъонхэр афызэхащэщт.
Непэрэ мафэм астрономиер гурыт еджапIэхэм ащызэрагъэшIэжьырэп, пэублэ классхэм тыкъэзыуцухьэрэ дунаим фэгъэ­хьыгъэ предметым афыхагъэ­хьагъ, нахьыжъхэм нахьыбэмкIэ физикэм хэт хъугъэ. Мыр ныбжьыкIэхэм нахь игъэкIотыгъэу зэрагъэшIэным пае гъэсэныгъэ тедзэм хагъэхьагъ. Астрономием фэгъэхьыгъэ кружок республикэ естественнэ-хьисап еджапIэм ыкIи «Полярис-Адыгея» зыфи­Iорэм ащызэхащэ.ТехнологиякIэхэр къызфагъэфедэхэзэ тыгъэм исистемэ планетэ пчъа­гъэу хахьэрэр, ахэм ащыщэу Юпитерыр анахь зэрэиныр, Плутоныр зэращымыщыр ыкIи нэмыкIхэр кIэлэеджакIохэм арагъашIэ.
Хэты ышIэра, космонавтикэм ылъэныкъокIэ мыхэм сэнэхьат къыхахынкIи хъун, зэлъашIэрэ тичIыгогъухэм ясатырэ лъагъэ­кIотэным тыщыгугъын.
ДЕЛЭКЪО Анет.