Илъэсыбэ хъугъэу Iоф зэришIэрэм, исэнэхьаткIэ гъэхъагъэхэр зэриIэхэм апае Адыгеим и ЛIышъхьэу КъумпIыл Мурат иунашъокIэ щытхъуцIэу «Адыгэ Рес­публикэм изаслуженнэ врач» зыфиIорэр Хьагъундэкъо Мирэ къыфагъэшъошагъ.

Мирэ илъэс 45-рэ хъугъэу Шэуджэн районым ит сымэджэщым щэлажьэ. Пшъэрылъ инэу — псауныгъэр къэухъумэ­гъэныр щытхъу хэлъэу зэшIуехы. 1978-рэ илъэсым Пшызэ медицинэ институтэу Дзэ Плъыжьым ыцIэкIэ щытым ще­джагъ. 1979-м Мыекъопэ кIэлэцIыкIу сымэджэщым педиатрием щызэхащэгъэ интернатурэр къыухыгъ. Шэуджэн районым ит сымэджэщым педиатрэу, кIэлэцIыкIу отделением ипащэу, врач шъхьаIэм игуадзэу илъэсыбэрэ лэжьагъэ. Сабыим дагъоу иIэр къыхэзгъэщынэу, ар зэтезыгъэуцожьынэу хэта шъушIэрэр пIоу узыкIэупчIэкIэ, районым исхэм мы бзылъфыгъэм ыцIэ къыраIо.
Сымэджэщым республикэ гъэзетыр еблэгъагъ. ЫпэрапшIэу ащ иврач шъхьа­Iэу Боджэкъо Сусанэ зыIудгъэкIагъ.
— Хьагъундэкъо Мирэ игъашIэ сымэджэщым фигъэхьыгъ сIомэ, сыхэукъощтэп. Сымэ­джэщым щылэжьэрэ врачхэм зэкIэми ар тищысэтехыпI. Мыпшъыжьэу медицинэм ылъэныкъокIэ ишIэныгъакIэхэм ахегъахъо. Ащ епэсыгъэ дэдэу щытхъу ыкIи рэзэныгъэ тхылъхэр къыфагъэшъошагъэх. «Урысые Федерацием псауныгъэр къэу­хъумэгъэнымкIэ иотличник». Медалэу «АР-р загъэпсыгъэм ия 100-рэ илъэс» зыфиIорэр къыратыгъ. УФ-м ыкIи АР-м псауныгъэр къэухъумэгъэнымкIэ яминистерствэхэм ящытхъу тхылъхэр къылэжьыгъэх. Арышъ, илъэ­сыбэрэ джыри тапэ итэу лэжьэнэу сыфэлъаIо, — къы­Iуагъ Боджэкъо Сусаннэ.
Медицинэм ищыIэныгъэ гъогу зэрэрипхыгъэр тигущыIэгъу къытфиIотагъ.
— Сэнэхьатым икъыхэхын мэхьанэшхо иIэу сэлъытэ, сэ сишIошIкIэ ар къызщежьэрэр еджапIэр ары. СыцIыкIоу, къащ плъыжьыр зытет Iалъмэкъыр зышIохаслъэщтыгъ. ЕджапIэм дежурнэхэр зэриIэм дакIоу медсестра цIыкIухэри агъэнафэщтыгъэх. Ащ фэдэу сиуахътэ къызыскIэ, гушIуагъом сызэрихьэщтыгъ. Ащ дэжьми врач сызэрэхъущтыр сыгукIэ сшIэщтыгъ. Сисэнэхьат сыкъыфэ­хъугъэу сэлъытэ, — къеIуатэ Мирэ.
Къин зыпымылъ Iоф щыIэп. Щынэгъончъэ шапхъэхэр ыгъэфедэзэ врачым сымаджэхэр егъэхъужьых.
— Къэхъухэрэм ащыщыбэхэм дагъохэр яIэх. Арышъ, сабыир илъэс мыхъузэ ипсауныгъэ зыпкъ ибгъэуцон фае. Анахьэу апэрэ мазэм улъыплъэныр, ащ дакIоу ищыкIэгъэ Iэзэгъур къыхэпхыныр пшъэрылъ шъхьаI. Дагъо зиIэ сабый цIыкIухэр мэзитIу хъу къэс къытэуалIэх ыкIи нахьыбэмкIэ япсауныгъэ зэтеуцожьы, — къытфеIуатэ врачым.
Медицинэр псынкIэу зызыхъожьырэ лъэныкъохэм непэ ащыщ.
— Зэгорэм уисэнэхьат уфеджагъэкIэ икъунэу щытэп. ШIэны­гъакIэхэр зэмыгъэгъотэу непэрэ медицинэм удэлъэбэкъошъущтэп. Типшъэрылъ шъхьаIэр сымаджэм теIэзэныр, ащ ищыIэныгъэ къэдгъэнэжьыныр ары. ШIокI имыIэу ар тэгъэцакIэ. Уз пстэуми цIыфыр кIочIаджэ ашIы. Къызыхъугъэм щыубла­гъэу илъэс 18 охъуфэ, кIэлэцIыкIухэм япсауныгъэ зыпкъ итыным тылъэплъэ. Iэзэгъоу фыхэсхыгъэм ишIуагъэкIэ сымаджэм ипсауныгъэ изытет нахьышIу зыхъужькIэ гухахъо хэсэгъуатэ, — еIо Мирэ.
Сымэджэщыр мыщ фэдиз илъэсым Мирэ иунэ фэдэ хъугъэ. Мыщ Iут врачхэм, медсестрахэм, нэмыкI Iофы­шIэхэм аIэ зэкIэдзагъэу мэлажьэх, ягу­мэкIи ягушIуагъуи зэдагощы.
— Непэ къысфагъэшъошэгъэ цIэ лъапIэр сизакъоу къэзлэжьы­гъэп, ар сиIофшIэгъухэм яIэпы­Iэгъу бэкIэ епхыгъ. Лъэшэу сафэраз сыздэлэжьэрэ врач Iазэу Дыхъо Марет, илъэсыбэ хъугъэу къыздэлэжьэрэ медсестрахэм, — хигъэунэфыкIыгъ Мирэ.
Врач IэпэIасэм унэгъо дахэ иI. Ишъхьэгъусэрэ ежьыррэ пшъэшъищ зэда­пIугъ. Ипхъорэлъф цIыкIухэм ыгу къыдащае. Мирэ ипшъашъэхэм врач сэнэхьатыр къыхамыхыгъэми, ипхъорэлъф­хэм ащыщ игъогу рыкIонэу мэгугъэ.
Лъэпшъыкъо Фатим.
Сурэтыр: Хьагъундэкъомэ яхъарзынэщ.