Адыгэ пщын

Адыгэ пщынэу Iэпэ пшIыкIутIур,
ЗэкIэми уапшъ — удах, учан,
Узызэхэсхрэм, чIыпIэм лъэкъуитIур
ЩысфэмыIажэу сыкъытехьан.

ЗэкIэми уапшъэу сIомэ, нэмыкIмэ
Щхэн зэрашIыщтри сымышIэу щытэп.
Слъэпкъ уримакъэшъ, гум укъэмыкIмэ,
Хэта къэкIыщтыр? Ощ фэдэ щыIэп!

Къамылри дэеп, тишыкIэпщынэмэ
ГъыбзэкIэ жьыбгъэр къыпфаIотэщт.
Пщынаом пщынэр къытфызэкIищмэ,
Тэ тигушIуагъуи орэд тэмэщт.

Дунэе пщынэу пщынэ зэхэтхэр,
Уасэ къышъуфэсшIми, шъуапэ къэсэштэшъ,
Адыгэ пщынэм къэшъо орэдхэр
Къилъэты зыхъурэм, шъусщегъэгъуп­шэ.

Тикъамылапщи, ащ сырынапщэр
Зэригъусэжьэу хэгъади, ахэм
Адыгэ пщынэм фашIызэ шъхьащэр,
ШъхьакIуи амышIэу къыпфыхахын.

ЗэкIэми уапшъэу сIомэ, нэмыкIмэ
Щхэн зэрашIыщтри сымышIэу щытэп.
Слъэпкъ уримэкъамэшъ, гум укъэмыкIмэ,
Хэта къэкIыщтыр? Ощ фэдэ щыIэп!

Адыгэ пщынэу пщынэ Iэпабэр,
Угъэтхэ макъэу удэхэ дэд.
Ным ишIулъэгъоу гугъэпIэ шъабэр
Тым икIэлэгъушъ, непи къыпхэт.

Зэуж-зэлъыкIоу блэкIых илъэсхэр,
ЛIэшIэгъу зэблэкIми упхырарэх.
ЩэрэI егъашIэм уибзэпс тыгъэпсхэр,
Орышъ тымакъэр – узэхарэх.

Гъатхэр сигугъапI

СыцIыф, сыныбжьыкI,
Гъатхэр сигугъапI.
Тыгъэм сыщымыкI,
ЧIылъэр силъэгъуап.

Мафэр синэфыпс,
Сесы ипсырыкI.
Лъагэм инэмыс
Сыгуи фыхэмыкI.

Осыр сикIымаф,
Зафэр синэфылъ.
Бжыхьэр хьакIэ маф,
Дахи сыгум филъ.

ПлъапIэр сичэпэтх,
Тхышъхьэр гугъэ лъап.
Жъуагъор сичэщыбг,
Пщэфыр силъэхъапI.

Огур чъыхIэн дэгъу,
ЧIылъэр сикIэлъын.
Тыгъэр сишIулъэгъу,
Мазэр сиIэлъын.

Пшысэр чъыг къутам,
Сфэщхрэр ощхыбыб.
Ощхыр сибзыу там,
Лъатэу ом себыб.

СыцIыф, сымэщышI,
Гухэлъыбэ сиI.
ШIум нэмыкIэу зи
ЧIылъэм ерэмышI.

ЧIылъэр силъэгъуап,
Тыгъэм сыщымыкI.
СыцIыф, синыбжьыкI,
Гъатхэр сигугъапI.

Тыгъэр къыпфепсы, тыгъэр ощ пай

Адыгэ лъэпкъэу сыкъызхэкIыгъэр,
СыкъыоупчIы, непэ ухэт?
ЛIэшIэгъу миныбэу къызэпыпчыгъэр
Тарихъ мытхыгъэу гъэшIэ зэхэт.

Ухэт о сIомэ, адыгэ псалъэм
КъикIрэр умышIэу гъашIэр иохы.
Ухыорыпсэу тыгъэпс чIы налъэм
Уплъыр-гуплъырэу зышъхьэрэохы.

Шы чъэры Iэлэу, шы шъхьэрытIупщэу
Угуи тIупщыгъэу паIор пшъхьэрыс.
ЛъэпкъэгъукIэ узэу, умыз-мытIущэу
Щэрджэс-абдзахэу укъушъхьэрыс.

Шапсыгъэ тхышъхьэм укъыщечъэхышъ,
Бжъэдыгъу шъолъырыр къызэпыочъы.
КIэмгуе шъофми исхэр о пшыхэшъ,
Ухэт ямыIоу сэлам яохы.

ТилIэшIэгъу тIокIэу непэ тызхэтым
УкъекIолIэфэ бэ ппэкIэкIыгъэр,
Хьадэгъу лъэмыджэу джа узытетым
ГъучI макIэп щызэпыпкIыгъэр.

УзэхаупкIатэу, узэхалIыхьэу
ЛIэныгъэ чIыпIэм бэрэ уифагъ.
Сыд фэдэу зашIми, узэпаплъыхьэу
Зы хымэ пыий уфэм ыуфагъ.

Тыгъэм ифабэ зызэхэпшIагъэм
Къин умылъэгъоу сфэмыIошъун.
ШIугъэр унапэу дунэе гъашIэм
Игъогу мыпсынкIи урыкIошъун.

Зэкъошыныгъэр уичIы щэбагъо,
Лъэпкъ зэдэIужькIэ непэ убай.
Ощ пае тыгъэр, тыгъэр зэпагъоп,
Тыгъэр къыпфепсы, тыгъэр ощ пай.

Адыгэ цый

Адыгэ цыеу цые къопэфыр,
Осы нэгуфым фэдэу уфыжь.
Джыгыты кIалэу кIэлэкIэ чэфыр
Гушхоу рызепщэу ылъы ущыщ.

Бзыу тэмапэу, лъатэу, быбатэу
Шыгъэчъэ плъырмэ ренэу уахэт,
Дахэм идахэр оркIэ рытIуатэу
Жьы псынкIи, машIуи тIуми уафэд.

Типшъэшъэ гуахьмэ нэфыплъы шэплъым
УтфыхабзыкIышъ, пшычсэу утфады.
Хьазыр пшIыкIутIоу бгъэгупэм хэлъым
Тхыдэбэ Iаджи тарихъым щаты.

Къушъхьэ лъэгъуабэу джа мэстэ ужхэр
Ечъэх-дэчъыеу цыем къыхэщы,
Бгырысы нартхэу уицIыфы лъэшхэр
ЛIэшIэгъу зэлъыкIоу шIугъэм фэощэ.

ЛIыгъи, гукъауи, гушIуи, гъэрыпIи
УищыIэныгъэ къыхэтэджыкIы.
Шъхьафитныгъэр ястыщтэп япIуи,
Уишылъэмакъи шIункIым хэджыкIы.

Жьыбгъами ппихэу, гын гъози ппыоу
Уипыймэ тхьапшрэ анэгу уиплъагъ,
Зауи, мызауи укъыщауIэу
Гу шIуцIэ тхьапшмэ узыщалъагъ.

Уишъхьарыхъони жьыбгъэм зэрихьэу
Шъхьафиты тыгъэм укъыдыкъокIы.
Сыдырэ чIыпIи лIыгъэр щызепхьэу
МашIуи ояли уашъхьарысыкIы.

Типшысэ Iушмэ янэфи пхэтэу
ПсынкIагъэу пхэлъри ягухэлъ гугъ.
Узыфэдагъэр сэрыми, хэтми,
Зэрэ Кавказэу ыпкъы уекIугъ.