Искусствэм ыбзэ сурэтым пхырещы
Урысыем исурэтышIхэм я Союз хэтэу, РСФСР-м исурэтышIхэм я Союз и Адыгэ къутамэ ипащэу лэжьэгъэ Эдуард Овчаренкэм ыныбжь илъэс 90-рэ зэрэхъурэм фэгъэхьыгъэу ащ иIофшIагъэхэм якъэгъэлъэгъон Мыекъуапэ къыщызэIуахыгъ, сурэти 100-м ехъу ащ хэхьагъ. СурэтышIым иIофшIагъэхэр Урысыем, Болгарием, Румынием, Австралием ямузейхэм ачIэлъых.
Адыгеим и Сурэт къэгъэлъэгъуапIэ щыкIогъэ зэхахьэр АР-м культурэмкIэ иминистрэу Аулъэ Юрэ пэублэ гущыIэкIэ къызэIуихыгъ. Адыгеим и ЛIышъхьэу КъумпIыл Мурат ыцIэкIэ сурэтышIым къыфэгушIуагъ ыкIи «АР-м изаслуженнэ сурэтышI» зыфиIорэ щытхъуцIэр къызэрэфагъэшъошагъэр къыIуагъ, ар ритыжьыгъ.
— Эдуард Овчаренкэм гукъэкI гъэшIэгъонхэр ыгъэфедэзэ лIэшIэгъуныкъом къыкIоцI сурэтыбэ ыIапэ къычIэкIыгъ. Непэ ыныбжь илъэс 90-рэ зэрэхъурэм фэгъэхьыгъэ Iофтхьабзэм джыри нахьи нахь зиушъомбгъунэу илъэси 100 зыщыхъурэ мэфэкIым тыщызэIукIэнэу сыфэлъаIо, — къыIуагъ Аулъэ Юрэ.
Адыгэ Республикэм исурэтышIхэм я Союз итхьаматэу Елена Абакумовар, АР-м и Сурэт къэгъэлъэгъуапIэ ипащэу Бырсыр Абдулахь, Урысыем изаслуженнэ сурэтышIэу Борис Воронкиныр зэхахьэм къыщыгущыIагъэх
ЗэлъашIэрэ сурэтышIым игупшысэхэмкIэ дунаим ухещэ. Сурэт пэпчъ еплъыкIэ хэхыгъэ фыриI. Тыкъэзыуцухьэрэ дунаим идэхагъэ иIофшIагъэхэм къащыгъэлъэгъуагъ. Исурэтхэр плъышъо зэмышъогъухэр къябэкIэу гъэпсыгъэх, живописымрэ графикэмрэ къябэкIы. НахьыбэмкIэ ахэр зыфигъэхьыгъэхэр зыщыпсэурэ чIыпIэр, унагъор, къэзыуцухьэрэ дунаир ары. ЧIыопсым, тарихъым, псэушъхьэхэм, цIыфхэм ящыIакIэ, нэмыкIхэм афэгъэхьыгъэ сурэтхэр гъэшIэгъонэу гъэпсыгъэх.
— СигъашIэ творчествэм фэзгъэшъошагъ. СынасыпышIу, непэрэ мафэм сыкъызэрысыгъэмкIэ. СиIофшIагъэхэмкIэ щыIэныгъэр зэрэслъэгъурэр къисIотыкIыгъ. ТичIыгу щыпсэурэ лъэпкъхэм ятарихъ, ящыIакIэ, янепэрэ псэукIэ сурэтхэмкIэ къэзгъэлъэгъуагъ. Тидунай дахэ мамыр щыIакIэ иIэу щэрэI, — къыIуагъ Эдуард Овчаренкэм.
Iофтхьабзэм Адыгэ Республикэм ишIэныгъэлэжьхэм ащыщхэр, сурэтышIхэр, лъэпкъ интеллигенцием инахьыжъ гъэшIуагъэхэр, АР-м культурэмкIэ и Министерствэ илIыкIохэр, искусствэр зикIасэхэр хэлэжьагъэх. МэфэкI зэхахьэр зэгъэфагъэу, узIэпищэу, уигъэдаIоу гъэпсыгъагъэ.
Къэгъэлъэгъоныр мэлылъфэгъум и 23-м нэс зэIухыгъэщт. Искусствэр зышIогъэшIэгъонхэр ащ еплъынхэу зэхэщакIохэм рагъэблагъэх.
Лъэпшъыкъо Фатим.
Сурэтыр: Iэшъынэ Аслъан.