Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ къызэритыгъэмкIэ, чIэнэгъэшхо арагъэшIызэ, къагъэорэ пкъыгъохэр, химическэ веществохэр, электротокыр къызфагъэфедэзэ, пцэжъыехэм кIэнкIэхэр зыщапхъырэ лъэхъаным лъэшэу къагъэгъунэрэ чIыопс чIыпIэхэм, экологическэ тхьамыкIагъо къызыщыхъугъэ чIыпIэхэм, псы биологическэ къэкIуапIэхэр хэбзэнчъэу къащыхэзыдзыхэрэм (къащычIэзыхыхэрэм) Урысые Федерацием и Уголовнэ кодекс ия 256-рэ статья зигугъу къышIырэ уголовнэ пшъэдэкIыжьыр арагъэхьыщт.

Ащ фэдэ бзэджэшIагъэ зезыхьэхэрэм нахьыбэрэмкIэ къыхадзырэр пцэжъыехэр, хыхэм, псыхъохэм ахэс псэушъхьэхэр, къэкIыхэрэр, къалыркъэщ лъэпкъ зэфэшъхьафхэр, псылъэхъухэр, моллюскхэр ыкIи нэмыкIхэр ары.

Псыхъохэм, хыхэм ахэсхэр, ахэлъхэр, къащыкIыхэрэр хэбзэнчъэу къыхадзыгъэкIэ (къыхахыгъэкIэ) залъытэрэр экологиемкIэ хэбзэгъэуцугъэу щыIэр аукъозэ, Iизын тхылъ ямыIэу хэбзэгъэуцугъэм щымыгъэнэфэгъэ чIыпIэхэм ахэр къащызIэкIагъахьэкIэ ары.

IэнатIэу аIыгъыр къызфэзгъэфедэхэрэм, пэшIорыгъэшъэу зэгурыIохэзэ бзэджэшIагъэ зезыхьэрэ купмэ е чIэнэгъэшхо къэралыгъом езыгъэшIыхэрэм пшъэдэкIыжьэу арагъэхьырэр Урысыем и Уголовнэ кодекс ия 256-рэ статья щыгъэнэфагъ.

Пцэжъыехэм ыкIи нэмыкI псэушъхьэхэу псым хэсхэм ауасэ Урысые Федерацием и Правительствэ 2018-рэ илъэсым шэкIогъум и 3-м ышIыгъэ унашъоу N 1321-р зытетэу «Псы биологическэ къэкIуапIэхэм чIэнагъэу арагъэшIыгъэр къызэрэрадзэрэ шIыкIэм ехьылIагъ» зыфиIорэм щыгъэнэфагъ.

Сомэ мини 100-м ехъурэ зэрар псы биологическэ къэкIуапIэхэм арагъэхьыгъэ зыхъукIэ, ар чIэнэгъэшхокIэ, сомэ мин 250-м ехъумэ, чIэнэгъэ ин дэдэкIэ алъытэ.

Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ ипресс-къулыкъу.