IофшIэныр къэухъумэгъэным и Дунэе мафэ ипэгъокIэу АР-м ­IофшIэнымрэ социальнэ хэхъоныгъэмрэкIэ и Министерствэ республикэ форум зэхищагъ.

IофшIэныр къэухъумэгъэным ыкIи щынэгъончъэным афэгъэхьыгъэ зэхъо­кIыныгъэхэм, егъэджэнэу зэхащэхэрэм, IофшIапIэм щыхъурэ фыкъоныгъэхэр ыкIи тхьамыкIагъоу къыщяхъулIэхэрэр нахь макIэ шIыгъэнхэм афэшI пшъэры­лъэу къэуцухэрэм атегущыIагъэх.
АР-м IофшIэнымрэ социальнэ хэхъоны­гъэмрэкIэ и Министерствэ ипащэ игуа­дзэу Даур Руслъан министрэм ыцIэкIэ къэзэрэугъоигъэхэм шIуфэс сэлам ари­хыгъ. Хабзэ зэрэхъугъэу, мы Iофтхьа­-
бзэр зэрэзэхащэрэр ыкIи мэхьанэшхо зэриIэр къыIуагъ. IофшIэныр щынэгъончъэу зэхэщэгъэным пылъ шапхъэхэр шIокI имыIэу агъэцэкIэнхэу зэрэщытыр, IофшIэн языгъэгъотыхэрэм мы лъэныкъом анаIэ тырагъэтын зэрэфаер хи­гъэунэфыкIыгъ.
Адыгэ Республикэм и Общественнэ палатэ итхьаматэу Устэ Руслъан мы лъэныкъом епхыгъэ IофшIэнэу агъэца­кIэрэм нэужым къытегущыIагъ. ЦIыфхэм яфитыныгъэхэр къызэраухъумэхэрэр, зищыкIагъэхэм IэпыIэгъу зэрэрагъэгъотырэр, нэбгырэ пэпчъ иIофшIэпIэ чIыпIэ щынэгъончъэу щытын зэрэфаер къыхигъэщыгъ.
IофшIэныр щынэгъончъэным фыте­гъэпсыхьэгъэ щыгъынхэр, лъэкъопылъхьэхэр, пкъыгъо зэфэшъхьафхэр къыдэзыгъэкIырэ пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Техноария» зыфиIорэм ипащэ нэужым гущыIэ ратыгъ. IофшIэпIэ зэфэшъхьафхэм аIутхэм ащыгъын алъэкIыщтхэм япхыгъэ къэгъэлъэгъон нэужым къашIыгъ.
Нэбгырэ пэпчъ IофшIэпIэ чIыпIэ Iухьэ зыхъукIэ, щынэгъончъэным ылъэныкъокIэ амалэу иIэр ышIэн фае. Ащ епхыгъэ комиссие республикэм щызэхащагъ, ащ хэхьэх хэбзэ къулыкъухэм, профсоюзхэм ыкIи IофшIапIэ языгъэгъотыхэрэм ялIыкIохэр. Ащ ишIуагъэкIэ IофшIэпIэ чIыпIэхэм къащыхъурэ тхьамыкIагъохэр нахь макIэ хъугъэ, ахэр дэгъэзыжьы­гъэнхэр пшъэрылъ шъхьаI. Зэфэхьысыжьэу ашIыгъэмкIэ гъэрекIо IофшIапIэм щыIэхэу нэбгырэ 19-мэ шъобжхэр атещагъэ хъугъэ, зидунай зыхъожьыгъэхэри ахэтых. Къыхэгъэщыгъэн фае мыщ фэдэ тхьамыкIагъо къызэхъулIэхэрэр зыщысымэджэгъэхэ уахътэм тефэрэ ахъщэм ипроценти 100 къазэрэратыжьыгъэр, ащ нэмыкIэу зэтыгъо страховой тын зидунай зыхъожьыгъэм иунагъо исхэм сомэ миллиони 2 араты.
Iофтхьабзэм къыдыхэлъытагъэу джэгукIэу «Что? Где? Риски» зыфиIорэр зэхащагъ, текIоныгъэ къыдэзыхыгъэхэм шIухьафтынхэр аратыгъэх.
ДЕЛЭКЪО Анет.