Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ къызэритыгъэмкIэ, Урысыем и Уголовнэ кодекс ия 226.1-рэ ыкIи ия 229.1-рэ статьяхэм къызэрэдалъытэрэм тетэу уголовнэ пшъэдэкIыжь арагъэхьы наркотикхэр, Iашэхэр, щэ-гынхэр Урысыем икъэралыгъо гъунапкъэ зэпачэу изыщыхэрэм.

Я 226.1-рэ статьям къызэриIорэмкIэ, щэнаут зыхэлъ, радиациер къэзытын, къэон зылъэкIыщт веществохэр, цIыфхэр жъугъэу зэкIодылIэн ылъэкIыщт Iашэхэр, дзэ техникэр, стратегическэ мэхьанэ зиIэ товархэр, культурнэ шIуагъэ зиIэ пкъыгъохэр, анахьэу  агъэлъэпIэрэ псэушъхьэ Iэлхэр, Тхылъ Плъыжьым дэхьэгъэ чъыг е къэгъэгъэ, хьаIу лъэпкъ зэфэшъхьафхэр изыщынхэу фежьэхэрэм уголовнэ пшъэдэкIыжь арагъэхьы. Илъэси 3-м къыщыублагъэу илъэси 7-м нэс хьапс атыралъхьан алъэкIыщт.

IэнатIэ зиIэ цIыфым иIэнатIэ къызфигъэфедэзэ изакъоу е куп зэхищагъэу ащ фэдэ бзэджэшIагъэ зызэрихьэкIэ ыкIи ащ дакIоу къэралыгъо гъунапкъэм Iут уплъэкIуакIохэм кIуачIэкIэ запэуцужьыкIэ илъэси 10 хьапс тыралъхьан алъэкIыщт. Зэхэщэгъэ купым контрабандэ зызэрихьэкIэ, илъэс 12-м нэс тыралъхьан алъэкIыщт.

Урысыем и Уголовнэ кодекс ия 226.1-рэ статья игуадзэ къызэриIорэмкIэ, стратегическэ мэхьанэшхо зиIэ товаркIэ алъытэхэрэр Урысые Федерацием и Правительствэ еухэсых. Уасэу яIэри сомэ миллионым шъхьадэкIы зыхъукIэ ары ащ фэдэ товархэу залъытэхэрэр.

Урысыем и Уголовнэ кодекс ия 229.1-рэ статья къызэрэдилъытэрэмкIэ, хэбзэнчъэу наркотикхэр, психотропнэ веществохэр, къэкIыхэрэм ащыщхэу наркотикхэр зыхэлъхэр Урысыем изыщынхэу фежьэхэрэм илъэси 3-м къыщегъэжьагъэу илъэси 7-м нэс хьапс атыралъхьан алъэкIыщт.

IэнатIэ зиIэ цIыфым куп гъэнэфагъэ зэхищэу ащ фэдэ бзэджэшIагъэ зызэрихьэкIэ, илъэс 20-м нэс е егъэшIэрэ хьапс тыралъхьан алъэкIыщт.

ФСБ-м Адыгэ РеспубликэмкIэ и ГъэIорышIапIэ ипресс-къулыкъу