Адыгэ Республикэм исоциальнэ-экономикэ хэхъоныгъэкIэ лъэпкъ проектымрэ унэе программэмрэ яшIуагъэкIэ инфраструктурэм игъэпсын иIофыгъохэр Адыгеим щызэшIуахых. Сомэ миллиарди 10,3-рэ фэдиз пстэумкIи гъогу ыкIи инженер инфраструктурэм пэIуагъэ­хьа­нэу рахъухьэ.

Урысые Федерацием псэо­лъэшIынымкIэ ыкIи унэ-ком­мунальнэ хъызмэтымкIэ иминистрэ игуадзэу Юрий Горде­евымрэ Адыгэ Республикэм и ЛIышъхьэу КъумпIыл Муратрэ IофшIэгъу зэIукIэгъоу зэдыря­Iагъэм зыщытегущыIагъэхэр зыгъэпсэфыпIэу «Лэгъонакъэ» ишIын тегъэпсыхьэгъэ инфраструктурэм ипсэуалъэхэр тапэкIи зэрагъэпсыщтхэм иIофыгъохэр ары.
АР-м и ЛIышъхьэ къызэрэхигъэщыгъэмкIэ, федеральнэ IэпыIэгъум ишIуагъэкIэ инфраст­руктурэу зыгъэпсэфыпIэм ищы­кIэгъэщтыр шIыгъэнымкIэ рес­публикэм хэпшIыкIэу бэ зэшIуи­хыгъэр. ГущыIэм пае, УФ-м псэолъэшIынымкIэ ыкIи унэ-коммунальнэ хъызмэтымкIэ и Министерствэ къыIэкIи­гъэхьэгъэ субсидиехэм яшIуагъэкIэ автомобиль гъогоу «Да­хъо — Лэгъо­нэкъэ кIэир» зыфиIорэм изы Iахь атIупщыгъах. Псыр аIэкIэзыгъэхьащт ыкIи атезыгощэщт системэм игъэтIылъын епхыгъэ псэолъэшI-монтаж IофшIэнхэр макIох, инвестиционнэ проектым къыхиубы­тэрэ псэуалъэхэр электричест­вэмрэ гъэстыныпхъэ шхъуантIэмрэ яхъытыухэм апа­шIагъэх.

«Тафэраз УФ-м и Прави­тельствэ, УФ-м псэолъэшIы­нымкIэ и Министерствэ Iэпы­Iэгъу къызэрэтфэхъухэрэм апае. ЗекIонымкIэ инфраструктурэм хэхъоныгъэ ышIынымкIэ, зы­гъэпсэфыпIэу «Лэгъонакъэ» игъэпсынкIэ гухэлъэу тиIэхэр гъэхъагъэ хэлъэу пхырыщыгъэ хъунхэмкIэ а IэпыIэгъум мэхьанэшхо иI. Проектышхом ишIуагъэ къэкIощт зекIонымрэ хьакIэпэгъокIынымрэ афытегъэ­псыхьэгъэ Iофхэр республикэм лъэгэпIакIэм щынэгъэсыгъэнхэмкIэ, зекIоным епхыгъэ лъэныкъохэр икъоу къыдэлъытэ­гъэнхэмкIэ. Мыщ дэжьым джы­ри зэ къыхэзгъэщынэу сы­фай: зыгъэпсэфыпIэр тшIы зыхъукIэ тыкъэзыуцухьэрэ дунаир щы­нэгъончъэу щытынымкIэ, ар укъуагъэ мыхъунымкIэ шапхъэ­хэр зэкIэ икъоу къыдэтлъытэщтых. Инвесторхэм ащ фэдэ пшъэрылъ къапыщылъ. ЧIыпIэм изытет зэщытымыгъакъоу инфраструктурэм иIофыгъохэр зэшIотэхых. Ахэр анахьэу
зы­фэгъэхьыгъэхэр гъогухэм, энергетикэм епхыгъэхэм яшIын ары», — къыхигъэщыгъ КъумпIыл Мурат.

Мы лъэхъаным проектым иапэрэ чэзыу къызэрэди­лъы­тэрэм тетэу специалистхэр ин­женер-геологие лъыхъонхэм, амал зэфэшъхьафхэм ягъэунэфын ыуж ихьагъэх, къушъхьэлъэ чIыпIэхэу лыжэхэмкIэ зыщызекIощтхэм къызэлъаубыты­щтыр зэрищыкIагъэм тетэу къыдэ­лъытэгъэным иамали ащ къытыщт. Тхылъэу ищыкIагъэхэр, а чIыпIэм IофшIэнхэр щыгъэцэ­кIагъэ хъунхэмкIэ Iизын къэзытырэ документхэр гъэхьазы­рыгъэнхэмкIэ илъэсищым къыкIоцI Iофышхо зэшIохыгъэ хъугъэ. ИщыкIэгъэ уплъэкIун-ушэтынхэр зэкIэ зэхащагъэх. НепэкIэ зэшIуахырэ IофшIэнхэу псэолъэшIыным епхыгъэхэр хэбзэгъэуцугъэм къыдилъытэрэ шапхъэхэм адештэх ыкIи уплъэкIокIо-лъыплъэкIо къулыкъухэм анаIэ ахэм атырагъэты. Ахэм ащыщых Росприроднад­зорымрэ Кавказ къэралыгъо чIыопс биосфернэ заповедни-­кэу Х. Г. Шапошниковым ыцIэкIэ щытымрэ.
ЦIыфэу къакIохэрэм япчъагъэ зэрэхэхъощтым, тыкъэзыуцу­хьэрэ дунаим зэрар ахэм ра­мыхыным афытегъэпсыхьэгъэ лъэныкъохэр зэкIэ тэрэзэу къы­­далъытэхэзэ инфраструктурэм епхыгъэ Iофхэр агъэца­кIэх. Анахь къагъэгъунэрэ чIы­опс чIыпIэхэм къапкъырыкIыхэзэ, псэуалъэу ашIыхэрэр зэкIэ ахэм зэрар афэмыхъунхэу агъэпсых. КIэкIэу къэпIон хъумэ, зэпымыоу илъэс псаум Iоф зы­шIэн зылъэкIыщт зыгъэпсэфыпIэу ар щытыщт. КIымафэм ар зыфытегъэпсыхьэгъэщтыр лыжэ­хэмкIэ щызекIонхэр ары, гъэма­фэм — загъэпсэфынымрэ чIы­пIэ дахэхэм якъэплъыхьанрэ.
АР-м и ЛIышъхьэ ипресс-къулыкъу
къытырэ къэбархэмкIэ
Тхьаркъохъо Сафыет.