ХэушъхьафыкIыгъэ дзэ операцием хэлажьэхэрэм зэрадыра­гъаштэрэм фэгъэхьыгъэ къэ­гъэлъэгъон Адыгеим и Народнэ фронт ригъэкIокIыгъ.

Мыекъуапэ культурэм и Унэу дэтым къыщызэIуахыгъэ къэгъэлъэгъоным хэтыгъэх Народнэ фронтым игуфакIохэу зэрэреспубликэу ащыIэхэм къагъэхьазырыгъэ пкъыгъохэр. Ахэм ащыщых зыгъэбылъыхэрэ хъытыухэр, шъуашэхэр, хьакухэр, дронхэр зэралъхьэхэрэр ыкIи ахэм ащызыухъумэхэрэ пэIухъохэр, шэф остыгъэхэр, нэмыкIхэри. Адыгеим щыщхэу хэушъхьафыкIыгъэ дзэ операцием и ЛIыхъужъхэм апае хэушъхьафыкIыгъэ экспозицие афагъэ­хьазырыгъагъ.
ТиухъумакIохэм IэпыIэгъу афэхъу­гъэнымкIэ, зэрафэгумэкIыхэрэр зэха­шIэнымкIэ мы къэгъэлъэгъоныр Адыгеим щыпсэухэрэм языкIыныгъэ ыкIи язэкъотныгъэ итамыгъэ хъугъэ. Об­ществэр зэкъотэу зэуапIэм Iутхэм, ахэм яунагъохэм агу къызэрэдащаерэр ыкIи цIыфхэр бэу зэхэтхэу IэпыIэгъу зэрафэхъухэрэр нэрылъэгъу афэхъу­нымкIэ мыщ фэдэ къэгъэлъэгъонхэм мэхьанэ яI.
— Непэ тэлъэгъу республикэр зэ­къохьагъэу тикIалэхэм IэпыIэгъу зэра­фэхъухэрэр. Тызэрэзэгъусэм къэгъэ­лъэгъоныр ишыхьат, тызэгъусэу ТекIоныгъэр къызэрэдэтхыщтми тицыхьэ
телъ, — хигъэунэфыкIыгъ Адыгеим и Народнэ фронт иисполком ипащэу Юрий Гороховым.
Iофтхьабзэм къыдыхэлъытагъэу, фронтым IэпыIэгъу фэхъугъэным зи­IахьышIу хэзылъхьэрэ пенсионерхэр, гуфакIохэр, сатыум ыкIи организациехэм ялIыкIохэр рэзэныгъэ тхылъхэмкIэ къыхагъэщыгъэх. Нэужым зичэзыу шIушIэ IэпыIэгъоу республикэм щы­псэухэрэм агъэхьазырыгъэр хэушъхьафыкIыгъэ дзэ операциер зыщыкIорэм щатIупщыгъ.

— ТиIофшIэн къызэрагурыIорэм ыкIи къызэрэхэлажьэхэрэм мэхьанэ иI. Ти­IахьышIоу хатлъхьэрэм дзэкIолIхэм уасэ зэрэфашIырэм IофшIэным нахь тыфещэ, — къыхигъэщыгъ народнэ полкэу «Адыгэкъал Za МИР»зыфиIорэм ипащэу Михаил Милаевым.