Ом изытет лъыплъэрэ къулыкъухэм мэлылъфэгъум къызэрэучъыIыщтыри, къызэресыщтыри къаIощтыгъэми, тыгъосэрэ осыр республикэм щыпсэухэрэмкIэ ошIэ-­дэмышIагъ.

Градус 30-м нэсырэ мэфэ фабэхэм ауж 3 — 5-м къыфэдгъэзэжьыгъ. Ащ фэхьазырыгъэп чIыопсыри.
Тхьэпэ шхъонтIэгъакIэхэмкIэ зыкъэзыштэгъэ чъыгхэм ос цIы­нэм ихьылъэ афэщэчыгъэп, бэ­хэр зэхикIыкIагъэх. Чъыг къутагъэхэм ыкIи осэу апишIыхьагъэм электричествэм ирыкIуапIэхэри зэпачыгъэх. Анахьэу ом изытет иягъэ зэригъэкIыгъэр Мыекъопэ районыр ары. Къушъхьэлъэ чIыналъэм осыр нахь щылъэ­шыгъ. Мыекъопэ районым ­изыкI диспетчерскэ къулыкъу къызэритыгъэмкIэ, псэупIэхэу Хъы­мыщкIэй, Дахъо, Меркулаевкэм ыкIи ащ апэгъунэгъу къутыр заулэхэм нэфынэ яIагъэп. ЧIыпIэ-чIыпIэу псэупIэу Хьаджыкъом, Тульскэм ыкIи Абдзэхэхьаблэ дэсхэр остыгъэнчъагъэх. Ахэм ягумэкIыгъохэм ядэгъэзыжьын электрикхэр дэлэжьагъэх. Зэ­кIэмкIи техникэ 12-рэ нэбгырэ 41-рэ IофшIэнхэм ахэлэжьагъ. ПстэумкIи купипшIымэ мэфэ псаум Iоф ашIагъ. Купищыр гъунэгъу районхэм къарыкIы­гъагъэх.
Гидрометеогупчэм къызэритырэмкIэ, мы тхьамафэм ыкIэм нэс чъыIэщт. Джыри ос къесын ылъэкIыщт. Анахьэу ар зыщылъэ­шыщтыр къушъхьэ лъэныкъор ары. Лэгъонэкъэ бгытешъом мэлылъфэгъум и 15-м нэс щыос-хъо­тыщт, чъыIэр градусипшIым нэсыщт. Нычэпэ республикэм илъэгохэ чIыпIэхэм чъыIэу зы градус ащыIэщт.
Анцокъо Ирин.