АР-м идзэ комиссариат пресс-зэIукIэ ты­гъуасэ ригъэкIокIыгъ. Бжыхьэ дзэ дэщыгъоу блэкIыгъэм изэфэхьысыжьхэм, гъэтхэ дзэ ­дэщыгъомкIэ пшъэрылъ гъэнэфагъэу яIэхэм ащ щатегущыIагъэх.

Iофтхьабзэм хэлэжьагъэх АР-м идзэ комиссариат ипащэу Александр Авериныр, цIыфхэр дзэ къулыкъум дэщыгъэнхэмкIэ ыкIи ухьазырыгъэнхэмкIэ отделым ипащэу Виталий Лебедевыр, дзэ-врачебнэ комиссием ипащэу Игорь Буренковыр, район дзэ комиссариатхэм япащэхэр, къэбарлъыгъэIэс амалэу республикэм итхэм ялIыкIохэр.

Республикэм идзэ комиссар шъхьаIэ Iофтхьабзэр къызэIуихызэ, Хэ­гъэгу зэошхом ТекIоны­гъэр къызщыдахыгъэр илъэс 80 зэрэхъурэм те­фэу дэщын кампаниер зэрэрекIокIыщтыр къы­хигъэщыгъ. Джащ фэдэу УФ-м и Президент иунашъокIэ мы илъэсыр Хэ­гъэгум иухъумакIо и Илъэ­сэу зэрагъэнэфагъэри хигъэунэфыкIыгъ.
— Илъэс заулэ хъугъэу Iофым хэшIыкI фызимы­Iэхэм къэбар нэпцIэу къы­рагъэкIокIыхэрэм къа­хэкIыкIэ дэщын Iофтхьа­бзэр пхырыщыгъэныр къызэрыкIоу щытэп. Арэу щыт нахь мышIэми, бжы­хьэ дзэ дэщыгъоу блэ­кIыгъэм къытфагъэуцугъэ пшъэрылъыр дгъэцэкIагъэ ыкIи къулыкъур зы­хьыщт ныбжьыкIэ нэбгырэ 400 фэдиз ащ кIуагъэ. Ахэм зэкIэми, зэрэхабзэу, шъуа­шэхэр, несессерхэр, банковскэ картэхэр аратыгъэх. Дэщын Iофтхьа­бзэр зыпкъ итэу, пIалъэм диштэу рекIокIыгъ, хъугъэ-­шIагъэ къыхэкIыгъэп. Зи­IофшIэнкIэ анахь къахэщыгъэхэм ащыщых Красногвардейскэ, Мыекъопэ, Теуцожь районхэм, къалэу Мыекъуапэ ядзэ комис­сариатхэр. Джы гъэтхэ дзэ дэщыгъор тыублагъэ, Адыгеим щыщ ныбжьыкIэ 600 фэдиз ащ къыхиубы­тэщт, — къыIуагъ Александр Авериным.
Комиссар шъхьаIэм зигугъу къышIыгъэхэм ащыщ зыныбжьыкIэ зыте­фэхэрэм дзэ къулыкъур ахьыным фэгъэхьыгъэ хэ­бзэгъэуцугъэм зэхъокIыныгъэ зэрэфамышIыгъэр. Шъугу къэдгъэкIыжьын, ыпэкIэ зэрэщытыгъэр хъулъ­фыгъэхэу илъэс 18-м къыщегъэжьагъэу илъэс 27-м нэс зыныбжьыхэр ары къулыкъум ащэщтыгъэхэр, 2024-рэ илъэсым ищылэ мазэ и 1-м къыщегъэжьагъэу илъэс 30-м нэс зыныбжьхэр къыхеубытэх. Дзэ къулыкъур зэ­рахьыщтыгъэ пIалъэр къэнэжьыгъ — мэзэ 12.
Iофтхьабзэм къыщыхагъэщыгъэхэм ащыщ мы ныбжьыкIэхэр хэушъхьафыкIыгъэ дзэ операцием зэрамыщэщтхэр.
— Шъугу къэзгъэкIы­жьымэ сшIоигъу, ыпэрэ дэщын кампаниехэу редгъэкIокIыгъэхэм къащысIогъагъэр къызэрагъэшъыпкъэжьыгъэр. ХэушъхьафыкIыгъэ дзэ операцием мыхэм афэдэ ныбжьыкIэ­хэр ащэхэрэп, офицерхэр ыкIи дзэкъулыкъушIэхэу зэзэгъыныгъэм кIэтхагъэ­хэр ары ащ агъакIохэрэр. Арышъ, мы лъэныкъомкIэ ны-тыхэр гумэкIыгъо хэтынхэр ищыкIагъэп, — къыIуагъ ицыхьэ телъэу Александр Авериным.
Журналистхэр зыгъэгумэкIырэ упчIабэ пресс-зэIукIэм къыщаIэтыгъ. Дзэ комиссариатхэм яIофы­шIэхэм ахэм джэуапхэр къаратыжьыгъ.
Iэшъынэ Сусан.