Сэкъатныгъэ зиIэу зиамалхэмкIэ ялэгъухэм акIэмыхьэ­хэрэм апае зэхащэ­рэ зэнэкъокъоу «Аби­лимпикс» зыфиIорэр мы мафэ­хэм къызэ­Iуахыгъ.

Платформэу «Урысыер – амалышIухэр зыIэкIэлъ къэралыгъу» зыфиIорэм къыдыхэлъытагъэу ар илъэси 9 хъугъэу Мые­къопэ индустриальнэ техникумым щызэхащэ. Мыгъэ зэкIэмкIи нэбгыри 123-рэ ащ хэлажьэ, ахэм ащыщэу 37-р кIэлэеджа­кIох, 70-р студентых ыкIи 16-р лъэныкъо зэфэшъхьафхэмкIэ специалистых. МэфиплI зэнэкъокъухэм ауж анахь дэгъухэр къахахыщтых.
АР-м гъэсэныгъэмрэ шIэныгъэмрэкIэ и Ми­нистерствэ, сэкъатныгъэ зиIэхэм ядвижениеу «Абилимпикс» зыфиIорэм ишъо­лъыр гупчэ яIэпыIэгъоу Лъэпкъ гупчэр ыкIи президент платформэу «Урысыер — амалышIухэр зыIэкIэлъ къэралыгъу» зыфиIорэ Iофтхьабзэр зэхащэ.
МэфэкI шIыкIэм тетэу олимпиадэр къызэIуахыгъ. Ащ къырагъэблэгъагъэх АР-м гъэсэныгъэмрэ шIэныгъэмрэкIэ иминистрэ иапэрэ гуадзэу Пэрэныкъо Сусанэ, цIыфхэм IофшIэн ягъэгъотыгъэнымкIэ федеральнэ къулыкъум и ГъэIорышIапIэу Адыгеим щыIэм ипащэу Галина Цыганковар, коммерцием емыпхыгъэ автономнэ организациехэм япащэхэу «Абилимпиксым» зэзэгъы­ныгъэ дыряIэу сэкъат­ныгъэ зиIэхэм IофшIапIэ языгъэгъотыхэрэр, нэ­мыкIхэри.
Хэбзэ къулыкъум илIыкIоу гущыIэ зэратыгъэхэм мы Iофтхьабзэм мэхьанэ ин зэриIэр къыхагъэщыгъ. Мыщ хэлажьэхэрэм сэнаущыгъэ ин зэра­хэлъыр ыкIи илъэс къэс ахэм гъэхъэгъэшIухэр зэ­ра­шIыхэрэр къаIуагъ. Гъэ­рекIо Москва щыкIогъэ Лъэпкъ чемпионатым Адыгеим икIыгъэ нэбгыритIу хэлэжьагъ, зэрифэшъуашэу ахэм зыкъагъэлъэгъуагъ.
Мы илъэсми гъэхъэгъэ­шIухэр ашIынхэу къафэлъэIуагъэх.
Джащ фэдэу Iофтхьа­бзэм хэлажьэхэрэм видео зэпхыныгъэмкIэ шIуфэс къарихыгъ Урысыем просвещениемкIэ иминистрэу Сергей Кравцовым. Илъэс къэс мыщ хэлажьэхэрэм япчъагъэ зэрэхахъорэр, щыIэныгъэм нахь щагъэфедэрэ сэнэхьатхэр сэ­къатныгъэ зиIэ ныбжьыкIэхэм къызэрэзыIэкIа­гъахьэрэр ащ къыIуагъ.
МэфэкI Iофтхьабзэм ыуж Iэнэ хъурае зэхащагъ, джащ фэдэу зэнэ­къокъум хэлажьэхэрэм яIофшIэнхэм афэгъэхьыгъэ къэгъэлъэгъон зэхащагъ, мастер-классхэр къагъэлъэгъуагъэх. Мыекъопэ индустриальнэ техникумым щыкIогъэ Iофтхьа­бзэм джащ фэдэу «Ярмарка вакансий» зыфи­Iорэр къыщызэIуахыгъ. ЗипсауныгъэкIэ илэгъухэм акIэмыхьэрэ ныбжьыкIэхэр IофшIэпIэ чIыпIэу щыIэхэм нэIуасэ афа­шIыгъэх.
«Абилимпикс» зыфиIорэ шъолъыр гупчэм ипащэу Быжь Заирэ къызэ­рэтиIуагъэмкIэ, лъэныкъо 18-кIэ зэтеутыгъэу зэнэ­къокъущтых. ДэнымкIэ, унэ гъэлэнымкIэ, пхъэм хэбзыкIыгъэнымкIэ, художественнэ дизайнымкIэ, текстым Iоф дэшIэгъэнымкIэ, нэмыкIхэмкIи ныб­жьыкIэхэм зыкъагъэлъэгъощт. Мы илъэсым апэрэу визажым епхыгъэ лъэныкъо кIэу къыхагъэхьагъ. Джащ фэдэу унэ гъэлэнымкIэ мыгъэ апэрэу хэушъхьафыкIыгъэ дзэ операцием иветеранхэу Эдуард Бараевыр ыкIи Игорь Гилевыр хэлажьэх.
Лъэныкъо пэпчъ текIоныгъэ къыщыдэзыхыгъэхэр агъэнэфэщтых, апэрэ чIыпIэ къэзыхьыгъэхэм нэужым Къыблэ Федеральнэ шъолъырым зы­къыщагъэлъэгъощт ыкIи ащ ащытекIохэрэр Москва щыкIощт Лъэпкъ чемпионатым хэлэжьэщтых.
ДЕЛЭКЪО Анет.