Адыгэ къэралыгъо университетымрэ Лъэпкъ ушэтэкIо университетэу «Экономикэм иап­шъэрэ еджапI» зыфиIорэм яшIэны­гъэлэжьхэмрэ бзэ­шIэныгъэм епхыгъэ IофшIэгъу дэ­кIыгъоу Адыгеим щызэхащагъэр ыкIэм фэкIуагъ.

Апшъэрэ еджапIэхэм язэдэлэжьэныгъэ къыды­хэлъытагъэу ар рекIо­кIыгъ.
Мэфибгъум къыкIоцI ахэр Кощхьаблэ ыкIи Шэу­джэн районхэм якъуа­джэ­хэу ХьакIэмзые, Еджэркъуае, Хьакурынэхьаблэ, Хьатыгъужъыкъуае, Пщыжъ­хьаблэ ащылэжьагъэх. Адыгабзэм ижэ­ры­Iуабзэ, ар лъэпкъым зэригъэфедэрэр, къуаджэ пэпчъ гущыIакIэу дэ­лъыр, янэшанэхэр агъэу­нэфы­гъэх.
ШIэныгъэлэжь купым ипащэу, Лъэпкъ ушэтэкIо университетэу «Экономикэм иапшъэрэ еджапI» зыфиIорэм идоцентэу Юрий Ландер Адыгэ къэралыгъо универститетым истудентхэр игъусэхэу къоджэдэсхэм гущыIэгъу афэхъугъэх, амакъэхэр тыратхагъэх.
— Адыгэбзэ жэрыIуа­бзэр тхыгъэн фае, анахьэу къуаджэ пэпчъ изэмылIэужыгъогъэ гущы­IакIэу дэлъыр. Чылэ пэпчъ къахэзыушъхьафыкIырэ гущыIэкIэ шъуашэ иI. Мыщ фэдэ бзэзэгъэшIэн дэ­кIыгъохэм яшIуагъэкIэ ар къэтыухъумэн тлъэкIыщт, — къыщаIуагъ Адыгэ къэ­ралыгъо университетым.
Джы, дэкIыгъо ужым, шIэныгъэлэжьхэм аугъоигъэ къэбархэр зэхафы­жьыщтых, шъхьадж игущыIакIэ къыхаушъхьафыкIыщт. Зэфэхьысыжьхэр нахь кIасэу шъхьэихыгъэ къашIыщтых.