Художественнэ гимнастикэмкIэ зэнэкъокъухэр Краснодар краим ипсэупIэу Абрау-Дюрсо щыкIуагъэх.

Турнирым хэлэжьагъэх ыкIи гъэхъэгъэшIухэр щашIыгъэх Тэ­хъутэмыкъое районым илIыкIохэм. Ахэм зэкIэмкIи медаль 11 къахьыгъ.
Iофтхьабзэу «Amore Cup» зыфиIорэр илъэс къэс зэхащэ. Краснодар краим, Къырым, Донецкэ Народнэ Республикэм, нэмыкI шъолъырхэм къарыкIыгъэ гимнасткэ 200-м ехъу мызыгъэгум зэнэкъокъугъэх.
Олимпийскэ резервым испорт еджапIэу Тэхъутэмыкъое районым щыIэм зыщызыгъасэхэрэм дэгъу дэдэу зыкъагъэлъэгъуагъ, анахьэу къахэщыгъэхэр 2013-рэ илъэсым къэхъугъэхэр ары. ТекIоныгъэр къыдахыгъ Пщыпый Самийя ыкIи Таисия Кириенкэм. ЯтIонэрэ чIыпIэр афагъэшъошагъ Аврора Хачко ыкIи Карина Апасовам. Джэрз медальхэр къахьыгъэх Мария Рудниченкэмрэ Анастасия Карпачрэ.

2017-рэ илъэсым къэхъугъэхэр пштэмэ, зэкIэми анахь лъэшы­гъэр Вероника Литвиновар ары. Ящэнэрэ чIыпIэр къылэжьыгъ Бэгугъэ Камилэ. 2016-рэ ыкIи 2015-рэ илъэсхэм къэхъугъэхэм язэнэкъокъухэм ящэнэрэ чIыпIэхэр къащыдахыгъ Пэнэшъу Дианэрэ Алиса Литвиновамрэ. Джащ фэдэу республикэм джыри зы медаль къыфихьыгъ турни­рым хэлэжьагъэхэм анахьыкIэу Сэхъутэ Кирэ, ар ятIонэрэ хъугъэ.