Адыгабзэр щызэрагъэшIэнэу рахъухьэ
Лъэпкъ культурэр, тарихъыр, шэн-хабзэхэр къэухъумэгъэнхэмкIэ ыкIи ахэм хэхъоныгъэ афэшIыгъэнымкIэ шъолъыр зэфэшъхьафхэм ащыпсэурэ адыгэхэм чанэу Iоф ашIэ. Анахьэу анаIэ зытырагъэтырэр ныдэлъфыбзэм изэгъэшIэн. А гухэлъым тегъэпсыхьагъэу къалэу Геленджик адыгабзэм изэгъэшIэнкIэ купхэр къыщызэIуахынхэу рахъухьагъ.
Геленджик щыпсэурэ адыгэхэм ацIэкIэ Пщыбэкъу Адам Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр зэIукIэгъоу дыриIагъэм ащ фэгъэхьыгъэу къыщиIуагъ. Ежь А. Шъхьэлахъом кIэлэеджакIохэм адыгабзэр зэрэзэрагъэшIэщт тхылъхэу а 1-рэ классым къыщыублагъэу я 8-рэ классым нэс къызфагъэфедэн алъэкIыщтхэр шIухьафтынэу аритыгъэх.
Комитетым къызэрэщаIуагъэмкIэ, зэIукIэгъум илъэхъан Геленджик щыпсэурэ адыгэхэм яамалхэм нахь ахэхъонымкIэ, адыгэхэм якультурэрэ ящыIэкIэ-псэукIэрэ япхыгъэ Iофтхьабзэхэм язэшIохынкIэ IэпыIэгъу зэрафэхъущтхэ Iофыгъо зэфэшъхьафхэм атегущыIагъэх. ГущыIэм пае, илъэсэу икIыгъэм Урыс географическэ обществэм иIэпыIэгъу хэлъэу Геленджик щыпхыращыгъ проектэу «Кавказская Атлантида» зыфиIорэр. Ащ телъытагъэу еджапIэхэм ачIэсхэр краеведхэм аIукIагъэх, адыгэ лъэпкъэу Геленджик щыпсэухэрэ натыхъуаехэм афэгъэхьыгъэу ахэм къафаIотагъ. Анапэ къыщегъэжьагъэу Пшъадэ кIэим нэс къызэлъызыубытырэ чIыпIэм ахэр щыпсэущтыгъэх.