«Адыгеим икIэлэегъэджэ анахь дэгъу» зыфиIорэ зэнэкъокъум ишъолъыр уцугъо мы мафэхэм аублагъ. Мыгъэ ар я 30-у зэхащэ.

А илъэс зэкIэлъыкIохэм къакIоцI зиIофшIэн хэшIыкIышхо фызиIэ кIэлэ­егъэджабэ мыщ хэлэжьагъ. Зэнэкъокъу закъоу щымытэу, хэлажьэхэрэм яшIэныгъэхэр къызэрагъэлъагъорэм дакIоу яIофшIэнкIэ лъэгэпIэ инхэм анэзыгъэсыщт лъэныкъохэр аIэкIэлъ мэхъу. Ар къаушыхьатыгъ илъэс зэфэшъхьафхэм зэнэкъокъум хэлэжьагъэхэу Iофтхьабзэм къеблэгъагъэхэм. Пэублэм къэгъэлъэгъон гъэшIэгъонхэр ахэм къашIыгъэх.
Iофтхьабзэр къызэIуихыгъ АР-м гъэсэныгъэмрэ шIэныгъэмрэкIэ иминистрэу, 2018-рэ илъэсым мы зэнэкъокъум текIоныгъэ къыщыдэзыхыгъэгъэ Евгений Лебедевым. КIэлэегъаджэхэм яIофшIэн­кIэ хэхъоныгъэхэр ашIынхэм, яшIэныгъэхэм ахагъэхъоным апае мыщ фэдэ зэнэкъокъухэм мэхьэнэ ин зэряIэр, ахэм яшIуагъэкIэ гъэсэныгъэм исистемэ хэхъо­ныгъэхэр зэришIыхэрэр къыхигъэщыгъ. Илъэс 30-м кIэлэегъэджэ пэрыт пчъагъэ зэрэхэлэжьагъэр къыIуагъ.
— КIэлэегъаджэхэм яшIэныгъэ къагъэлъэгъоныр, IэпэIэсэныгъэу аIэкIэлъымкIэ зэхъожьынхэр ары ыпэрапшIэу зэнэкъокъум пшъэрылъ шъхьаIэу иIэр. Гъэсэныгъэм Iоф щызышIэхэрэм сэнаущыгъэу ахэлъыр къызыщагъэлъэгъон алъэкIыщт зэнэкъокъу­бэ зэхэтэщэ. Сигуапэу къыхэз­гъэщымэ сшIоигъу кIэлэегъэджэ ныбжьыкIэхэм язэнэкъокъу хэлэжьагъэхэм ащыщхэр джы мыщ къызэрекIолIагъэхэр. Егъэ­джэным гъунапкъэ иIэп, тиIоф­шIэн къыхэхьэрэ шэпхъакIэхэм адедгъаштэзэ, ыпэкIэ тылъэ­кIуатэ. Гурыт еджапIэхэр, кIэлэцIыкIу IыгъыпIэхэр кIэу тэшIых, тэгъэкIэжьых, ящыкIэгъэ Iэмэ-псымэхэр гурыт еджапIэхэм ачIэтых. Ащ ишIуагъэкIэ кIэлэеджакIохэм ямызакъоу, кIэ­лэегъаджэхэми яшIэныгъэхэм ахагъахъо, — къыIуагъ Евгений Лебедевым.
«2025-рэ илъэсым икIэлэегъэджэ анахь дэгъу» зыфиIорэ зэнэкъокъум зыщызыушэтынэу къекIолIагъэхэм ягъэ­хъагъэхэм джыри ахагъэхъонэу, ыпэкIэ лъыкIотэнхэу, зэрифэшъуашэу зыкъагъэ­лъэгъонэу АР-м гъэсэныгъэмрэ шIэныгъэмрэкIэ иминистрэ иапэрэ гуадзэу Пэрэныкъо Сусанэ, Урысыем лъэпкъ гъэсэныгъэмкIэ ыкIи шIэныгъэмкIэ иIофы­шIэхэм я Адыгэ республикэ проф­союз организацие итхьаматэу Сергей Кошкиныр къафэлъэIуагъэх.
БлэкIыгъэ илъэсхэм «Адыгеим икIэлэегъэджэ анахь дэгъу» зыфиIорэ зэ­нэкъокъум текIоныгъэ къыщыдэзыхыгъэ­хэр зыхэхьэрэ республикэ клубым илIыкIохэр Iофтхьабзэм къекIолIагъэхэм шIуфэс къарахыгъ ыкIи гъэхъагъэхэр ашIынхэу къафэлъэIуагъэх.
Республикэм ирайонхэм ыкIи икъа­лэхэм текIоныгъэр къащыдэзыхыгъэ нэбгырэ 18 мы илъэсым зэнэкъокъум хэлажьэ. КIэлэегъаджэхэм апэрэ ушэтыныр аублагъ, «Здравствуйте, это я!» зыфиIорэ лъэныкъом зыщаушэтыгъ. Зэнэкъокъум къыдыхэлъытагъэу егъэджэн сыхьат, джащ фэдэу «КIэлэегъэджэ интервью» къатыщт, ащ пхырыкIыгъэ нэбгыри 10-м яIофшIэн зэрэзэхащэрэм фэгъэхьыгъэ мастер-класс къагъэлъэ­гъощт, анахь дэгъуитфымэ «Брифинг» ыкIи «Блицтурнир» зыфиIорэ лъэныкъом­кIэ зыкъагъэлъэгъощт. ЖъоныгъуакIэм и 5-м анахь дэгъоу зыкъэзыгъэлъэгъуагъэ­хэр къыхахыщтых, текIоныгъэ къыдэзы­хырэр Урысые зэнэкъокъум хэлэжьэщт.
ДЕЛЭКЪО Анет.
Сурэтыр авторым ий.