ИлъэсыкIэ еджэгъум ехъулIэу Мыекъуапэ дэт гурыт еджапIэхэм джыри къахэхъощт. Лъэпкъ проектэу «Гъэсэныгъэм» ишIуагъэкIэ Мыекъуапэ ирайонэу Михайловым къатищэу зэтет еджапIэ щагъэпсыгъ, непэрэ мафэм ащ ишIын аухыгъэу ищыкIэгъэ Iэмэ-псымэхэр къащэх, классхэм ачIагъэуцох, зэIухыжьын IофшIэнхэр аублагъэх.

Гъэтхапэм къыщегъэжьагъэу Ольга Романенкэр а еджапIэм ипащ. Ащ къы­зэриIуагъэмкIэ, мы чIыпIэм еджэпIакIэ ищыкIэгъагъ ыкIи лъэшэу ежэщтыгъэх. Аужырэ шапхъэхэм адиштэрэ еджапIэм нэбгырэ 1100-рэ чIэфэнэу зэтегъэ­псыхьагъ. ЗэкIэмкIи класс 44-рэ хэт. ЕджэпIакIэм иапэрэ класс зикIэлэцIыкIу езыты зышIоигъо нэбгырэ 46-мэ ятхылъхэр къахьыгъэх. ЗэкIэмкIи классиплI аштэнэу агъэнафэ. НэмыкI кIэлэеджа­кIохэм ятхылъхэр илъэс еджэгъур заухыкIэ аштэнхэу аублэщт. КIэлэегъа­джэу Iоф зышIэщтхэм ясписки агъэ­нафэ.
— Урысые Федерацием ПросвещениемкIэ и Министерствэ къы­гъэнэфэгъэ шапхъэхэм атетэу еджапIэр шIыгъэ. Гупсэфэу зэрэгъэпсыгъэм къыхэкIыкIэ пэублэ классхэм ащеджэхэрэмрэ нахьыжъхэмрэ зэнэсыщтхэп, тIоу гощыгъэщтых ыкIи шъхьадж ищыкIэгъэщт кабинетхэр хэтых. КъэIогъэн фае, шэпхъакIэхэм къызэрэдалъы­тэрэмкIэ, егъэджэн сыхьатхэр зыщыкIощт классхэр зэрэзэтегъэпсыхьагъэхэм фэдэу гъэсэныгъэ тедзэ ягъэгъотыгъэнми мэхьанэ ин ратыгъ, Iэмэ-псымэ дэгъухэр къащэх, — еIо тигущыIэгъу.

ЕджапIэм ишIын фэгъэхьыгъэ тхы­лъыр 2022-рэ илъэсым тыгъэгъазэм хьазыр хъугъэ ыкIи 2023-рэ илъэсым аублагъ. Федеральнэ бюджетым къыхэхыгъэ сомэ миллиардрэ миллион 285-рэ еджапIэм ишIын тефагъ, аужырэ шапхъэхэм адиштэрэ Iэмэ-псымэхэм миллион 220-рэ апэIуагъэхьагъ.
ЕджапIэм ипащэ классхэр къытигъэлъэгъугъэх, партэхэр зычIагъэуцогъа­хэхэр ахэтых, класс пэпчъ интерактивнэ модульхэр ачIэтых. Физикэм, химием, информатикэм хэушъхьафыкIыгъэ кабинетхэр афыхахыгъэх, ахэм ачIэтыщтхэр къафащэнхэу ежэх. Джащ фэдэу тэ тызэкIо мафэм гъэсэныгъэ тедзэ ягъэгъотыгъэным епхыгъэ кабинетхэм ачIэтыщтхэр къащагъэхэу агъэуцущтыгъэх.
Апэрэ классхэм афытегъэпсыхьэгъэ классиплIыр анахь иных, зыщеджэщтхэм анэмыкIэу зыщыджэгущтхэ чIыпIи къыдыхэлъытагъ. Корпус пэпчъ медицинэ кабинет зэтегъэпсыхьагъэхэр, спортзал­хэм анэмыкIэу тренажернэ залхэр ахэ­тых. Джащ фэдэу зызыщагъэпсэ­фыщтыр, зыщыджэгущтхэр къыдыхэлъытагъэх. Пэублэ классхэр ыкIи нахьыжъхэр зыщышхэщтхэ чIыпIэхэр, Iофтхьэбзэ игъэ­кIотыгъэхэр зыщызэхащэщтхэр шъхьафэу яIэщтых. Джащ фэдэу кIэлэегъэджэ-психологым кабинет шъхьаф иI, ащ нэмыкIэу психологическэ IэпыIэгъу зищыкIагъэхэм апайи кабинет шъхьаф къыдыхэ­лъытагъ. Творчествэм ылъэныкъокIи кIэлэеджакIохэм Iоф адэшIэгъэным иамалхэри яIэх: къэшъокIэ зэфэшъхьаф­хэр зыщарагъэшIэщт кабинетри агъэ­псыгъ, джащ фэдэу театрэм фэгъэ­хьы­гъэуи кружок яIэнэу агъэнафэ.

Предмет пэпчъкIэ ящыкIэгъэщтыр еджэпIакIэм зэриIэщтыр пащэм къыхигъэщыгъ. ГущыIэм пае, трудым фэгъэ­хьыгъэ егъэджэн сыхьатхэм пшъэшъэ­жъыехэм дакIэ зыщарагъэшIэщт классхэм зэрыдэхэрэ машинкэхэр ачIэтыщтых, джащ фэдэу пщэрыхьакIэ арагъэшIэным тегъэпсыгъэуи ашIыщт.
ЗипсауныгъэкIэ илэгъухэм акIэмы­хьэхэрэри мыщ щеджэнхэ амал яIэщт, ащ фытегъэпсыхьагъэу ар агъэпсыгъ.

ЕджэпIакIэм пэмычыжьэу щыт гурыт еджапIэу N 17-м игъэкIотыгъэ гъэцэкIэжьынхэр щашIынхэу аублагъ. Ащ щеджэхэрэр мыщ къэкIонхэу джырэкIэ зэтырагъэпсыхьэ. Мэлылъфэгъу мазэм еджапIэм икIэлэеджакIохэм апае егъэ­джэн программэм къыдыхэмылъытэгъэ сыхьатхэр афызэхащэщтых. Ахэр шIэныгъэм, патриотическэ пIуныгъэм, спортым ыкIи культурэм афэгъэхьыгъэ­щтых.
ЕджэпIакIэм ыкIоцI зэрэзэтырагъэ­псыхьэрэм имызакъоу, щагури аужырэ шапхъэхэм адиштэу агъэпсы. КIэлэеджа­кIохэм япсауныгъэ псыхьэгъэным мэхьанэшхо раты, спорт лъэпкъ зэфэ­шъхьафхэм афытегъэпсыхьэгъэ площадкэхэм ямызакъоу, тренажерхэри щагум дэтых.
ДЕЛЭКЪО Анет.
Сурэтхэр: Iэшъынэ Аслъан.