«УФ-м транспортымкIэ изаслуженнэ IофышI» зыфиIорэ щытхъуцIэр къыфагъэшъошагъ гъогу-псэолъэшI ГъэIорышIапIэу N 3-м, ар Мыекъуап зыдэтыр, иоператорэу Алексей Сличнэм. Мы мафэхэм «Адыгэ макъэр» ащ гущыIэгъу фэхъугъ.

IофшIэпIэ чIыпIэм тыщыIу­кIагъ. Алексей компьютерым кIэлъырысэу гъогухэм атыралъхьэрэ асфальт-бетон зэхэгъэ­кIухьагъэр къэзышIырэ систе­мэшхом лъэплъэ. Ащ къызэ­рэтфиIотагъэмкIэ, шапхъэу зэ­рэзэ­халъхьащтыр лабораторием къегъэнафэшъ къареты, ащ ди­штэу зэхэлъхьэгъэным ежь ынаIэ тет. Асфальт-бетон зэхэ­лъым материалэу халъхьэрэ пэпчъ ибагъи, имэкIагъи, процентхэмкIэ зэрэзэтефэн фаери гъэцэкIэгъэныр ащ ыIэ илъ.
КIэлэ къызэрыкIоу, макIэу гущыIэу, ащ фэдэ тынышхо къызэрэфагъэшъошагъэм рызы­шIомышIыжьэу, укIытэзэ къэ­гущыIэрэм ащ фэдэ пшъэдэ­кIыжь ехьыми апэрэмкIэ къэп­шIэщтэп. IофшIэн хьылъэ зэрэ­фэгъэзагъэр къэошIэ чIыпIэу зы­дэщысым ущылъыплъэмэ. Компьютерэу зыкIэлъырысым хъытыум фэдэу зэхэлъэшъогъэ схемэу, цифрэ зэфэшъхьафыбэу итыр зэхэпфыныр къызэ­рыкIоу зэрэщымытыр нафэ. Ащ нэмыкI оборудовании ыпашъхьэ ит. Тэ къыддэгущыIэ, ынэIу къыт­фэгъэзагъэ фэд, ау нэ лъэ­ны­къокIэ компьютерым къыгъэ­лъагъорэм лъэплъэ.
— ГущыIэм пае, асфальт тонн 70 — 80 зэхэшIыхьэгъэн фаемэ, ащ хэлъ материалхэм ащыщ ишапхъэ зыуукъокIэ зэкIэ зэрэщытэу бгъэкIодыгъэу мэхъу. Ар уахътэ, ахъщэ… Арышъ, унэ теплъэхъукIы хъущтэп, — еIо Алексей.
Шъыпкъэ, изакъоп, нэбгыритIоу а IофшIэныр зэдагъэцакIэ, зыр тэджыгъэми, адрэр къыIунэн фае. Евгений Железняковыр игъус. ГъэрекIо ар АР-м транспортымкIэ изаслуженнэ IофышIэ хъугъэ. Iофэу агъэцакIэрэм зыфагъэсэнэу 2002-рэ илъэсым IэкIыб къэралыгъом агъэкIогъагъэх. Къыще­джэхи, ушэтынхэр къызэпа­чыхи, дипломхэр аIэкIэлъхэу къагъэзэжьыгъагъ.
КъыздэкIожьыгъэхэм шIэныгъакIэу зэрагъэгъотыгъэр зэрагъэфедэшъурэм зынаIэ тетын, зыгорэ ащыгъупшагъэмэ зэуп­чIыжьынхэ щыряIагъэп. Арэущтэу щытми зыкъырагъэгъэщтагъэп. Инженерэу зыгъэсагъэхэм зэкIэ дэгъу дэдэу зэхэугуфыкIыгъэу къызэрафиIуатэщтыгъэм, яеджэн лъэшэу ыуж зэритыгъэм, теурыкIуагъэ къахафэу къызэрафимыдэщтыгъэм яшIуа­гъэ къэкIожьыгъэу ары къызэраIуагъэр.
Алексей къызэриIуагъэмкIэ, илъэс 25-м ехъугъэу мы хъыз­мэтшIапIэм Iут. Мыекъуапэ къы­щыхъугъ, щапIугъ, къулыкъу ужым къыгъэзэжьи иIофшIэн мыщ щыригъэжьэгъагъ. Оборудование гъэшIэгъонэу джы щы­Iэхэм афэдэ ямыIэу, зэпстэур IэкIэ зыщашIэщтыгъэм къыхиубытагъ.
— Джащыгъум, шъыпкъэ, къиныгъэ, пкIуачIэ хаплъхьэщтыгъ, ау тыныбжьыкIэти къыд­гурыIощтыгъэп, нычэпэ зыд­гъэпсэфымэ зыпари тымышIэгъахэм фэдэу ятIонэрэ мафэм тыкъакIощтыгъ. Ащ езгъапшэмэ, непэ Iофэу сшIэрэр къинэу слъытэрэп. ПшъэдэкIыжьышхо пылъ, унэ тебгъэплъэхъукIы е ухэукъо хъущтэп, ау IофшIэн къин пIоныр тэрэзэп, — еIо мастерым.
КъыгъэшIагъэм ызыныкъу пIоми хъунэу зыIут хъызмэтшIапIэм, Iофэу ыгъэцакIэрэм анэмыкI ищыIэныгъэ къыхэхьагъэу ынэгу къыкIигъэуцошъурэп. ИлъэсыбэкIэ узэкIэIэбэжьмэ IофшIэпIэ чIыпIэ иIэным пае къэкIогъагъэнкIи хъун, ау непэ Iузгъэтырэр нэмыкI. Iофэу ыгъэ­цакIэрэм апэ есагъ, етIанэ шIу ылъэгъугъ, ыгукIи ыпсэкIи фэщагъ. Ар ежьыми къыкIегъэтхъы.
Ипшъэрылъхэр зэригъэцакIэ­хэрэм, теурыкIуагъэ зэрэхэмы­лъым, ипащэхэр къызэрэфэра­зэхэм яшыхьат мызэу, мытIоу тынхэмкIэ къызэрэхагъэщыгъэр. Щытхъу ыкIи рэзэныгъэ тхы­лъэу иIэхэм анэмыкIэу ар АР-м транспортымкIэ изаслуженнэ IофышI. Ахэми джы къыраты­гъэми лъэ­шэу зэрарыгушхорэр къыхе­гъэщы. АхэмкIэ Iофэу ышIэрэм осэ ин къыфашIыгъэу елъытэ. КъыкIэхъухьагъэхэм, Алексейрэ ишъхьэгъусэрэ сабыищ зэдапIу, нэпэеплъэу къы­зэрафэнэжьыщтым мэхьанэ реты.
— ТиIофшIапIэ игъом укъэмыкIоу, зэрищыкIагъэм фэдизрэ ущымыIэу, узщыфаем укъыда­хьэу е удэкIыжьэу къыщыпфадэщтэп. Уахътэм зы такъикъкIэ удэмыхэу удэкIон фае. Пхъашэх типащэхэр, шъыпкъэу пIощтмэ, ау сыдигъокIи яIофышIэхэм анаIэ атет. ГумэкIыгъо зиIэм ишIуагъэ рагъэкIы, лэжьапкIэмкIэ къытэгугъух, тын зэфэшъхьафхэмкIэ зэкIэри къыхагъэщынхэм пылъых. А зэпстэумэ кIуачIэ къыуаты. IофышIэ къызэрыкIоу Урысые тын къыпфагъэшъошэным мэхьанэшхо иI. Къэралыгъом уасэ къызэрэпфишIырэр ащ къеушыхьаты. Арышъ, сызгъэлъэгъогъэ сипащэхэми, къысфэзгъэшъошагъэ­хэми «тхьашъуегъэпсэу» яс­Iомэ сшIоигъу, — еIо Алексей Сличнэм.
Тынэу къыратыгъэм пае тэри тыфэгушIуагъ, псауныгъэ пытэрэ щыIэкIэшIурэ иIэнхэу ты­фэлъэIуагъ.
ХЪУТ Нэфсэт.