Сэнэхьат ухьазырыныгъэмкIэ шъо­лъыр программэу «Адыгеим и ЛIы­хъужъхэр» зыфиIо­рэм иятIонэрэ едзы­гъо ыкIэм фэкIуагъ.

Къэралыгъо гъэIорышIэным ыкIи общественнэ IофшIэным алъэныкъокIэ хэхъоныгъэ зышIы зышIоигъо ветеран ыкIи дзэ­къулыкъушIи 150-мэ проектым хэлэжьэнхэмкIэ лъэIу тхылъхэр къаты-
гъэх.
Шъолъыр программэм иобщественнэ совет къызэритыгъэмкIэ, программэр платформэу «Урысыер амалышIухэр зыIэкIэлъ къэралыгъу» зыфиIорэм зыщызытхыгъэхэр ыкIи эссе къыщыхэзыутыгъэхэр уплъэкIунхэм рагъэкIолIагъэх. Ушъхьагъу зэфэшъхьафхэм апкъ къикIыкIэ, едзыгъо шъхьаIэр зыкIун зымылъэкIыгъэхэм апае уплъэкIун тедзэ мэлылъфэгъум и 22 — 25-м афызэхащэщт. А пIалъэм къыхиубытэу ар зымыкIушъущтхэм резервым зыхатхэным пае мэлылъфэгъум и 14-р къэмысызэ, яунэе кабинет иамалкIэ лъэIу атхын фае.
Программэм иящэнэрэ едзыгъом аштэщт еджа­кIохэм яспискэ бэдзэ­огъум и 1-м нэс зэхагъэу­цощт, егъэджэныр Iоны­гъом и 1-м рагъэжьэщт.
— УФ-м и Президентэу Владимир Путиным къахилъхьэгъэ федеральнэ программэу «ЛIыхъужъхэм яуахът» зыфиIорэр гъэ­рекIо щегъэжьагъэу агъэцакIэ. ИкIыгъэ илъэсым ащ нэбгырэ мин 44-м ехъумэ, мыгъэ мин 27-рэ фэдизмэ зыщатхыгъ. Ащ мэхьанэу иIэм зыкъызэриIэтырэм епхыгъэу къэралыгъом ипащэ пшъэ­рылъ къыгъэуцугъ шъо­лъырхэри ащ фэдэ проектым игъэцэкIэн фежьэнхэу. Ащ къыдыхэлъыта­гъэу, АР-м и ЛIышъхьэу КъумпIыл Мурат иунашъо­кIэ шъолъыр программэу «Адыгеим и ЛIыхъужъхэр» зыфиIорэм ипхырыщын тыфежьагъ. Мы программэр зытегъэпсыхьагъэр хэушъхьафыкIыгъэ дзэ операцием хэлэжьагъэхэр нэужкIэ къэралыгъо ыкIи муниципальнэ хэбзэ къулыкъухэм, къэралыгъо компаниехэм IэпэIэсэныгъэ, къулайныгъэ ахэлъэу Iоф ащашIэным фэгъэхьазырыгъэнхэр ары. Нэбгыри 150-рэ фэдиз шъолъыр программэм къыхэлажьэх, анахь дэгъухэр республи­кэм иIофышIэхэм ярезерв хагъэхьащтых, — къы­Iуагъ программэм ипхырыщын фэгъэзагъэу, чIы­пIэ зыгъэIорышIэ­жьынымкIэ къулыкъухэм адэ­лажьэрэм и Комитет итхьаматэу КIэдыкIое Руслъан.