Урысые Iофтхьабзэу «ЩыIэныгъэм имашIо» тыгъуасэ Мыекъуапэ щырагъэжьагъ. Мыр апэрэ чIыпIэ хъугъэ, нэ­ужым ащ Урысыем ­икъэ­лэ 97-рэ зэрипхыщт.

Iофтхьабзэр зыщылъагъэкIо­тэщтхэм ащыщых Луганскэ ыкIи Донецкэ народнэ республикэ­хэри, шэкIогъу мазэм ар Москва щаухыщт. Мыщ икIэщакIор федеральнэ медикэ-биологическэ агентствэр, социальнэ гукъэкI­хэмкIэ фондэу «ЩыIэныгъэм имашIу» ыкIи шIушIэ фондэу «Импакт» зыфиIохэрэр.
Iофтхьабзэм ипшъэрылъыр къупшъхьэ куцIыр зытын зылъэ­кIыщт донорхэр Федеральнэ регистрэм хэгъэхьагъэнхэр ыкIи зилъ зэIыхьэгъэ сымаджэхэм, нэмыкI уз хьылъэхэр зиIэхэм ящыIэныгъэ къызэтегъэнэгъэныр ары.
Мыекъуапэ изыгъэпсэфыпIэ парк «ЩыIэныгъэм имашIо» щыхэзгъэнагъэхэм ыкIи ар километритIу фэдизрэ къезы­хьа­кIыгъэхэм ащыщых къупшъхьэ кIуцIыр зытын зылъэкIыщт Фе­деральнэ регистрэм и амбассадорэу, плIэгъогогъо дунаим ирекордсмен хъугъэ Артем Алискеровыр, Адыгэ республикэ спорт еджапIэу N 2-м ипащэу, Урысыем, Адыгеим язаслуженнэ тренерэу Хъот Юныс, лъыр зыщахащырэ Адыгэ республикэ станцием иврач шъхьаIэу ЦуукI Малыч, нэмыкIхэр.
Iофтхьабзэр пэублэ гущыIэкIэ къызэIуихыгъ АР-м псауныгъэр къэухъумэгъэнымкIэ ими­нистрэ игуадзэу Максим Коробко.
— ЦIыфыбэхэм ящыIэны­гъэкIэ мэхьанэ зиIэ Iофыгъоу мыр щыт. Нэбгырэ пэпчъ ежь генетическэ тIуазэ мы дунаим щыриI, ау ар къэбгъотыныр амал минипшIым яз. Урысыем нэбгырэ миллиони 140-рэ фэдиз щэпсэумэ, ныбжь зиIэ пэпчъ ибиоматериал зитыкIэ, щыIэ­ныгъабэ къызэтенэщт. Непэ Адыгеим щыхагъэнэгъэ машIом тигуфэбагъэ зэхишIэнышъ, уз хьылъэ зиIэхэм IэпыIэгъу та­фэхъуным сыщэгугъы. Зэхэща­кIохэм «тхьашъуегъэпсэу» ятэIо, — къыIуагъ Максим Коробко.
ЗэхэщакIохэм къакIухьащт къэлэ 97-мэ лъыр тыгъэнымкIэ Iофтхьабзэхэр, лекциехэр, зэ­Iу­кIэгъухэр ащырагъэкIокIыщтых. Анахь шъхьаIэу ахэм анаIэ зы­тырагъэтыщтыр къупшъхьэ куцIыр тыгъэным фэгъэхьыгъэ къэбар нэпцIэу къекIокIыхэрэр щыгъэзыегъэнхэр ыкIи ащ итын нахь цIыфыбэ хэщэгъэныр ары. Непэ ехъулIэу Федеральнэ регистрэм къупшъхьэ кIуцIыр зы­тырэ нэбгырэ мин 450-м ехъу хэт, ау ар макIэ. Зы нэбгырэ ащ къыхахъо къэс, джыри зы щыIэныгъэ къызэтенэн ылъэ­кIыщт.
Артем Алискеровыр Iофтхьабзэм икIэщакIохэм ащыщ. Ежь донор хъун ымылъэкIыщтми, а Iофым мэхьанэу иIэр цIыфыбэхэм зэлъаригъэшIэным мы­пшъыжьэу ыуж ит.
— Псышъолъынтфэ лъыхэкI адэ уз (лимфобластный лейкоз) сиIагъ. Химиотерапие 31-мэ псаоу сыкъялыжьыгъ, арышъ, донор сыхъущтэп. Сымэджэщым сычIэлъыфэ IэпыIэгъу зы­фэмыхъушъугъэхэ нэбгырабэхэм ядунай зэрахъожьыгъэр синэ­рылъэгъугъ. 2021-рэ илъэсым Iэзэн Iофтхьабзэхэр зысэухым, ащ фэдэ сымаджэхэм IэпыIэгъу сызэрафэхъущтым сегупшысагъ ыкIи проектыбэхэм япхырыщын сыдэлэжьэнэу езгъэжьагъ. ГущыIэм пае, икIыгъэ илъэсым марафон 71-мэ сызахэлажьэм къупшъхьэ куцIым идонор мин 30 фэдиз къэдгъотыгъ, ахэм ащыщэу мин 16-м зэпхыныгъэ адытиI, сымаджэхэм яшIуагъэ арагъэкIы. Адэ уз къызхагъэщыгъэхэм ящыIэныгъэ ащ къызэрэщымыуцурэр, гугъэ ыкIи зэхэшIыкI яIэным, гухэлъ зыфа­гъэуцужьынышъ, акIуачIэ къы­хьыщтыр зэрэгъунэнчъэр агурызгъэIоным ыуж сит. Сызпылъ Iофыр — сищыIэныгъэ имэхьан, — хигъэунэфыкIыгъ Артем Алискеровым.
— Iофтхьабзэм сыхэлэжьэнэу зыкIисхъухьагъэр мыщ фэдэ уз хьылъэ зиIэ цIыфхэм IэпыIэгъу сафэхъуным ыкIи ныбжьыкIэхэм щысэшIу язгъэлъэгъуным пай. Ащ фэшI пчъагъэрэ лъыр стыгъэ. Уизакъоу дэгъоу ущыIэмэ зэримыкъурэр зэхязгъэшIыкIы сшIоигъу. Дунаим тет цIыфхэр узэдеIэжьхэмэ гушIуагъор къы­тэбэкIэу тыщыIэщт, — къыхигъэщыгъ Хъот Юныс.
Лъыр зыщаштэрэ кощырэ стан­циер паркым идэхьагъу Iутыгъ, шIоигъоныгъэ зиIэ пстэури ащ екIолIагъ. Ащ Iофтхьабзэр зэрэрагъэкIокIыгъэм зэхэщакIохэр рыразэхэу гъогу те­хьа­жьыгъэх, КъокIыпIэ Чыжьэм фаузэнкIыгъ.
Iэшъынэ Сусан.