Дунэе гъэсэныгъэ Iофтхьабзэу «Тотальный диктант» зыфи­Iорэм, хабзэ зэрэхъугъэу, Адыге­ир чанэу хэлэжьагъ. Мэлылъфэгъум и 5-м Мыекъуапэ, Адыгэ­къалэ ыкIи къуаджэу Хьалъэ­къуае ар щатхыгъ.

Мыгъэ урыс тхакIоу, сценаристэу, журналистэу телерадиокъэтынхэм язещакIоу Марина Москвинам итекст ­аштагъэр. Очнэ шIыкIэм тетэу нэбгыри 149-рэ Iофтхьабзэм хэлэжьагъ. ЗэкIэмкIи Мыекъуапэ чIыпIи 5-мэ защаушэтыгъ. Адыгэ къэралыгъо университетым шIэныгъэхэмкIэ ыкIи инновациехэмкIэ Паркыр ары чIыпIэ шъхьаIэу иIагъэр. «2024-рэ илъэсым икIэлэегъэджэ анахь дэгъу» зыфиIорэ цIэр къызыфагъэшъошэ­гъэ Светлана Великовоир текстым къе­джагъ. IэкIыб къэралыгъохэм къа­рыкIыгъэ нэбгырэ 45-мэ заушэтыгъ. Уры­сыбзэр IэкIыб къэралыгъуабзэу зы­щызэрагъэшIэ­рэ кафедрэм ипащэу, фило­логие шIэныгъэхэмкIэ кандидатэу Хъуажъ За­мирэ IофшIэныр аригъэцэкIагъ. Джащ фэдэу анахь агу рихьэу зэкIуалIэхэрэм ащыщ «Шварц и Унэ». ТхэкIо ыкIи дра­матург цIэрыIом ипхъо­рэлъфэу Мария Крыжановскаяр текстым къеджагъ.
КъэIогъэн фае, мы аужырэ илъэси 7-м Адыгэкъалэ Iофтхьабзэм зэрэхэла­жьэрэр. Мы илъэсым апэрэу адыгабзэкIи заушэтын амал яIагъ. УрысыбзэкIэ текст шъхьаIэр затхым ыуж такъикъ токIыкIэ МэщбэшIэ Исхьакъ ироманэу «Бзыикъо зау» зыфиIорэм къыхэхыгъэ пычыгъо нэбгыри 9-мэ атхыгъ. Адыгэкъалэ диктантыр урысыбзэкIэ нэбгырэ 22-мэ щатхыгъ, ахэм ащыщэу 7-р Краснодар къикIыгъэх. Iофтхьабзэр модельнэ тхылъеджапIэм щыкIуагъ, текстым къеджагъ блогерэу, телезещакIоу, журналистэу Беданэкъо Замирэ.
ГъэрекIо къащегъэжьагъэу Хьалъэ­къуае дэт гурыт еджапIэу N 4-ми диктантыр щатхы. Мыгъэ нэбгырэ 21-мэ заушэтыгъ, 10-мэ адыгабзэкIэ атхыгъ. Текстым къеджагъ гъэзетэу «Единство» зыфиIорэм ижурналистэу Устэкъо Маргаритэ.
Диктантхэр зыуплъэкIурэ комиссием IофшIэныр ыублагъ, мэлылъфэгъум и 15-м «Тотальнэ диктантым» исайт зэ­фэ­хьысыжьхэр къырагъэхьащтых. Ар дэгъоу зытхыгъэхэр агъэшIощтых.
ДЕЛЭКЪО Анет.