ГъэпцIакIохэм шъуафэсакъ!
Телефон гъэпцIакIохэм Урысыер зэрэзэлъаштагъэр непэ анахь гумэкIыгъо шъхьаIэхэм ащыщ ыкIи ахэм шIыкIэу къаугупшысыхэрэр зэпымыоу зэблахъу.
КъэбарлъыгъэIэс амалэу ТАСС-м къызэритыгъэмкIэ, гъэпцIакIохэм цIыфхэм ахъщэ аIахыным пае джы QR-кодхэр агъэфедэхэу аублагъ. Ахэр къатыбэу зэтет унэхэм ячIэхьагъухэм ыкIи нэмыкI общественнэ чIыпIэхэм мэкъэгъэIу фэдэу атырагъапкIэх. А къэбарыр къафэзыIотагъэр Урысыем хэгъэгу кIоцI IофхэмкIэ и Министерствэ къэбар-коммуникационнэ технологиехэр хэбзэнчъэу гъэфедэгъэным пэшIуекIорэ гъэIорышIапIэр ары.
КъызэрэхагъэщырэмкIэ, нэпцI QR-кодхэр загъэфедэхэрэм яахъщэ ыкIи якъэбархэр гъэпцIакIохэм аIэкIахьан ылъэкIыщт.
Джащ фэдэу агъэунэфыгъэхэм ащыщ, коммунальнэ фэIо-фашIэхэм яквитанцие нэпцIхэм ащ фэдэ кодхэр атетхэу къызэрэрагощэкIыхэрэр. Ащ зытебгъапсэкIэ ахъщэр гъэпцIакIохэм ясчет макIо.
ХэбзэухъумакIохэм джыри зэ цIыфхэм зафагъазэ сакъыныгъэ къызхагъэфэнэу. Электроннэ тхыгъэу къышъуфакIохэрэм цыхьэ афэшъумышI, зыщыщ шъумышIэхэрэм шъуидокументхэм арытхагъэхэр яшъумыIох, шъумыуплъэкIугъэ къэбар къэкIуапIэхэм яссылкэхэр къызэIушъумых!