«Щыгъыным уахещэ, акъылым уакъыхещыжьы» — аIо адыгэхэм. Адыгэ шъуашэр лъэгъупхъэ ыкIи зыщыгъыр егъэгупсэфы.

МэщбэшIэ Исхьакъ

Адыгэ цый

Адыгэ цыеу цые къопэфыр
Осы нэгуфым фэдэу уфыжь,
Джыгыты кIалэу кIэлэкIэ чэфыр
Гушхоу рызепщэу ылъы ущыщ.

Бзыу тэмапэу, лъатэу, быбатэу
Шыгъэчъэ плъырмэ ренэу уахэт,
Дахэм идахэу оркIэ рытIуатэу
Жьы псынкIи, машIуи — тIуми уафэд.

Типшъэшъэ гуахьмэ нэфылъэ шэплъым
УтфыхабзыкIышъ пшысэу утфады.
Хьазыр пшIыкIутIоу бгъэгупэм хэлъым
Тхыдэбэ Iаджи тарихъым щаты.

КIэлэцIыкIухэм апае адыгабзэкIи урысыбзэкIи тхыгъэхэр къыздэхьэгъэхэ тхылъхэу «Домик для дождя», «Адыгабзэм фэIазэр» зыфиIохэрэр зытхыгъэр усакIоу, тхакIоу Къуекъо Налбый. Ахэр зэгъэшIэгъошIух, гъэшIэгъоных ыкIи цIыкIуи ини зэфэдэу псынкIэу апкъырэхьэх.

Адыгабзэр

Адыгабзэр
Огу нэфынэу къабзэ,
Насып нэгоу дахэ,
Осы гъогоу махэ,
КIэлэ джэгоу чэфы,
Пщэсы лъэгоу шъэфы,
Сабый ибэу хые,
Щылыч Iашэу пкъые.

Уиныбджэгъумэ, псашIэ,
Уиджэгъогъумэ щашIэ.
Гъэбэжъу мафэу къерэщх,
Шыблэ макъэу орэщх –
Сэ сиощх, сищхы макъ,
Сэ сигъашI, сыбзэ закъу.
СыщыгъаI, сыгъэпсалъ,
УщэIэфэ сипIалъ.