Адыгэ пшыс

Зы бай еджагъэ горэ чылэм дэсыгъ, гъэкIэрэкIэгъэ зэпытэу, зыхиIэтыкIэу, мыскъэлэ шIылэу, ежь фэдэ щымыIэу къыщыхъоу. Къо­джэдэсхэм ар агу рихьыщтыгъэп. Мафэ горэм псыхъор къиугъэу ащ имыкI мыхъунэу хъугъэ ыкIи къошъофым елъэIугъ, псым зэпыридзынэу.
— Адэ дэгъуба! – къешIугъ къошъофыр.
Еджагъэр къуашъом итIыс­хьагъ, псыгум ихьагъэхэу еджагъэр къошъофым еупчIыгъ:
— Тыдэ ущеджагъа?
— ЕгъашIэм седжагъэп, еджа­кIи сшIэрэп!
— Ащыгъум сыд уищыI, къошъофыкIэ нахь умышIэу дунаим утеткIэ!
— Ары сэ зишIыкIэ сшIэрэр, сиIофи сытеукIытыхьэрэп.
— Ар укIытагъо, сикъош, лIыгъэ хъуна къуашъор офышъукIэ, ащ нахь шIэныгъэ уимыIэу дунаим утетыныр!
Къошъофыр къэгубжи, къуа­шъом жьыхьарзэм фэдэу зы­къы­ригъэгъэчъэкIи, къыгъэчэрэгъуи, еджагъэу есыкIэ зымы­шIэрэр псым хигъэфагъ, ежь къошъо зэпырыгъэзагъэм ыкIыIу дэкIо­ежьи, къашъоу теуцуагъ. Еджагъэр псым ныкъотхьалэ ышIыгъэу къуашъом къыдилъэшъоежьи, еупчIыгъ:
— ШIэныгъэ сиIэба?
— О шIэныгъэу уиIэр абасэ ыуасэп, псым себгъэтхьалэ пэтыгъ, — ыIуи къецIацIэу фе­жьагъ.
— ШIэныгъэ симыIэмэ къэозгъэшIэн! – ыIуи, къошъофым джыри еджагъэр псым хидзэ­жьыгъ, ныкъотхьалэу къыхихыжьи еупчIыгъ:
— СишIэныгъэрэ Iофэу сшIэ­рэмрэ сыд мыхъунэу ахэплъагъо­рэр?
— Еджагъэм гуIэзэ ыпэкIэ фэмыдэу къызIуипхъотыгъ: — О уиI зэкIэ – акъыли, шIыкIи, уиIофи дэгъоу огъэцакIэ, ощ нахь лIы дэгъу дунаим тетэп!
Къуашъом къикIыжьи еджагъэм ежь-ежьырэу ыгукIэ зэриIожьыгъ: «IофшIэн дэй хъурэп, пкIэнчъэу ыгу хэзгъэкIыгъ».