Урысыем изаслуженнэ тренерэу Александр Малиным ишIэжь фэгъэхьыгъэ Урысые зэнэ­къокъухэм Адыгеим идзюдоистхэм медалипшI къащахьыгъ. Мыщ хъулъфыгъэхэр ыкIи бзылъ­фыгъэхэр хэлэжьагъэх.

Александр Малиныр Тамбовскэ хэкум дзюдор щигъэпсыгъ. Джырэ уахътэм спорт еджапIэхэм Iоф ащызышIэрэ тренерхэм ащыщыбэр ащ ыгъэсагъ. Александр Фе­дор ыкъом мы спорт лъэп­къым хэхъоныгъэ ышIыным иIахьышIу хэлъ, 1973-рэ илъэсым апэрэ секциер къы­зэ­Iуихыгъагъ.
Зэнэкъокъухэр спорт-зыгъэсэпIэ гупчэу «Тамбов» зыфиIорэм щыкIуагъэх. Къэралыгъом ишъо­лъыр 24-мэ къарыкIыгъэ спорт­смен 213-мэ заушэтыгъ. Ахэм ащыщэу 169-р — хъулъфыгъэх, 44-р — бзылъфыгъэх. Мы турнирыр я 34-у рагъэкIокIыгъ.
Iофтхьабзэм икъызэIухын фэгъэхьыгъэ мэфэкI зэхахьэм хэлэжьагъ шъолъырым спортымкIэ иминистрэу Павел Грицковыр.
— Дзюдом цIыфыр зэфагъэм, шъыпкъагъэм, тренерым ыкIи узэ­нэкъокъурэм шъхьэкIафэ афэ­пшIыным уафегъасэ. Мы спорт лъэпкъымкIэ титекIоныгъэхэм ыкIи тигъэхъагъэхэм лъапсэ афэзышIыгъэ тичIыпIэгъу лъапIэ ишIэжь тэгъэлъапIэ ыкIи илъэс 30-м ехъугъэу мы турнирыр зэ­хэтэщэ. Лъэшэу сигуапэ шъолъыр зэфэшъхьафхэм къарыкIыгъэ спортсменхэр, дзюдоист лъэш­хэр мыщ зэрэхэлажьэхэрэр, — къыIуагъ ащ.

Адыгэ Республикэр нэбгырэ 14-мэ къагъэлъэгъуагъ. СпортсменитIумэ текIоныгъэр къыдахыгъ — Мерэм Дамиррэ (килограмм 66-м нэс къэзыщэчыхэрэм якуп) Ингуш Владимиррэ (килограмм 90-м нэс къэзыщэчыхэрэм якуп). Килограмм 90-м нэс къэзыщэ­чыхэрэм якуп зыщызыушэтыгъэ­хэм ащыщхэу финалым ихьэгъэ нэбгыритIур адыгэх, ятIонэрэ чIыпIэр къыфагъэшъошагъ Ордэн Заур. Тыжьын медальхэр къа­хьы­гъэх Кобл Азэматрэ Бэгъ Ас­лъанрэ. Джащ фэдэу А. Бэ­гъым ящэнэрэ чIыпIэри къыдихыгъ. Джэрз медальхэр къахьыгъэх ЦIыкIу Рэмэзан, Юрий Балаян, Еутых Рэмэзан ыкIи Датхъужъ Алый.