Адыгэ Республикэм иобщественнэ организациеу «Ны Хасэм» 1992 — 2008-рэ илъэс­хэм итхьамэтагъэу, зэлъашIэрэ общественнэ IофышIэу Шышъхьэ Тамарэ идунай ­ыхъожьыгъ. ГукIэгъурэ гупыкIырэ зиIэ цIыфэу, мамырзехьэу ар щытыгъ.
Адыгеим и «Мать Тереза» ащ зэреджэщтыгъэхэр ыкIи цIыфхэм агу къызэринэжьыщтыр. ИщыIэныгъэ зэрэщытэу шIушIэным, къин хэфагъэм IэпыIэгъу ригъэгъотыным афигъэшъошагъ. Игушхуагъэ, ипсэемыблэжьныгъэ щысэтехыпIэу щытыгъ. ЦIыфхэм янасып аригъэгъотыжьыщтыгъ, IофышIум изэшIохын пае пстэури зэ­къуигъэуцон ылъэкIыщтыгъ.
Зэпэуцужь зэфэшъхьафхэм зэрар ахэзыхыгъэ унагъохэм Ны Хасэу Шышъхьэ Тамарэ зипэщагъэр кIэгъэкъон афэхъущтыгъ. Илъэс зэфэшъхьафхэм зао зыщыкIощтыгъэ Чэчэным ыкIи Абхъазым ипсауныгъэ емыблэжьэу мызэу, мытIоу ар ащыIагъ, шIушIэ IэпыIэгъухэр къин хэфагъэхэм анигъэсы-­
щтыгъ. Гъомылэпхъэ тонн 50-м ехъу, ахъщэ IэпыIэгъур, кIэлэ­цIыкIухэм апае джэгуалъэхэр ыкIи IэшIу-IушIухэр Тамарэ ихьатыркIэ зищыкIагъэхэм анэсыщтыгъэх. Ны шIулъэгъоу ыкIи гукIэгъоу хэлъыгъэр джащ фэдэу цIыфхэм алъыIэсыщтыгъ.
Псэемыблэжьэу шIушIэ Iофтхьабзэу зэрихьагъэхэм апае Шышъхьэ Тамарэ къэралыгъо тын зэфэшъхьафхэр къыфагъэшъошагъэх: бгъэхалъхьэу «Адыгеим и Щытхъузехь» зыфиIорэр, Абхъазым иорденэу «Ахьдз-Апша» ия III-рэ шъуашэ, Урысыем ибзылъфыгъэхэм я Союз итынхэр, АР-р загъэпсыгъэр илъэси 100 зэрэхъугъэм фэгъэхьыгъэ бгъэхалъхьэр. Ау ежьыркIэ зэкIэмэ анахь лъапIэу щытыгъэр цIыфхэм яшIулъэгъурэ ярэзэныгъэрэ.
Шышъхьэ Тамарэ цIыфхэм шIукIэ агу къэкIыжьыщт. Псэ­емыблэжьыныгъэм, шIушIэным, гупыкI иным ятамыгъэу ар тарихъым къыхэнэщт.
«Шышъхьэ Тамарэ идунай зэрихъожьыгъэр общественностымкIэ чIэнэгъэшху. ИIахьыл-благъэхэм тыгу къыддеIэу тафэтхьаусыхэ. ИшIэжь дгъэлъэпIэщт», — къаIуагъ Адыгеим и бзылъфыгъэхэм я Союз хэтхэм.
БжьашIо Ф., КIуае Л., Вэрэкъо Хь., Натхъо Р., И. Сергеевар, Гъурыжъ З.