Гур къытеофэ уилъэгъо зафэ сэ сырыкIощт

Умэкъэ лъагэ, хэгъэгоу кIасэр,
Фэбагъэ хэлъэу сэ зэхэсэхы.
Лъэпкъы къошыбэм орышъ ылъапсэр,
ШIуфэсы лъапIэр непэ осэхы.

Сэ сиорэдмэ уахэмылъыщтмэ,
Хэта ащыгъум ащ ядэIущтыр?
Уищытхъу идахэ сымыIотэщтмэ,
Хэта сэ сыбгъэ дизэу дэлъыщтыр?

О къыопыйрэр симыпыйщтмэ,
Сыдэущтэу пIуркIэ укъысэджэн?
ГугъапIэу уиIэр сыгу имылъыщтмэ,
Сыдэущтэу зекIо сыкъыбдежьэн?

Уижьы сыхэтыфэ, сыгу къытеофэ
Уилъэгъо зафэ сэ сырыкIощт.
Лъэу скIэтыр зэкIэ къэучъыIыфэ
Уищытхъу идахэ ренэу сIотэщт.

Сиапэрэ жъуагъу

Адыгэ чIыгоу сихэгъэгу кIасэр,
Гъэтхэпэ нэгукIэ слъэпкъ уринап.
Апэрэ псалъэр зыфаIоу хабзэр
Ным ишIулъэгъушъ, гум урилъапI.

Адыгэ чIыгоу сихэгъэгу кIасэр,
Уикъушъхьэ шыгухэр ошъогурытых.
Уипсыхъо чъэри, уигубгъо хьаси
Зыфэзгъэдэни чIылъэм темыт.

Зэкъош лъэпкъыбэм итыгъэ шъабэу
ТэркIэ нэфыпсри ташъхьагъ щымаф,
Шъхьафит щыIакIэр уигугъэ фабэу
Насыпы лъагъор ренэу пфэзаф.

Хэгъэгу чIыналъэу ситыгъэ лъагэр
Сятэжъмэ ячIышъ, бгъэгум дэрэлъ,
Апэрэ жъуагъоу сишIулъэгъу дахэ
Мэкъэмэ жъгъыукIэ схизэу схэрэлъ.

ШIушIэ нап

ТимэфакIэу чIылъэм изымафэр,
Мамыр лъэгъо нэфкIэ укъытхахь.
Дахэр тэ зыфатIоу гугъэ зафэр
Къытфахь къыотэIо – тэ къытфахь.

Пчыдыжьыпэу сидунэе дахэм
Иорэд нэфыпскIэ зытегъашIэ.
Тыгъэм инэбзыйхэр ошъо лъагэм
Дышъэпс-тыжьыныпскIэ зыкъыхашIэ.

Сэ сичылэ закъоп шIугъэ напэр
Къызфэпхьынэу сIорэр, тимэфакI.
ЧIылъэр къыпщэгугъышъ, тыгъэ шъабэр,
Уитыгъэпсы ныбжьи щымыгъакI.

Намыс

Намысым нахь лъапIэ
ЦIыф зыцIэм имыI.
ЩымыIэр бгы лъапэм
УблапIэу емыIу.

МыIуапхъэр зыфэдэр
Жэгъу дэдэу зэгъашI.
УигъашIэ щыпфэдэр
ПфэшIэщтым егъапш.

Намысыр цIыф шапхъэшъ,
Ар зыми дэмыпшъ.
СигъашIэ мышIапхъэ
ЫшIагъэу сымышI.

Къэбар дэгъум игушIуагъу

Къэбар дэгъум нахь гушIуагъо
ЩыIэу сшIэрэп – къытфэрэс.
Пчыхьэшъхьапэм изы жъуагъо
Фэдэу ари ом къерэпс.

Узыфэсрэм, зэхэзыхрэм
Насып Iатэ уфэрэхъу.
Псыхъо чъагъоу хымкIэ чъэрэм
Гъусэ мафэу дэчэрэгъу.