АР-м итеатральнэ зэхахьэ и Урыс драматическэ театрэ къэгъэлъэгъонэу «Капитанская дочка» зыфиIорэр ыгъэуцугъ. «АртМастерс ­Регионы» зыфиIорэ къэралыгъо проектым Iоф­тхьабзэр къыдыхэлъытагъ. Москва къикIыгъэ режиссерэу Александр Мурити спектаклыр ыгъэуцугъ. Александр Пушкиным ироман ­къыхэхыгъэ пычыгъор апэрэу мэлылъфэгъум и 9-м Мыекъуапэ къыщагъэлъэгъощт.

Офицер ныбжьыкIэу Петр Гриневыр Белгород пытапIэм дэфагъэу Мироновхэм яунагъо нэIуасэ фэхъу. Марье апэрэу ащ щелъэгъу ыкIи ыгу рехьы, Петр Гриневыр ыныбжь зыщикъугъэ лъэхъаныр, шIу­лъэгъу дахэу ыушэтыгъэр, мэкъумэщышIэ тхьамыкIэмэ языкъэIэтын спектаклэм къыреIо­тыкIых. Къэгъэлъэгъоным хэт геройхэр ушэтыпIэ къинхэм арыфагъэх. Шъыпкъагъэм, шъхьа­кIом, шIулъэгъуныгъэ зэхашIэм ахэр хэдагъэх. Анахь чIыпIэ къин уифагъэми, пшъхьэ уасэ фэпшIын, уицIыфыныгъэ къызэрэзэтебгъэнэн фаер къэгъэлъэгъоным ылъапс.
— Урыс классикэм сыдэлэ­жьэныр сыгу рехьы. Дэгъумрэ дэимрэ, зэпэуцужьымрэ зэзэгъыныгъэмрэ къизгъэлъэгъу­кIырэ сюжетхэр сценэм къытеп­хьан амалхэр къытеты. Адыгэ Республикэм итеатральнэ зэха­хьэ иартистхэм садэлэжьэныр псынкIэ къысфэхъугъ, гухахъо хэзгъотагъ, актерхэм яIоф хэшIыкIышхо фыряI. Зироль къэзышIырэ пэпчъ, ежь игукъэкIкIэ кIэ горэ къыхелъхьэ, ащ фэдэ шIыкIэ амалыр зымыуасэ щыIэп. Адыгеим и ЛIышъхьэу Къум­пIыл Мурат театрэм ынаIэ къы­зэрэтетым мэхьанэшхо иI. Ащ ыуж театрэм ипащэу Ацумыжъ Рустам АР-м театральнэ зэха­хьэ лъэгэпIэ инхэм анэсыным иIахьышIу зэрэхишIыхьэрэм фэшI сыфэраз, — къыIуагъ режиссерэу Александр Мурити.
Артист ныбжьыкIэу Влади­слав Клевогиным Петр Гриневым ироль, Хъут Ринатэ капитаным ыпхъу ироль къашIыгъ. Пшъэшъэ ныбжьыкIэм ишIу­лъэгъу къабзэ ушэтыпIэ ин зэ­рэфэхъугъэр сценэм дэгъоу къыщыригъэлъэгъукIыгъ.
— Герой шъхьаIэм ироль апэрэу къэсэшIы, ар сэркIэ гушIогъошху ыкIи сыгукIэ сэгумэкIы. Къэгъэлъэгъоным Iоф датшIэ зэхъум артистэу сыздэлажьэхэрэм сэнаущыгъэ инэу ахэлъыр нахь куоу зыхэсшIагъ. Сигерой изэхашIэ икъу фэдизэу сценэм къытесхьагъэу сэгугъэ, — къыIуагъ Владислав Клевогиным.
Театральнэ режиссермэ ­алъэгъу рольхэр къэзышlын зылъэкIыщт артистхэр. Цlыфым икъин къэбгъэлъэгъоныр, ынэпс къебгъэхыныр, цIыфхэм агу къызэбгъэгъуныр, героим ыгу ихъыкIырэр къипIотыкIыныр IэшIэхэп. А пстэуми сэнаущыгъэшхо ящыкlагъ. А пшъэрылъыр артистхэм дэгъоу агъэцэкIагъ.
Театрэм цIыфыр епIу, щы­Iэныгъэм фегъасэ. Лъэхъаным диштэрэ къэгъэлъэгъонхэр искусствэр зыгу рихьыхэрэм ашIо­гъэшIэгъоных.
— СпектаклыкIэу дгъэуцугъэр къыддэхъугъэу сэлъытэ. Режиссерым екIолIакIэу къы­фигъотыгъэр, драматургым те­мэу ыштагъэр, артистхэм яроль­хэр къызэрашIыгъэхэр шэп­хъэшIухэм адештэ. Пушкиным иро­ман къыхэхыгъэ пычыгъом мазэрэ тыдэлэжьагъ. Ащ ыцIэ ти Унэ ехьы, арышъ, тхэкIо цIэрыIом ипьесэхэр нахьыбэу дгъэуцухэ тшIоигъу. ТапэкIэ урыс классикхэм, анахьэу Чехо­вым ытхыгъэхэр, тирепертуар хэдгъахьэ тшIоигъу. Грантэу къэтхьыгъэм ишIуагъэкIэ техническэ амалхэм зятэгъэушъомбгъу. НыбжьыкIэхэр нахьыбэу театрэм къетщэлIэнхэм пае пушкинскэ картэм иамалхэри тэгъэфедэх, — къыIуагъ Ацумыжъ Рустам.
Пушкиным ыцIэ зыхьырэ унэм мэлылъфэгъум и 9-м спектаклыр къыщагъэлъэгъощт. Театрэр шIу зылъэгъухэрэр зэхэщакIохэм рагъэблагъэх.
Лъэпшъыкъо Фатим.