АР-м иминистрэхэм я Кабинет изэхэ­сыгъо республикэм и Гупчэхэу пшъэрылъы­бэ зыгъэцакIэхэрэм 2024-рэ илъэсым Iофэу ашIагъэм икIэуххэм ыкIи 2025-мкIэ пшъэрылъэу яIэхэм щатегущы­Iагъэх. Адыгеим и ЛIышъхьэу КъумпIыл Мурат пшъэрылъ къызэрэфишIыгъэм тетэу АР-м иминистрэхэм я Кабинет и Тхьама­тэу КIэрэщэ Анзаур зэхэсыгъор зэри­щагъ.
АР-м IофшIэнымрэ социальнэ хэхъоныгъэмрэкIэ иминистрэу Мырзэ Джанбэч МФЦ-хэм Iоф зэрашIагъэр къызэфихьысыжьыгъ. Ащ къызэриIуагъэмкIэ, непэрэ мафэм ехъулIэу зы Уполномоченнэ МФЦ, къутэми 9, подразделение 43-у Адыгеим имуниципальнэ образованиехэм ащыIэхэр хэхьэх.
Адыгеим щыпсэухэрэм япроцент 93,16-мэ зы чIыпIэм къэралыгъо, муниципальнэ фэIо-фашIэхэр къащыфагъэцэкIэнхэу амал яI.
Джыдэдэм гупчэхэм къэралыгъо, муниципальнэ фэIо-фэшIи 187-рэ щафагъэ­цакIэ, ахэм ащыщэу 73-р гъэцэкIэкIо хабзэм ифедера­льнэ къулыкъухэмрэ къэралыгъо мыбюджет фондхэм якъулыкъухэмрэ якъэралыгъо фэIо-фашIэх, 47-р АР-м икъэралыгъо хабзэ игъэцэкIэкIо къулыкъу­хэм якъэралыгъо фэIо-фашIэх, 67-р муниципальнэ фэIо-фашIэх. ИлъэскIэ узэкIэ­Iэбэжьмэ пстэумкIи фэIо-фэшIи 150-рэ афы­зэхащэ­щтыгъэ.
Мы илъэсым нэбгырэ мин 445-м ехъу­мэ зыкъыфагъэзэгъагъ, ахэм фэIо-фэшIэ мин 534-м ехъу афагъэцэкIэгъагъ. Процент 99,97-р фэIо-фашIэхэр къазэрафагъэцэкIагъэм ыгъэрэзэгъагъэх. 2024-рэ илъэсым фэIо-фашIэхэр къафагъэцэкIэнхэу МФЦ-м зыкъыфэзыгъэзагъэхэр гурытымкIэ чэзыум такъикъи 8 зэрэхэты­гъэ­­­хэр, такъикъ 15 зэрэхэтынэу щытыгъэхэр.
Гупчэхэм яIофшIэнкIэ лъэныкъо шъхьа­Iэу зыфэгъэзагъэхэр юридическэ лицэхэм, унэе предпринимательхэм, предприниматель Iофым пыхьэ зышIоигъохэм яфэIо-фашIэхэр гъэцэкIэгъэнхэр ары. Зигугъу къэт­шIыгъэхэм атегъэпсыхьагъэу бизнесым пае фэIо-фашIэхэр зыгъэцэкIэрэ гупчи 3 зэхащагъ: Мые­къуапэкIэ АР-м ипредпринимательствэ IэпыIэгъу егъэгъо­тыгъэнымкIэ Гуп­чэм, коммерческэ банкэу «Центр-инвест» зыфиIорэм, Яблоновскэм икъута­мэу N 2-м ахэр ащыгъэпсыгъэх.
Бизнесым тегъэпсыхьэгъэ фэIо-фа­шIэхэр зыгъэцэкIэрэ гупчэхэм къэралыгъо, муниципальнэ фэIо-фэшIэ лъэпкъ 86-рэ, ащ нэмыкIэу ыпкIэ хэлъэу фэшъхьаф фэIо-фашIэхэри ащызэхащэх. 2024-рэ илъэсым юридическэ лицэхэм, унэе предпринимательхэм, предпринимательствэм пыхьэ зышIоигъохэм фэIо-фэшIэ мин 21-рэ фэдиз афагъэцэкIагъ, консультацие 14 афызэхащагъ, документ мини 7,3-рэ къаратыгъ.
ТелефонкIэ IэпыIэгъу языгъэгъотырэ къулыкъу МФЦ-м щызэхащагъ. 2024-рэ илъэсым ащ фэдэ къулыкъум гъогогъу мини 122,5-рэ къыфытеуагъэх.