Хэгъэгу зэошхом ТекIоныгъэр къыз­щыдахыгъэр илъэс 80 зэрэхъурэм фэгъэхьыгъэ Iоф­тхьабзэу «ТекIоныгъэм и Пхъэшъаб» зыфиIорэм къыдыхэ­лъытагъэу Мыекъопэ къэлэ паркым щагъэтIысхьэгъэ пхъэшъабэм дэжь шIэжь зэхахьэ щыкIуагъ. Iофтхьабзэм икIэщакIу АР-м мэзхэмкIэ и ГъэIорышIапIэ.

ШIэжь зэхахьэр къызэIуихыгъ АР-м мэзхэмкIэ и ГъэIорышIапIэ ипащэу Былымыхьэ Рэщыдэ. Iофтхьабзэм хэлэжьагъэх Къыблэ ыкIи Темыр-Кавказ федеральнэ шъолъырхэм мэз хъыз­мэтымкIэ я Департамент илIыкIоу ГуашIэ Артур, Урысыем и ЛIыхъужъэу, АР-м и Къэралыгъо Совет — Хасэм итхьаматэ игуадзэу Цэй Эдуард, Мыекъопэ къэлэ администрацием ипащэу Геннадий Митрофановыр, республикэм имэз­лэжьхэм я Обществэ итхьаматэу Хьа­тикъое Мэджыдэ, мэзхэмкIэ ГъэIоры­шIапIэм иобщественнэ Совет итхьаматэу Джымэ Энвер. ЕджэпIэ мэзлэжьыпIэхэм ялIыкIохэри джащ фэдэу зэхахьэм къекIолIагъэх.
— Хэгъэгу зэошхом ТекIоныгъэр къыз­щыдахыгъэр илъэс 70-рэ зэхъум паркым мы пхъэшъабэр щыдгъэ­тIыс­хьэгъагъ. А чъыгыр къызтекIыгъэр Ста­линград зэошхом псаоу къелыжьыгъэу Волгоград игупчэ къыщыкIырэ чъыгэу зыныбжь илъэси 100-м ехъугъэр ары. Ащ къычIэтхыгъэ гуакIэхэр 50-м ехъоу Краснооктябрьскэм дэт мэзхъыз­мэт­шIапIэм гъэтхапэм щыдгъэтIысхьагъэх, — зэхахьэм къекIолIагъэхэм къафи­Iотагъ АР-м мэзхэмкIэ и ГъэIорышIапIэ ипащэу Былымыхьэ Рэщыдэ.
2015-рэ илъэсым чъыгыр Мыекъопэ къэлэ паркым щагъэтIысхьэгъагъ. Хэ­гъэгу зэошхом хэкIодагъэхэм яшIэжь ар фагъэшъошагъ. Пхъэшъабэм зиштагъ, илъэс пчъагъэхэм ащ илъэгагъэ хэхъуагъ, ышъхьапи бырабэу зиушъомбгъугъ. Псэемыблэжьэу Хэгъэгум фэзэуагъэхэм, зыпсэ зытыгъэхэм ясаугъэтэу ар хъугъэ.
Къыблэ федеральнэ шъолъырым мэз хъызмэтымкIэ и Департамент иIэпы­IэгъукIэ «ТекIоныгъэм и Пхъэшъаб» зыфиIорэ Iофтхьабзэр Урысыем и Къыблэ имызакъоу, Донбасс ыкIи Новороссием ащэкIо.
АР-м мэзхэмкIэ и ГъэIорышIапIэ ипресс-къулыкъу.