Мотоциклэ лъэпкъ зэфэшъхьафхэр зыныбжь имыкъугъэхэм зэрэзэрафэрэр непэ Iофыгъошхоу къэуцухэрэм ащыщ.

ЩэрэхъитIу зыкIэт транспортым игъэфедэн жъу­гъэу къызежьэрэр гъэтхэ-гъэмэфэ лъэхъаныр ары. Мыр зэрафэныр ныбжьыкIэхэм лъэшэу агу рехьы, ау ащ щынагъоу хэлъыр икъоу къагурыIорэп, ежьхэр хэгъэ­кIыри, къафэзыщэфырэ ны-тыхэми а лъэбэкъумкIэ пшъэдэкIыжьэу ахьырэр зэхашIыкIырэп.
Iофыгъоу къэуцугъэм идэгъэзыжьын зэпымыоу Адыгеим и Къэралыгъо автоинспекцие Iоф дешIэ. Ащ епхыгъэу ныбжьыкIэ гъогу-транспорт фыкъоныгъэхэм япчъагъэ, ахэр къэмыгъэхъугъэнхэмкIэ IофшIэнэу зэрахьэрэм, ны-тыхэм анаIэ зытырагъэтын фаехэм афэгъэхьыгъэу гущыIэгъу тыфэхъугъ гъогурыкIоныр щынэгъончъэнымкIэ Къэралыгъо инспекцием АР-мкIэ и ГъэIорышIапIэ пропагандэмкIэ иотдел ипащэу, полицием иподполковникэу Бзэджэжъыкъо Мурат.
— Мы илъэсым имэзищ зыныбжь имыкъугъэхэр зыхэфэгъэхэ гъогу хъугъэ-шIэгъэ 17 республикэм щагъэунэфыгъ. Мы пчъагъэр ыпэрэ илъэсым джырэ фэдэ иуахътэ ебгъапшэмэ, фэдитIукIэ нахьыб. Ащ щыщэу 11-мэ ахэфагъэхэм аныбжь илъэс 16 хъугъэп. Мы илъэсым имэзищ мотоциклэр зезыфэхэрэр зыхэт аварие 14 Адыгеим игъогухэм ащатхыгъ, зы нэбгырэ ахэкIодагъ, нэбгыри 9-мэ водительскэ удостоверение аIыгъыгъэп. Джащ фэдэу уплъэкIун Iофтхьабзэхэр къулыкъушIэхэм рагъэкIокIыфэ мотоциклэ лъэпкъ зэфэшъхьафхэр зезыфэщтыгъэхэ зыныбжь имыкъугъэ­хэм административнэ хэбзэукъоныгъи 108-рэ зэрахьагъэу къыхагъэщыгъ, — къыIуагъ Бзэджэжъыкъо Мурат.
Къэралыгъо автоинспекцием иIофышIэ къыIогъэ пчъагъэхэм уагъэрэхьатынэу щытэп. Ащ къызэрэхигъэщыгъэмкIэ, анахь гумэкIыгъо къызпыкIырэр спорт инвентарэу «питбайк» зыфаIорэр ары. Сыда пIомэ мыр зепфэнымкIэ фитыныгъэ уиIэн ищыкIагъэп, паспорт пылъэп ыкIи къэралыгъо тхыным къыхиубытэрэп. Ау транспортыр зыщызекIорэ гъогум ар щызепфэн узэрэфимытыр къыдамылъытэу ащ къырытехьэхэшъ, хъугъэ-шIагъэхэм ахэфэх. Шъобжхэр зэрэхахыхэрэм дакIоу, хэкIуадэхэрэри къахэкIых. Мы транспорт амалыр зыщэхэрэм полицейскэхэм заIуагъакIэзэ, зыщэфыхэрэм щынагъоу пылъыр афаIотэнэу ялъэIугъагъэх нахь мышIэми, зэхъокIыныгъэ Iофым фэхъугъэп. Тучанхэм ар япшъэрылъэп, сатыу ашIыныр ары Iоф зыкIашIэрэр.
— Аныбжь елъытыгъэу икъоу гъогурыкIоным ишапхъэхэр, щынэгъончъэнымкIэ амалэу щыIэхэр агъэфедэнхэу ныбжьыкIэхэм ашIэрэп, транспорт зэфэшъхьафхэр зэрафэнхэмкIэ фитыныгъэ ыкIи ищыкIэгъэ тхылъхэр яIэхэп. АвтоеджапIэхэм шIэныгъэ щызэрамыгъэгъотэу мотоциклэхэр зэрафэх. Джа зэкIэри авариехэм алъапсэ мэхъух. Ащ епхыгъэу мы илъэсым зэIукIэгъоу кIэлэеджакIохэми, ны-тыхэми адытиIэхэрэр фэдитIукIэ нахьыбэ тшIыгъэх. Зэхэфын-зэдэгущыIэгъу­хэу редгъэкIокIыхэрэм джы Следственнэ гъэIорышIапIэм илIыкIохэри ахэм къахэлажьэх. Ны-тыхэм пшъэ­дэкIыжьэу а лъэныкъомкIэ ахьырэр игъэкIотыгъэу следовательхэм къаIуатэ. ТиIофшIэнкIэ лъэныкъо гъэнэфагъэхэр къыхэтхыгъэх, ахэр зэкIэ зыныбжь имыкъугъэхэр зыхэфэрэ гъогу хъугъэ-шIагъэхэр нахь макIэ шIыгъэнхэм фэIорышIэным тыщэгугъы, — хигъэунэфыкIыгъ Бзэджэжъыкъо Мурат.
Джырэ лъэхъаным диштэрэ зекIон амалыр къафащэфыным ыпэкIэ ар зэрагъэфедэщтым пылъ шапхъэ­хэм икъоу защагъэгъозэнэу, ащ щынагъоу къыхэкIын ылъэкIыщтыр къыдалъытэнэу инспекторхэм ны-тыхэм зафагъазэ.
Ны-тыхэу ащ фэдэ транспортыр зефэгъэнымкIэ фитыныгъэ зиIэ кIэлэцIыкIухэм къафэзыщэфыгъахэхэм ахэр зэрагъэфедэщт шапхъэхэр зэпымыоу агу къагъэ­кIыжьынхэм, шъобжхэр хамыхэнхэм фэшI шъхьэр, Iэ-лъакъохэр зыухъумэхэрэ пкъыгъохэр къафащэфынхэм полицейскэхэр къыфэджэх.
Iэшъынэ Сусан.
Сурэтыр: Артур Лаутеншлегер.