«Илъэс 25-рэ хэгъэхъуагъэу ныбжь хэ­кIо­тагъэ зиIэхэм апай» зыфиIорэ фестивалыр Адыгэ Республикэм и Лъэпкъ музей щызэхащагъ.

«Физическэ культурэмрэ спор­тымрэ хэхъоныгъэ ягъэшIыгъэнымкIэ Гупчэм» ипроектэу «Активные люди 4» зыцIэм мы Iофтхьабзэр къыдыхэлъытагъ. Республикэ бюджетым къыхагъэкIыгъэ мылъкум ишIуагъэкIэ проектыр агъэцэкIагъ. Зыныбжь хэкIотагъэхэм, пенсием щыIэ нэжъ-Iужъхэм япсауныгъэ агъэ­пытэным, яшIэныгъэхэм ахэ­гъэ­хъогъэным Iофтхьабзэр фэ­Iо­рышIагъ.
Ар рагъэжьэным ыпэкIэ зэхахьэм ихьакIэхэм Лъэпкъ му­зеим иэкспозициехэр арагъэлъэгъугъэх. Фестивалыр мэфэкI шIыкIэм тетэу къызэIуа­хыгъ. Шъуашэхэм якъэгъэлъэ­гъонкIэ Iофтхьабзэр аублагъ. ШъохэмкIэ кIэрэкIэ щыгъынхэр зыныбжь хэкIотэгъэ бзылъ­фыгъэхэм защарагъэлъагъ. Ныбжьым емылъытыгъэу дахэу зы­зэрыпфэпэн плъэкIыщтыр къекIолIагъэхэм арагъэлъэгъугъ.

ЗэхэщакIохэм зэрагъэнэфагъэм тетэу псауныгъэр къэу­хъумэгъэным фэгъэхьыгъэ зэ­дэгущыIэгъухэр зэхащагъэх. Унагъом имэхьанэ къэIэтыгъэным, ащ обществэм чIыпIэу щиубытырэр гъэпытэгъэным япхыгъэ Iофтхьабзэхэр фестивалым къыдыхэлъытэгъагъэх. ЦIыфхэм ямылъку къэухъумэгъэным фэшI ашIэн фаем, нэжъ-Iужъхэр зыщылэжьэнхэ алъэкIыщт сэнэхьатхэм яермэлыкъ, сурэтышIхэм ядесэхэм, волонтерхэм зэрахьэрэ Iоф­тхьабзэхэм нэIуасэ афэшIы­гъэнхэм ыкIи нэмыкIхэм фес­тивалым хэлажьэхэрэр атегущыIагъэх.
Общественнэ зэхахьэу «Туристическая Адыгея» зыфиIорэм хэтэу, проектым икIэщакIоу Ольга Ивановам «Плюс 25: вызовы и возможности зре­лости» зыфиIорэ зэдэгущыIэгъу зэхищагъ. Зыныбжь хэкIота­гъэхэр жъышъхьэ мафэ хъунхэм, ащкIэ ящыкIэгъэ амалхэр ягъэгъотыгъэнхэм мэхьанэшхо зэриIэр къекIолIагъэхэм зэхашIагъ.
— Нахьыжъхэм ягъашIэ хэгъэхъогъэным зэхахьэр фэIорышIэ. Ащ пае ахэр физическэ культурэм ыкIи спортым, псауны­гъэр гъэпытэгъэным афэгъэхьыгъэ Iофтхьа­бзэхэм ахэтэгъэлажьэх. ТиIофшIэн кIэухэу фэхъу­нэу щытыр тыжьын ныб­жьым итхэм ящыIэ­кIэ-псэукIэ нахьышIу шIыгъэныр ары, — къыкIуагъ Ольга Ивановам.
Зы Iоф гъэшIэгъон горэм ыуж ихьэ зышIоигъоу, ау къызщы­ри­гъэжьэщтыр, зэрекIолIэщтыр зы­мышIэхэрэм апае джэуапышIу хъун ылъэкIыщт зэхащэгъэ егъэ­джэн сыхьатхэр. Предприни­мателэу Елена Лаврентьевам илекцие щыIэныгъэм илъэ­ныкъо зэфэшъхьафхэм нэжъ-­Iужъхэм чIыпIэ гъэнэфагъэ щау­бытын зэралъэкIыщтым фэ­гъэхьыгъагъ. «ГъэшIэ кIыхьэр ыкIи чаныр», «Упсэуныр на­сы­пыгъ», «Дахэу упсэуным фэшI», «Бзылъфыгъэ да­хэм иобраз», «Псауныгъэм фэгъэхьыгъ», «Щы­Iа­кIэр на­хьышIу хъуным фэшI», «Гур псау­ным фэшI» зыфиIорэ лекциехэр къе­кIо­лIагъэхэм аща­шIогъэ­шIэ­гъо­ны­гъэх.
ЦIыфым об­ществэм чIыпIэу щиубытырэр гъэпытэгъэным фэIорышIэрэ Iофтхьэ­бзэ зэфэшъхьафыбэ фестивалым щызэхащагъ, физическэ ыкIи психическэ зэфыщытыкIэм тегущы­Iагъэх. Нэжъ-Iужъхэм финанс фэIо-фашIэхэр тэрэзэу агъэфедэнхэмкIэ IэпыIэгъу афэ­хъущт зэдэгущы­Iэгъур бэмэ ашIо­гъэшIэгъоныгъ. Гу­щыIэм пае, «Хьи­сапым сыд фэдэрэ ныбжьи фэ­къулай», «Бзылъфыгъэм ­ижъогъо бын».
— Зыныбжь хэкIотагъэ­хэр щыIэныгъэм дэлъэ­бэкъонхэм мэхьанэшхо иI. Непэ ащ фэдэ бзылъфыгъэхэу щыгъын дахэ зыщытлъагъэхэм якIуа­кIи зэ­бла­хъугъ, абгыхэри къаузэн­кIыгъ, — къы­Iуагъ фестивалым именеджерэу Галина Каташевскаям.
«IэпэIасэм идесэхэр», «Ды­шъэ идагъ», «СурэтышI Iаз», «Орэд къэIоныр сикIас» зыфи­Iорэ егъэджэн сыхьатхэр цIыфыбэхэм ашIогъэшIэгъоныгъ. АIэкIэ ашIыгъэ пкъыгъохэр зэ­даштэжьыгъэх.
— Аныбжь емылъыты­гъэу щыIэкIэ гъэшIэгъон зэрэбгъэпсын плъэкIыщтыр агурыгъэIогъэныр, ащ къыфэтщэнхэр ти­пшъэрылъ шъхьэIагъ. ТапэкIи мыщ фэдэ Iоф­тхьабзэхэр зэхэтщэнхэр тимурад, — къыIуагъ АНО-у «ЦСФКИС» зыфиIорэм именеджер шъхьа­Iэу Марина Мельник.
«Адыгэхэм ягъэшIэ кIыхь» зыфиIорэ флэшмобымкIэ зэхахьэр аухыгъ.
Лъэпшъыкъо Фатим.