Адыгэ Республикэм ыкIи ­Пшызэ шъолъырым ащыпсэурэ быслъымэнхэм я ДиндэлэжьапIэ шIушIакIохэр игъусэхэу НэкIмэзэ мазэм гъот макIэ зиIэхэмрэ диныр зылэжьхэу чIыпIэ къин ифагъэхэмрэ адэIэпыIагъэх.

Мазэр хэгъэIэжьынышхокIэ ыкIи Бирамым фэгъэхьыгъэ мэфэкI зэхахьэмкIэ аухыгъ. Дин ДэлэжьапIэм къызэ­рэщаIуагъэмкIэ, НэкIмазэм къыкIоцI унэгъо 52-мэ гъомылапхъэхэр аIэкIа­гъэ­хьагъ.
Ащ фэшъхьафэу, псэупIэу Новый Садым дэт колониеу КП-3-м чIэсхэр зэкIэ, динэу алэжьырэм емылъытыгъэу, щыхагъэIэжьыгъэх. Тэхъутэмыкъое районым ичIыпIэ быслъымэн организацие къыугъоигъэ гъомылапхъэхэр, псауныгъэр къэухъумэгъэнымкIэ къашъхьэпэщтхэр бзылъфыгъэхэр зыщаIыгъ колониеу N 3-м, ащ сабим и Унэу дэтым афарагъэщагъэх. Колониер Краснодар краим хэхьэрэ Усть-Лабинскэ районым ипоселкэу Двубратскэм щыI.