Гъатхэр къызихьэрэм, чIыопсыр къэ­ущыжьэу регъажьэ. Ар гъэтхэпэ мазэм къытигъэлъэгъугъ. Мэлылъфэгъу мазэу къихьагъэм ом изытет джыри зыпкъитыныгъэ хэлъэу щытыщтэп, зы мафэр чъыIэмэ, адрэр — фэбэщт.
Мы мазэм ыцIэ латин гущыIэу «априлис» зыфиIорэм къытекIыгъ, ащ имэхьаныр «зыкъызэIухыгъэныр». Ар къыгъэшъыпкъэжьэу псым ылъэныкъо­кIэ «IункIыбзэхэр» къызэIуихыщтых. Къызыщещхыщт мафэхэр къыхэкIыщтых.
ГидрометеорологиемкIэ ыкIи тыкъэ­зыуцухьэрэ дунаим иуплъэкIункIэ Адыгэ республикэ Гупчэм ипащэу А. Митровым къызэриIуагъэмкIэ, икIыгъэ мазэм нахьи фабэр градуси 9 — 10-кIэ нахьыбэщт. Арктическэ жьы чъыIэу къэкIощтым ыпкъ къикIыкIэ ошIэ-дэмышIэу къызщыучъыIыщт мафэхэр къы­хэфэщтых.
Илъэс зэкIэлъыкIохэм лъыплъэн Iофтхьабзэу рагъэкIокIыгъэхэм къызэрагъэлъэгъуагъэмкIэ, анахь зыщычъы­Iэгъэ мэлылъфэгъу мазэр 2004-рэ илъэсыр ары ыкIи градуси 7,6-рэ щтыргъукI щыIагъ. Анахь зыщыфэбагъэм — 1998-рэ илъэсым, градусыр 37-м нэсыгъагъ. Ощхыбэ къызещхы­гъэр — 1980-рэ, анахь гъушъэу мэлылъфэгъур къызыщыхэкIыгъэр — 1971-рэ илъэсхэр.
Мы илъэсым мэлылъфэгъум ощхэу къещхыщтыр шапхъэхэм афэдизыщт е нахь мэкIэщт. Мазэр екIыфэ огъу-огъоу къещхыщт, шыблэр гъогъощт. Зыщыпщэгъощт чIыпIэхэр къыхэфэщтых.
Апэрэ мэфипшIыр
Фабэу чэщым градуси 2 — 7, мафэм градуси 10 — 15 щыIэщт, градус 25-м кIахьэу къызщыфэбэщт мафэхэри къы­хэкIыщтых. Къушъхьэ лъапэхэм къащигъэщтыщт, чъыIэр градуси 2-м нэсэу къехыщт.
ЯтIонэрэ мэфипшIыр
Мафэм фабэр градус 13 — 18-м фэдизыщт, градус 23-м зыщынэсыщт мафэхэри къыхэфэщтых. Чэщым фабэр градуси 4 — 9-м нэсыщт.
Ящэнэрэ мэфипшIыр
Мы уахътэм фабэр нахь къыдэкIоещт ыкIи градус 23 — 28-м зыщынэсыщт мафэхэр къыхэкIыщтых. Чэщхэри чъыIэщтхэп, фабэр градуси 5 — 10-м фэдизыщт.
Республикэм ипсыхъохэр къыдэкIынхэм ищынагъо щыIэп, псэу адэтыр шапхъэхэм атет.
Iэшъынэ Сусан.