Урысые зэнэкъокъоу «Илъэсым имастер» зыфиIорэм изэфэхьысыжьхэр къэнэфагъэх. ТекIоныгъэ къыдэзыхы­гъэр Мыекъопэ медицинэ колледжым икIэлэегъаджэу ГъукIэлI Марин.

ЯтIонэрэ чIыпIэр фагъэшъошагъ Андырхъое Хъусен ыцIэ зыхьырэ кIэлэ­егъэджэ колледжым иIофышIэу Елена Герцовам, ящэнэрэ хъугъэ Красногвардейскэ мэкъумэщ техникумым икIэлэ­егъаджэу Елена Гусаковар.
ГъукIэлI Маринэ зэнэкъокъум текIоныгъэ къызэрэщыдихыгъэм рэгушхо, иIофшIэнкIэ шIуагъэ къызэрэфихьыщтыр къеIо.

— УкIэлэегъэджэ ныбжьыкIэ зыхъукIэ, уишIэныгъэхэм ренэу ахэбгъэхъон фае. Мыщ фэдэ мэхьанэшхо зиIэ зэнэкъо­къум апэрэу сыхэлэжьагъ. Ар зихьатырыр сиIофшIэгъоу, егъэджэн IофхэмкIэ пащэм игуадзэу Ольга Кононенкэр ары. 2023-рэ илъэсым мы зэнэкъокъум те­кIоныгъэ ащ къыдихыгъагъ. Анахьэу унаIэ зытебгъэтын фаехэр къысиIохэзэ зызгъэхьазырыгъ ыкIи текIоныгъэ къыдэсхынымкIэ ишIогъэшхо къысэкIыгъ, — еIо тигущыIэгъу.
КIэлэегъэджэ ныбжьыкIэм апэрэ уцугъом къыщигъэлъэгъогъэгъэ видеотехыгъэм осэ ин къыфашIыгъ. Ар тIоу гощыгъэу зэхигъэуцуагъ, апэрэм сэмэр­къэу нэшанэ хэлъэу, ятIонэрэм ищыIэныгъэ гъогу къыщыриIотыкIыгъ, иIоф­шIэнкIэ анахьэу ыгъэфедэрэ шIыкIэхэр къыгъэлъэгъуагъэх. ЗэIухыгъэ егъэджэн сыхьатыр лъыдэкIуаер зэрэпшыщтым фэгъэхьыгъагъ. Ар зигъо Iофыгъоу щыт, гу-лъынтфэ узхэм апкъ къикIэу зидунай зыхъожьыхэрэм ыкIи сэкъатныгъэ хэзыхыхэрэм япчъагъэ хэхъо. Апэрэ IэпыIэгъу псынкIэм къыдилъытэрэр лъыдэкIуаер тэрэзэу, шапхъэхэм адиштэу пшыныр ары. Ахэр Маринэ къыщыриIотыкIыгъэх.
— Мы зэнэкъокъум сишIэныгъэхэр къызэрэзгъэлъэгъуагъэм дакIоу нэмыкI кIэлэегъаджэхэм яIофшIэн зэрэзэхащэрэр слъэгъугъэ, щысэ зытепхын плъэ­кIыщт лъэныкъохэр бэу сыгу исыу­бытагъ. Урысые зэнэкъокъум сыхэлэ­жьэнэу синасып къыхьыгъ, сэ сшъхьэ за­къоп, Iоф зыщысшIэрэ медицинэ кол­леджыр, сызыщыпсэурэ республикэр зэрифэшъуашэу къызэрэзгъэлъэгъощтым ыуж ситыщт, — еIо Маринэ.
Бзылъфыгъэ ныбжьыкIэм иIофшIэн фэщагъэу, шIу ылъэгъоу егъэцакIэ. Медицинэ сэнэхьатым ищыIэныгъэ рипхынэу сыдигъокIи фэягъ. Тэхъутэмыкъое районымкIэ Инэм дэт гурыт еджапIэр къызеухым, Краснодар дэтыгъэ медицинэ еджапIэм чIэхьагъ, ау 2018-рэ илъэсым еджапIэр зэфашIыжьи, Санкт-­Петербург дэт университетыр къыу­хыжьыгъ, апшъэрэ сестринскэ гъэ­сэ­ныгъэ зэригъэгъотыгъ. IофшIэн лъыхъу зэхъум къин ылъэгъугъ, сыда пIомэ гурыт сэнэхьат зиIэ медсестрахэр ары анахьэу сымэджэщхэм ящыкIэгъагъэр. Ащ къыхэкIэу аккредитацие ышIи, джыри еджэзэ IофшIэныр ригъэжьагъ. Зэпахырэ узхэмкIэ сымэджэщым операционнэ медсестрау илъэс заулэрэ Iоф щишIагъ. Ковидым илъэхъани чанэу Iоф зышIагъэхэм ащыщ.
Маринэ унагъо ихьи Мыекъуапэ къы­зэкIожьым зэпахырэ узхэмкIэ сымэ­джэщым IофшIэныр щыригъэжьэгъагъ. 2023-рэ илъэсым къыщегъэжьагъэу медицинэ колледжым кIэлэегъаджэу щэлажьэ. Медсестрам иIофшIэн епхыгъэ гъэсэныгъэр аригъэгъотыным, яIофшIэн гъэшIэгъонэу зэхищэным ауж ит.
— Илъэс заулэрэ медсестрау Iоф зэрэсшIагъэм ишIуагъэ къэкIуагъ, студентхэм яегъэджэн сыхьат афызэхасщэ зыхъукIэ, сэ сызэолIэгъэ хъугъэ-шIагъэ­хэр къафэсэIуатэ. Лекцие къэптыныр зы, ар зэрагъэфедэжьырэм мэхьанэ­шхо иI. КъэIогъэн фае, практическэ Iоф­шIэныр зэхэпщэнымкIэ колледжыр зэте­гъэ­псыхьагъ, ищыкIэгъэ Iэмэ-псымэхэр зэ­кIэ тиIэх. Тистудентхэм шIэныгъэ ку­ухэр ятэгъэгъоты, — къыIуагъ кIэлэегъэджэ ныбжьыкIэм.
ГъукIэлI Маринэ мэзэ заулэкIэ зэнэ­къокъум иурысые уцугъо хэлэжьэщт. ИшIэныгъэхэмкIэ къызэрахэщыщтым ыуж ит, лъэныкъоу зыкъызэригъэлъэгъощтым зыфигъэхьазырынэу ыублагъ.
ДЕЛЭКЪО Анет.