Шъачэ щызэлъашIэщтыгъэ дзюдоистэу Сергей Тороян ишIэжь фэгъэхьыгъэ зэнэкъо­къухэр ПсышIопэ районым ит поселкэу Сергей-Поле игурыт еджапIэу N 85-м щыкIуагъэх.

Ахэм ахэлэжьагъэх спорт­смен ныбжьыкIэхэу илъэси 10-м нэс зыныбжьыхэр, къа­лэ-курортым хэхьэрэ районхэм ахэр къарыкIыгъэх.
Олимпийскэ резервым испорт еджапIэу N 24-м тренерэу щылэжьэрэ Хьатх ­Мэдинэ ыгъасэрэмэ медаль заулэ ащ къыщыдахыгъ. Бэнэныр езыгъэжьэгъэкIэ Тимур Соколовым апэрэ чIыпIэр къыхьыгъ, ар килограмм 26-рэ къэзыщэчырэ купым хэтэу бэнагъэ; Мирон Федориныр ыкIи Арман Чобанян апэрищмэ ахэфагъэх, кг 34-рэ къэзыщэчырэмэ ахэ­тыгъэх.
ЯщыIэныгъэкIэ апэрэ медальхэр къыдахыгъэх ШэхэкIэй щыщхэу Кобжьхэу Рэмэзанрэ Осмэнрэ. Рэмэзан чем­пион хъугъэ, Осмэн ты­жьыныр къыхьыгъ.
— Бэнэныр езыгъэжьэ­гъакIэхэмкIэ мыщ фэдэ зэ­нэкъокъухэм мэхьанэ яI, — къыхигъэщыгъ Хьатх Мэдинэ. — Гъэхъагъэу ашIырэр арэп анахь шъхьаIэр, мыщ акIуачIэ апэрэу щаушэты, зэнэкъокъуныгъэм иIэ­шIугъэ щызэхашIэ, алырэгъум утехьаным итхъагъо къа­гурэIо. ТибэнэкIо цIыкIумэ сагъэгушIуагъ, дэгъоу зыкъагъэлъэгъуагъ.
Ныбэ Анзор.