АкIэгъу Миленэ итекIоныгъ
Къуаджэу Псыбэ щыщ спортсменкэ ныбжьыкIэм хэхъоныгъакIэхэр ышIыгъэх.
Мызэу, мытIоу ягугъу къэтшIэу хъугъэ хы ШIуцIэ Iушъом щыпсэурэ чемпион унагъоу АкIэгъухэм — Миленэ, Руслъан ыкIи Камилэ. Ахэр янэ-ятэхэм ягъусэхэу Ямало-Ненецкэ автоном хэку чы-
жьэм ит къалэу Надым джырэ уахътэм щэпсэух. БэнэнымкIэ олимпийскэ резервым хэхьэрэ кIэлэцIыкIу-ныбжьыкIэ спорт еджапIэу «Пэрыт» зыфиIорэм ахэм зыщагъасэ. Сэнаущыгъэ зыхэлъ спортсменхэм, зыгъасэхэрэр IэпэIэсэныгъэшхо зыхэлъ Оруджовхэу Ниджатрэ Полинэрэ, самбэмрэ дзюдомрэкIэ муниципальнэ, шъолъыр ыкIи урысые зэнэкъокъухэм нэбгырищым атегощагъэу медалишъэм къехъу къыдахыгъах.
БэмышIэу АкIэгъухэм яунагъо джыри зы хъугъэ-шIэгъэ гушIуагъо къихъухьагъ: япшъэшъэ нахьыжъэу Миленэ, илъэс пшIыкIубл зыныбжь спортсменкэу УрысыемкIэ анахь гъэхъэгъабэ зиIэм, самбэмкIэ хэгъэгум изэнэкъокъухэу илъэс 20-м нэс зыныбжьыхэр зыхэлэжьагъэхэм джэрз медаль къащыдихыгъ.
— А гъэхъагъэм ишIуагъэкIэ самбэмкIэ спортым имастер ар хъугъэ, — къыIотагъ Полина Оруджовам. — Къыхэгъэщыгъэн фае, 2023-рэ илъэсым Миленэ Надымскэ районым испортсмен анахь дэгъоу къыхагъэщыгъ. Тиспорт еджапIэ пштэмэ, ащ илIыкIо мыщ фэдэ цIэ лъапIэр къызэрэфагъэшъошагъэр апэрэ. «Пэрытым» игъэсакIохэри испортсменхэри аэропортым Миленэ щыпэгъокIыгъэх, фэбагъэ хэлъэу къырагъэблэгъэжьыгъ.