ТекIоныгъэм и Музей ыкIи къэралыгъо фондэу «Хэгъэгум иухъу­макIохэр» кIэщакIо зыфэ­хъугъэхэу кIэлэцIыкIу сурэт­шIыгъэхэм я Дунэе зэнэкъокъоу «Хэгъэгум иухъумакIохэр. ГущыIэ пытэхэм арэгъуазэх» зыфиIорэм икIэуххэр зэфахьысы­жьыгъэх.

Къэралыгъо фондым ишъолъыр къута­мэ къырагъэблэгъагъэх зэнэкъокъум текIоныгъэ къыщыдэзыхыгъэхэр, ахэм янэ-ятэхэр ыкIи якIэлэегъаджэхэр. Лъы­тэныгъэ зыфашIырэ хьакIэу къекIолIагъэхэм ащыщых Мыекъопэ къэралыгъо технологическэ университетым и Дзэ-­егъэджэн Гупчэ ыкIи УФ-м зыкъэухъу­мэжьынымкIэ и Министерствэ и Дзэ-­социальнэ Гупчэ ялIыкIохэр.
Фондым иIофышIэхэр ыкIи хьакIэхэр Дунэе зэнэкъокъум ишъолъыр едзыгъо текIоныгъэ къыщыдэзыхыгъэ сурэтышI ныбжьыкIэхэм ягуапэу афэгушIуагъэх, мэхьанэшхо зиIэ проектым зэрэхэлэжьагъэ­хэмкIэ, патриотическэ гупшысэу яIэхэр къыраIотыкIын зэралъэкIыгъэмкIэ рэзэныгъэ зыхэлъ гущыIэхэр афагъэ­загъэх. Джащ фэдэу текIоныгъэ къы­дэзыхыгъэ­хэм творческэ IофшIэным щагъэфедэн алъэкIыщт пкъыгъохэр, IэшIу-IушIухэр зы­хэхьэгъэ шIухьафтынхэр аратыгъэх.
Мыекъуапэ, Тэхъутэмыкъое ыкIи Красногвардейскэ районхэм къарыкIыгъэ ныбжь зэфэшъхьаф зиIэ сурэтышI цIыкIухэр яIофшIагъэхэм къатегущыIагъэх, купкIэу акIоцIалъхьагъэр къыраIотыкIыгъ.
Шъолъыр фондым ичIэхьапIэ зэнэкъо­къум къырахьылIэгъэ сурэтшIыгъэхэм якъэгъэ­лъэгъон къыщызэIуахыгъагъ. Зэхэща­кIо­хэм къызэрэхагъэщыгъэмкIэ, Хэгъэгу зэошхом ТекIоныгъэр къызыщыдахыгъэ Мафэм ипэгъокIэу респуб­ликэм ыкIи районхэм яобщественнэ чIыпIэхэм аща­гъэуцущт баннерхэм а сурэтшIыгъэхэр къащагъэлъэгъощтых.
ХэгъэунэфыкIыгъэн фаер, Iофтхьабзэм имурадыр лIыхъужъхэм яшIэжь ыкIи хэу­шъхьафыкIыгъэ дзэ операцием ихъу­гъэ-шIагъэхэр къызэтегъэнэгъэнхэр, пат­риотизмэр ыкIи гушхоныгъэр ахэ­лъэу, Хэгъэгу зэошхом ыкIи хэушъхьафыкIыгъэ дзэ операцием яветеранхэм шъхьэ­кIафэ афашIэу къыткIэхъухьэрэ лIэужхэр пIугъэнхэр ары. НыбжьыкIэхэм ятворческэ IэпэIэсэныгъэ къызэIуахынымкIэ мы зэнэкъокъур амалышIоу зэрэщытым имызакъоу, блэкIыгъэм ыкIи мы уахътэм илIыхъужъхэм зэрахьэгъэ лIыгъэм, пытагъэм ятарихъ нэIуасэ зэрэфэхъущтхэм изы амал.
— Мыщ фэдэ зэнэкъокъухэм ныбжьыкIэхэр якъэралыгъо рыгушхонхэм фепIух, мамырныгъэр ыкIи зыпкъитыныгъэр пытэнхэм ямэхьанэ нахь зэха­шIыкIы, ахэм дакIоу, патриот мэхъух, — къыIуагъ шъолъыр фондым ипащэ игуадзэу Джарымэ Еленэ.
Нэужым къэзэрэугъоигъэхэм ащ къа­фиIотагъ бзылъфыгъэхэм я Дунэе мафэ ипэгъокIэу Президентэу Владимир Путиным IукIэнэу зэрэхъугъэр.
КIэлэцIыкIухэм ятворчествэкIэ мыр апэрэ зэнэкъокъоп, икIыгъэ илъэсми мыщ ехьыщырэу зэхащэгъагъ. Джащ фэдэу мэфэкI мафэхэм афэгъэхьыгъэу шъолъыр фондым кIэлэцIыкIухэм афызэхищэрэр бэ.
Iэшъынэ Сусан.