Адыгеим и ЛIышъхьэу КъумпIыл Мурат тхьа­мэтагъор зыщызэрихьэгъэ зэIукIэм илъэсыбэрэ къызыпыкIэрэ пхъэшъхьэ-мышъхьэ чъыгхэр ­зэрагъэтIысхьащтхэм, республикэм имелиоративнэ системэ зызэрэрагъэушъомбгъущтым, фермэ цIыкIухэр нахьыбэ зэрашIыщтхэм ыкIи нэмыкI Iофыгъохэм щатегущыIагъэх.

Iофтхьабзэм хэлэжьагъэх АР-м иминистрэхэм я Ка­бинет и Тхьаматэ игуадзэу ЛIыхэсэ Махьмуд, АР-м ­мэкъу-мэщымкIэ иминистрэу Къуанэ Анзаур, агропромышленнэ комплексым къэралыгъо IэпыIэгъу егъэгъотыгъэным фытегъэпсыхьэгъэ программэхэм ахэлэжьэрэ мэкъумэщ предприятиехэм япащэхэр.
ЗэIукIэр къызэIуихызэ республикэм и ЛIышъхьэ зэрэхигъэунэфыкIыгъэмкIэ, Урысыем и Президентэу Владимир Путиным IэкIыб къэралыгъохэм къащахьы­жьырэ продукцием фэдэхэр тикъэралыгъо къыщыдэгъэ­кIыгъэнхэмкIэ, хэгъэгум гъо­м­ылапхъэхэр фикъунхэмкIэ пшъэрылъхэр шъолъырхэм къафигъэуцугъэх. Мэкъу-мэщым IэпыIэгъу егъэгъотыгъэ­нымкIэ федеральнэ амал пстэури Адыгеим щызэрахьэ, фэгъэкIотэныгъэ заулэхэу республикэм щафашIыхэрэм яшIуагъэкIэ шъолъырым мэкъумэщ продукциеу къыща­хьыжьырэм хэхъуагъ.
«Непэ тэ пшъэрылъ шъхьа­Iэу тиIэр мэкъу-мэщым зэхъо­кIыныгъэ фэшIыгъэныр, илъэ­сыбэрэ къызыпыкIэщт пхъэшъхьэ-мышъхьэ чъыгхэр дгъэ­тIысхьэхэзэ, мелиорацием зедгъэушъомбгъузэ къэтхьыжьырэр нахьыбэ тшIыныр ары. Мы лъэныкъомкIэ Iэпы­Iэгъоу ядгъэгъотыщтым ыкIи ащкIэ проектэу итхъухьэхэрэм татежъугъэгущыI», — къы­Iуагъ КъумпIыл ­Мурат.

Адыгеим иминистрэхэм я Кабинет и Тхьаматэ игуадзэ зэIукIэм зэрэщыхигъэунэфыкIыгъэмкIэ, мэкъу-мэщым хэхъоныгъэ зэрэрагъэшIыщт программэм къыщыдэлъытагъ илъэсыбэрэ къызыпыкIэрэ пхъэшъхьэ-мышъхьэ чъыгхэм ягъэтIыс­хьанкIэ ыкIи мелиорациемкIэ IэпыIэгъу зэфэшъхьафхэр ягъэ­гъотыгъэнхэр. Ащ хэхьэ фэгъэ­кIотэныгъэ зиIэ чIыфэхэр, чъыг­хатэхэм язэтегъэпсыхьанкIэ субсидиехэр къазэраратыщт­хэр, пхъэшъхьэ-мышъхьэ Iыгъы­пIэхэм яшIын пэIухьэрэ мылъкур къафэлъэгъужьыгъэныр.
Мыгъэ гектар 400-мэ чъыгхэр ащызгъэтIысхьанхэу изыхъу­хьэрэ хъызмэтшIапIэхэм яспис­кэ зэхагъэуцогъах. Ащ пае сомэ миллион 296,2-рэ къатIупщыщт. Мы илъэситIу благъэм гектар 500-мэ ыкIи 600-мэ чъыгхэр ащагъэтIысхьанхэу рахъухьэ.
2024-рэ илъэсым къыщегъэ­жьагъэу мылъкоу агъэкIодыгъэм къазэрафырагъэгъэзэжьырэм дакIоу ахъщи къафатIупщы хъугъэ. ТапэкIэ хъызмэтшIапIэхэм ямылъкукIэ чъыгхэр агъэтIыс­хьэхэти, ыужкIэ субсидиехэр къаратыжьыщтыгъэмэ, джыдэ­дэм субсидиер зэу къаIэкIа­гъахьэ, ащкIэ чъыгхэр, пкъэу-­
хэр къащэфых ыкIи нэмыкI IофшIэнхэм апэIуагъахьэх.
МелиорациемкIэ программэм диштэу мыгъэ чIыгу гектар 662,3-мэ IофшIэн зэфэ­шъхьаф­хэр ащагъэцэкIэщтых, сомэ миллиони 101,2-рэ ахэм апэIуа­гъэхьащт.
Адыгеим социальнэ-экономикэ хэхъоныгъэмкIэ иунэе программэ джащ фэдэу цумпэхэр зылэжьыхэу IофшIэныр езыгъэжьэгъакIэхэм сомэ миллиони 100 хъурэ субсидиехэр къафыхэгъэкIыгъэныр къыщыдэлъытагъ. «АгростартапымкIэ» грант IэпыIэгъури лъагъэкIотэщт.
Агропромышленнэ комплексым щырахъухьгъэ проектхэу къэралыгъо IэпыIэгъу зэрагъэгъотыхэрэм япхырыщын зэрэ­кIорэми нэужым тегущыIагъэх. Фермер хъызмэтшIапIэхэм ялIы­кIохэм гухэлъэу яIэхэр, IэпыIэгъу лъэпкъэу къызыфа­гъэфедэхэрэр, лэжьыгъэм икъэ­гъэкIын мылъкоу пэIуагъэхьагъэм зыкъызищэфыжьыщтыр къаIотагъ. Пхъэшъхьэ-мышъхьэ чъыг лъэпкъ зэфэшъхьафхэу, дэшхо чъыгхэу, цумпэхэу рес­публикэм щагъэтIысхьэхэрэм янахьыбэр тихэгъэгу къызэрэщагъэкIыгъэхэр, ахэр тихэгъэгу ишъолъыр зэфэшъхьафхэм зэращаIуагъэкIырэр зэIукIэм щы­хагъэунэфыкIыгъ.
Республикэм чъыг къэгъэ­кIыпIэхэр иIэнхэ фаеу КъумпIыл Мурат ылъытагъ, пхъэшъхьэ-мышъхьэу, цумпэу къахьы­жьыхэрэм адэлэжьэщтхэу Адыге­им щыпсэухэрэм зэдэлэжьэныгъэ адыряIэн алъэкIыщтмэ чъыгхэтэлэжьхэм зэра­гъэшIэнэу игъо афилъэгъугъ.
Щэ къызыкIахырэ мышъхьэ, лы къэзытырэ былымышъхьэ пчъагъэм зыкъегъэIэтыгъэн зэрэфаеми зэIукIэм щытегущыIагъэх. Адыгеим и ЛIышъхьэ зэрэхигъэунэфыкIыгъэмкIэ, рес­публикэр лъэшэу зэрыгушхорэ адыгэ къуаеу къыдагъэкIырэм илъэс къэс хэхъо, ащ епхыгъэу чэмышъхьэ пчъагъэми зыкъегъэIэтыгъэн фаеу пшъэ­рылъ къэуцу. Къэралыгъо IэпыIэгъу зэрарагъэгъотырэ программэхэм афэгъэхьыгъэ къэбархэр жъугъэу цIыфхэм зэлъягъэшIэгъэн, чIыгур зыгъэфедэхэрэр былымхъуным чанэу хэщэ­гъэнхэ фае.
АР-м и ЛIышъхьэ ипресс-къулыкъу къытырэ къэбархэмкIэ
ЛIышэ Саныет.