Урысые олимпиадэу «Софиум» зыфиIорэм Адыгеим икIыгъэ ныбжьыкIэхэр хэлэжьагъэх ыкIи дышъэ медалитIурэ зы тыжьынрэ къалэжьыгъ.

Хэдзынхэм афэгъэхьыгъэ Урысые олимпиадэр мы илъэсым я 6-у зэхащэ. Мыгъэ апшъэрэ классхэм ащеджэрэ нэбгырэ мин 15,5-рэ хэлэжьагъ. Къэралыгъом ишъолъырхэм зэкIэми ныбжьыкIэхэр къарыкIыгъагъэх.
Олимпиадэр уцугъуищэу гощыгъагъ. Апэрэ шъолъыр уцугъом я 10 — 11-рэ классхэм ащеджэрэ нэбгыри 106-рэ хэлэжьагъ. Хэдзынхэм ошIэ-дэмышIэ Iоф къащыхъугъэмэ зэрэзекIощтхэр ныбжьыкIэхэм къыраIотыкIыгъ ыкIи хэдзынхэмкIэ фитыныгъэхэм япхыгъэ эссе атхыгъ. Тыгъэгъэзэ мазэм анахь дэгъоу зыкъэзыгъэлъэгъо­гъэ нэбгыритфымэ тест шIыкIэм тетэу заушэтыгъ. Хэдзынхэм афэгъэхьыгъэ упчIэ 30-мэ яджэуапхэр такъикъ 30-м къыкIоцI къа­ратыжьыгъэх.

Олимпиадэм иаужырэ едзыгъоу Мос­ква щыкIуагъэм шъо­лъыр уцугъохэм текIоныгъэ къа­щыдэзыхыгъэ ныбжьыкIи 106-рэ хэлэжьагъэх. Ахэм ахэтыгъ рес­публикэм икIыгъэ нэбгырищ.
Адыгеим икIыгъэ кIэлэеджа­кIохэр ятIонэрэу ащ хэлэжьа­гъэх ыкIи къэгъэ­лъэгъон дэгъу­хэр яIэх. Лицееу N 8-м ия 11-рэ класс щеджэрэ Татьяна Дорошенкэр (кIэлэегъаджэр Эмма Осерскаяр) Iофтхьабзэм ятIо­нэрэу мыгъэ хэлэжьагъ. Гъэ­рекIо ащ анахь балл ин къыхьыгъагъ ыкIи апэрэ чIыпIэр къыфагъэшъошэгъагъ. Мы илъэсми дышъэ медаль къылэжьыгъ. Джащ фэдэу Тэхъу­тэмыкъое районымкIэ гурыт еджапIэу N 27-м ия 10-рэ класс ис Никита Бережноим (кIэлэ­егъаджэр Натхъо Саид) къэгъэ­лъэгъон дэгъухэр иIэх, ащи текIоныгъэ къыдихыгъ.

Гурыт еджапIэу N 15-м ия 11-рэ класс щеджэрэ Марат Цогоевыри ишIэныгъэ­хэмкIэ къахэщыгъ, ятIонэрэ чIыпIэр къыдихыгъ (кIэлэегъаджэр Зоя Блинда).
Дипломхэр зэрафагъэшъошагъэм имызакъоу, «Ресурс об одаренных детях» зыфиIорэм ахэр хагъэуцуагъэх. Я 11-рэ классым исхэр Москва дэт къэралыгъо юридическэ академиеу О. Кутафиным ыцIэ зыхьырэм чIэхьанхэмкIэ тедзэу балли 3 къафыхагъэ­хъощт. Я 10-рэ классым щеджэхэрэр кIэлэцIыкIу гупчэу «Артекым» зыщагъэпсэфын ыкIи къэкIорэ илъэсым зэнэкъо­къум хэлэжьэнхэ амал яIэщт.
ДЕЛЭКЪО
Анет.
Сурэтхэр: АР-м хэдзынхэмкIэ и Гупчэ комиссий.