КIэлэцIыкIухэр, зихэхъогъухэр, илъэси 10-м щегъэжьагъэу 18-м нэс зыныбжьхэр мэшIокугъогу транспортым ыпкIэу нахьыжъхэм атырэм ызыныкъо уасэкIэ зекIонхэу фитыныгъэ къязытырэ унашъо УФ-м и Правительствэ ыштагъ, кIуачIи иIэ хъугъэ.

Къалэхэр зэзыпхырэ мэшIоку транспортыр ары зигугъу ащ къыщишIырэр. Илъэс псаум, еджапIэу зычIэсыр къэзыушыхьатырэ тхылъ аIыгъыни имыщыкIэгъэжьэу, ащ фэдэ уасэкIэ унагъом кIэлэцIыкIухэр зэрищэнхэ амал джы иI. Уф-м и Правительствэ иунашъо къызэрэщиIорэмкIэ, я 2-рэ ыкIи я 3-рэ класс зиIэ вагонхэр, «плацкартный», «общий» зыфаIохэрэр ары къыхиубытэхэрэр.
НахьыпэкIэ мэшIокугъогу транспортымкIэ кIэлэцIыкIухэр зезыщэхэрэм апае фэгъэкIотэнхэр щылэ мазэм и 1-м щыублагъэу жъоныгъуакIэм и 31-м ыкIи Iоныгъом и 1-м щыублагъэу тыгъэгъазэм и 31-м анэс зыщыIэщтыгъэхэр. КIэлэцIыкIур е зихэхъо­гъур еджапIэм зэрэчIэсым фэгъэхьыгъэ тхылъыр шIокI имыIэу аIыгъын фэягъ.
Сабый зэрыс унагъохэмкIэ, анахьэу сабыибэ зыпIухэрэмкIэ, мыр къэбар дэгъу. Сыда пIомэ, зыгъэ­псэфыгъо уахътэр къэблагъэ, кIэлэеджакIохэм гъэмэфэ каникулхэр рагъэжьэщтых, ны-тыхэми отпускхэр аштэщтых. Ар зэрагъэкIощтым пэIуагъэхьащтыр джы нахь макIэ хъущт. Къыдэлытэгъэн фаер мы уахътэм пассажирхэр зезыщэрэ къухьэлъатэхэр Къыблэ шъо­лъырым макIэу зэрэщыбыбыхэрэр, ащ фэшI мэшIокур нахьыбэу цIыфхэм зэрагъэфедэрэр ары.
— Гъэмэфэ уахътэм мэшIокукIэ тисабыйхэр тигъусэхэу зыдгъэпсэфынэу тыкIон гухэлъ тиI. Арышъ, сабыищым апае билетхэр процент 50-кIэ нахь пыутэу къэтщэфынхэ тлъэ­кIынэу зэрэхъугъэр тигуапэ. Къызэрэтшъхьэпэщтым Iо хэлъэп. Сабыибэ зиIэ унагъохэмкIэ ар къэбар дэгъу, — еIо сабыибэ зиIэ нэу АкIэгъу Фатимэ.
КIэлэцIыкIоу илъэситфым зыныбжь шIомыкIыгъэхэр мэшIокухэм ыпкIэ хэмылъэу, сыд фэдэ вагон исми, зэращэнхэу фитыныгъэ щыI. Сабыим ыныбжь илъэси 10-м шIомыкIыгъэмэ, кIэлэцIыкIухэм апае щыIэ тарифымкIэ билетхэр къащэфынхэ алъэкIыщт. ЗэIухыгъэ Iахьзэхэлъ обществэу «Урысые мэшIокугъогухэр» зыфиIорэм къызэритыгъэмкIэ, зыныбжь илъэси 10-м шIомыкIыгъэ кIэлэцIыкIухэм апае шапхъэу щыIагъэхэр къэнэжьых. Ащ къыхиубытэхэрэр Урысые Федерацием игражданинхэр ары.
— МэшIокур бэрэ тиунагъокIэ дгъэфедэрэп, ау илъэсым зэ сабыйхэр тигъусэхэу зыдгъэ­псэфынэу нэмыкI шъолъыр тэкIо. Шъыпкъэу пIощтмэ, транспортыр лъапIэу къытфыдэкIы. Джы сабыйхэм апае билетхэм ауасэ ызыныкъо нахьыбэ зэралъытымытыщтым ишIогъэшхо къытэкIыщт. Ахъщэу къызэтенэрэр языгъэпсэфын пэIудгъэхьащт, — ыIуагъ пшъэшъищымэ янэу Шъхьэлэхъо Светланэ.
Компаниеу «Урысые мэшIокугъогухэр» зыфиIорэм мэкъуогъу мазэмкIэ билетхэм ящэн рагъэжьагъэу къытыгъ. Мы зигугъу къэтшIыгъэхэм анэмыкIэуи зекIоныр къэзгъэпыутыщт фэгъэкIотэнхэр, хэушъхьафыкIыгъэ предложениехэр зэряIэхэр ащ къыщыхагъэщы. ГущыIэм пае, зыныбжь илъэс 60-м шIокIыгъэхэм, студентхэм, хэушъхьафыкIыгъэ дзэ операцием хэлажьэхэрэм ахэр агъэфедэнхэ алъэкIыщт. Ары пакIошъ, сабыибэ зиIэ унагъохэм джыри нэ­мыкI фэгъэкIотэнхэр къафаугупшысыгъэх. Арышъ, гущыIэгъу тызыфэхъугъэ бзылъфыгъэу, сабыибэ зыпIухэрэм мэшIокугъогу танспортыр зэпстэумэ анахь Iэрыфэгъу къызэрафэхъущтым Iо хэлъэп.
Зыгъэхьазырыгъэр
ХЪУТ Нэфсэт.