«Тхылъым идунай гъэшIэгъон тхылъеджакIохэр хэпщэн фае», — еIо «Адыгэ Республикэм культурэмкIэ изаслуженнэ IофышI» зыфиIорэ щытхъуцIэр бэмышIэу къызфагъэшъошэгъэ Цуекъо Аминэт. Ар Тэхъутэмыкъое районым итхылъеджапIэхэм ягупчэ иотдел ипащ.

Аминэт иIофшIэн гъогу зэрэщытэу тхылъеджапIэм фигъэхьыгъ. Исэнэхьат зэрэфэшъыпкъэм, хэгъэгум, обществэм шIуагъэ къафихьыным зэрэфэхьазырым къакIэлъыкIоу рэзэныгъэ ыкIи щытхъу тхылъыбэ ащ къылэжьыгъ.
— Зы шъэф горэ къыдэзгъо­тэнэу сежэзэ тхылъым седжэ. Тхылъым узэрыгущыIэрэ бзэм кIуачIэ къыхелъхьэ, къегъэбаи, дунаикIэ къыпфызэIуехы. Романэу узаджэрэм хэтхэм ягу­къауи ягушIуагъуи адэогощы. ЕджапIэр къызысэухым кондитер сэнэхьатым сыфеджэнэу Краснодар сыкIуагъ, ау мазэ нахь темышIагъэу сыкъычIэкIы­жьыгъ. Сянэрэ сятэрэ тикъуа­джэ дэт тхылъеджапIэм сыIуагъэхьанэу сялъэIугъ, Iоф сшIэзэ сыфеджэжьынэу Iогъэ пытэ ястыгъ. Джащ щыублагъэу илъэс 46-рэ хъугъэу Тэхъутэмыкъое тхылъеджапIэм сыщэла­жьэ,— къеIуатэ тигущыIэгъу.
ТхылъеджапIэхэр псэупIэхэм якультурнэ гупчэх. Хъытыум, технологиякIэхэм дунаир зыщызэлъаштэгъэ лъэхъаным ахэр IугъэкIотыгъэ хъугъагъэх, ау аужырэ илъэсхэм псэ къапыкIэжьыгъэу щыIэкIакIэ агъотыжьы. АщкIэ зишIогъэшхо къэкIуагъэр лъэпкъ проектэу «Культурэр» ары. Ащ къыдыхэлъытагъэу муниципальнэ модельнэ тхылъеджапIэхэм ягъэпсынкIэ проектэу «Культурная среда» зыфиIорэм 2019-рэ илъэсым иIофшIэн ыублагъэу хэхъоныгъэшIухэр ешIы.
ЫпшъэкIэ зигугъу къэтшIыгъэ гупчэм тхылъеджэпIэ 23-рэ епхыгъ, 3-р — кIэлэцIыкIухэм апай.
— Илъэсым къыкIоцI тигупчэ Iоф­шIэнышхо зэшIуехы. Къытэпхыгъэ тхылъеджапIэхэм ятхылъ фондхэр зэпымыоу тэгъэбаих. ТхылъыкIэхэм ялъэтегъэуцохэм такъырагъэблагъэ, ахэр къэтэщэфых. ЕджэкIо цIыкIу­хэр тхылъым зэрыкIэдгъэгушIукIыщтхэм тыпылъ, ащ мэхьанэу иIэр агурытэгъаIо,— къе­Iуатэ Аминэт.
Непэрэ мафэм гупчэр зыдэлэжьэрэ лъэныкъохэм такIэупчIагъ.
— Лъэпкъ электроннэ тхылъ­еджапIэм ипортал тиI. Тхы­лъэу мыщ чIэмылъхэр ащ къырагъо­тэнхэ алъэкIы. Къытэпхыгъэ тхылъеджапIэхэм яIоф­шIэн зэрифэшъуашэу зэхащэнымкIэ непэ амалышIухэр аIэкIэлъ. «НРБИС» зыфиIорэ электроннэ каталогым тыдэлажьэ,— къы­Iуагъ тигущы­Iэгъу.
ТхылъеджапIэм иIофшIэнкIэ анахь мэхьанэ зиIэхэм ащыщ унэгъо кIоцIым тхылъым щеджэнхэр. Районым ит къоджэ ыкIи къутыр цIыкIухэр къакIухьэхэзэ цIыфхэм тхылъхэр аIэкIагъахьэх. ЩыIэныгъэр зы чIыпIэ итэп, ащ фэд тхылъеджапIэхэри. НыбжьыкIэхэм ямызакъоу зыныбжь хэкIотагъэхэри тхылъеджапIэм къэкIох, еджэнхэу тхылъхэр аштэх. Анахьэу адыгэ лъэпкъым фэгъэхьыгъэ тхылъхэр ашIогъэшIэгъоных.
КIуачIэ къезытырэ унагъор Аминэт лъэшэу егъэлъапIэ. ИкIалэу Рустам илъэс 44-рэ ыныбжь. Ишъхьэгъусэу Заирэ игъусэу унэгъо дахэ зэдашIагъ. Ахэм якIалэу Дамиррэ япшъашъэу Нателэрэ адыгэ шэн-хабзэхэр зэрахьэх. Дамир къуаджэм дэт культурэм и Унэ икъэшъокIо купэу «Нэфылъ» зыфиIорэм къыщэшъо. Илъэс 30-м ехъугъэу бжьэ­хъу­ным унагъор пылъ, къэгъагъэхэри къагъэкIы.
Ипшъашъэу Зухрарэ ащ ишъхьэгъусэу Аслъанрэ унэгъо дахэ яI. ЯкIалэу Салимрэ япшъашъэу Сэтэнайрэ дэгъу дэдэу еджэх, адыгагъэ ахэлъ, лъэпкъ хабзэр зэрахьэ.
— Сыд фэдэ гъэхъагъэ уиIэми, уибын мыгупсэфымэ дунаим зыми пкIэ иIэп, — хегъэунэфыкIы Аминэт.
Лъэпшъыкъо
Фатим.
Сурэтыр: Iэшъынэ Аслъан.