Грант къыдихыгъ
Адыгэ къэралыгъо университетым хэхьэрэ Мыекъопэ къэралыгъо гуманитар-техническэ колледжым ипроектэу «Фыщт» изекIо клуб» зыфиIорэр Владимир Потаниным ифонд ишIушIэ программэу «Спортым ыкIуачI» зыцIэм зэхищэгъэ зэнэкъокъоу «Спортыр зэкIэхэм апай» зыфиIорэм хэлэжьагъ ыкIи текIоныгъэр къыщыдихыгъ.
Проектым игъэцэкIэн пае грантэу сомэ миллиони 4,6-рэ къатIупщыгъ. ЗэкIэмкIи зэхэщакIохэм лъэIу тхылъ 1049-рэ афагъэхьыгъагъ, Урысыем ишъолъыр 40-мэ агъэхьазырыгъэ проект 63-рэ зэнэкъокъум щатекIуагъ.
Проектым къыдыхэлъытагъэу гуманитар-техническэ колледжым зекIо клубэу «Фыщт» щызэхащэщт, ащ кIэпсэ пышIагъэхэр зиIэ паркыр щызэтырагъэпсыхьащт. Паркым Мыекъуапэ щыщ кIэлэеджакIохэу илъэс 13-м къыщегъэжьагъэу 17-м нэс зыныбжьхэм зыщагъэсэщт.
Лъэс зекIоным ыкIи трекингым ятехникэ изэгъэшIэн, апэрэ IэпыIэгъур цIыфым зэрэрагъэкIыщтым, лъэныкъо гупсэм ичIыопс ыкIи ичIышъхьашъо изэрэщыт зэрэхэушъхьафыкIыгъэ шIыкIэр, ошIэ-дэмышIэу къыкъокIырэ къиныгъохэм зэрапэшIуекIощтхэр, нэмыкIхэр зекIо клубым иIофшIэн программэ къыдыхэлъытэгъэщтых.
2023-рэ илъэсым къыщыублагъэу кластерэу «Адыгэ Республикэм зекIонымрэ фэIо-фашIэхэмрэкIэ игъэсэныгъэ гупч» зыфиIорэр колледжым щэлажьэ, ар федеральнэ проектэу «Профессионалитетым» къыдыхэлъытагъэу агъэпсыгъагъ.
2021-рэ илъэсым щегъэжьагъэу зэнэкъокъоу «Спортыр зэкIэхэм апай» зыфиIорэр рагъэкIокIыгъ. Мысатыу организациехэу социокультурнэ нэшанэ зиIэ спорт лъэпкъхэм хэхъоныгъэ ягъэшIыгъэным, социальнэ мэхьанэ ыкIи цIыфхэм яамалхэр къызэIухыгъэнхэм адэлажьэхэрэм Потаниным ифонд IэпыIэгъу афэхъу. А уахътэм къыкIоцI социальнэ спортым хэхъоныгъэ егъэшIыгъэным фэгъэхьыгъэ проект 241-мэ адэIэпыIагъэх, Урысыем ишъолъыр 57-мэ ахэр ащагъэцэкIагъэх. Грантыр къизыхыхэрэм ахъщэ анахьыбэу аратырэр сомэ миллиони 5.
Адыгэ къэралыгъо университетым ипресс-къулыкъу