Тэхъутэмыкъое районым ит къуаджэу АдыгеякIэм иобщественнэ чIыпIэ игъэкIэжьын рагъэжьагъ.

Лъэпкъ проектыкIэу «ЩыIэныгъэм пае инфраструктурэр» зыфиIорэм къыдыхэлъытагъэу ар зэтырагъэ­псы­хьажьы. Бжыхьэкъоежъ псэупIэ коеу къуаджэр зыхахьэрэм иадминистрацие зэнэкъокъоу зэхищэгъагъэм текIоныгъэр къыщыдихыгъэу «ЮГ-СТРОЙГРАД» зыфиIорэ хъызмэтшIапIэм Iоф щишIэщт.
Зэзэгъыныгъэу ащ дашIыгъэм къызэрэдэлъытагъэм тетэу, чIыпIэм кIэу лъэсрыкIо гъогухэр фашIыщтых, чэщырэ къэзыгъэнэфыщт пкъыгъохэр, тIысыпIэхэр, хэкIидзапIэхэр, спорт псэуа­лъэхэр щагъэуцущтых, къэгъагъэхэр, куандэхэр, чъыгхэр щагъэтIысхьащтых, ощх-ос псыхэр имыуцонхэм пае ахэр зыдэчъыщтхэр щагъэпсыщтых.
АР-м псэолъэшIынымкIэ, транспортымкIэ, псэупIэ-коммунальнэ ыкIи ­гъогу хъызмэтымкIэ и Министерствэ къызэрэщаIуагъэмкIэ, АдыгеякIэм игъэпсэфыпIэ чIыпIэ игъэкIэжьын сомэ миллиони 2-рэ мин 847-м ехъурэ пэIухьащт. IофшIэнхэр жъоныгъокIэ мазэм ыкIэм нэс аухынхэу проектым къыдэлъытагъ.
Лъэпкъ проектыкIэу «ЩыIэныгъэм пае инфраструктурэр» зыфиIорэм ишIуагъэкIэ къуаджэр къыгъэдахэу, лъэхъаным диштэу зэтегъэпсыхьагъэу, цIыфхэм яуахътэ зыщагъэкIощт чIыпIэ Iэрыфэгъу АдыгеякIэм иIэ хъущт.
ЧIыпIэхэм язэтегъэпсыхьан фэгъэ­хьыгъэ къэбархэр Министерствэм исоциальнэ хъытыухэм арыжъугъотэщтых (https:t.me/minstroy01).